Toyakimɔ La Lolango Laso Shamɛ

¹ Davidi, omembi w’esambu, akatatshi ɔnɛ ekambi wa Jehowa ‘wayoyakimɔ la lolango lawɔ vamɛ,’ mbut’ate wayoyakimɔ ‘la lolango lawɔ esadi esadi.’ (Osam. 110:⁠3) Kɛsɔ mɛtɛ mbasalema l’atei wa tshunda dia l’andja w’otondo di’anangɛso. L’edja k’ɔnɔnyi tshɛ wa l’atei w’ɛnɔnyi ɛnɛi w’olimu wetshi, ekambi wa Jehowa wakakimɔ wenya ndekana miliyara ɔtɔi lo tadianganyaka lokumu l’ɔlɔlɔ la Diolelo. Ndo nto, lâdiko di’olimu aso wa sambisha ndo wa mbetɛ anto ambeki, tekɔ la weho efula English: wayswakokaso ndjakimɔ la lolango laso shamɛ dia kimanyiya anyaso anto.

² Weho Wakokaso Ndjâkimɔ la Lolango Laso Shamɛ: Anto amɔtshi wa l’etshumanelo mbeyaka monga l’ohomba w’ekimanyielo dia vɔ ntshɔ lo nsanganya. Ekɔ ɔlɔlɔ sho ndjakimɔ la lolango laso shamɛ dia mbasha ekimanyielo kɛsɔ, shi mɛtɛ? Akina mbeyaka monga la hemɔ, la dikɔmɔ kana ondo wekɔ lo mvudu ya mpitadi. Onde hatokoke mbɔsa tɛdikɔ dia towaenda kana mbakimanyiya lo yoho mɔtshi? Ɔnangɛso ɔmɔtshi kana kadiyɛso kana nkumbo kɛmɔtshi mbeyaka monga l’ohomba w’ekeketshelo. Onde tambokanyiyaka lushi lɔmɔtshi dia mbêlɛka oya lo wekelo aso wa lo nkumbo mbala la mbala? Ombatshi mboka kana opandjudi ɔmɔtshi mbeyaka monga l’ohomba w’onto lawotshindɛ l’olimu w’esambishelo. Bonde kahayawotɛ dia nyu tomba kâmɛ l’olimu w’esambishelo na? Ɔsɔ ele weho ɛmɔtshi wakokaso, la lolango laso shamɛ, ntshelɛ wanɛ wotɔ la so lo mbetawɔ ɔlɔlɔ.​—⁠Ngal. 6:⁠10.

³ Anangɛso kokaka mɛnya mposa kawɔ ka kamba olimu l’atei w’ɔlɔngɔswamelo wa Jehowa lo ndjâtshutshuyaka dia kotsha awui walɔmbama di’onto monga ekumanyi kana okambi w’olimu. (1 Tim. 3:​2-10, 12, 13; Tito 1:​5-9) Lam’ele lofulo laso lekɔ lo tadɛ tsho, tekɔ l’ohomba w’anangɛso wele l’akoka wahombama ndo wetawɔ mbisha ɛnyɛlɔ k’ɔlɔlɔ l’olimu w’esambishelo, w’olakanyelo, ndo wa namaka ɛkɔkɔ l’atei wa tshumanelo.​—⁠1 Tim. 3:⁠1.

⁴ Ondo amɔtshi wa l’atei aso kokaka ndjâtshungolɛ diaaso dia nyomoleka kamba olimu wa Jehowa lo mbɔsaka olimu w’ombatshi mboka wa tshanda esangɔ ɛmɔtshi. Ndo nto, naka sho tshikitanya ekongelo kaso ka wenya lo yoho yasungana, kete ondo tayokoka kambaka oko ombatshi mboka wa tshanda lo pondjo kana mbɔsa olimu w’ombatshi mboka wa pondjo. Onde lɔsɛnɔ laso kokaka tokimanyiya dia sho ntshɔ lo lɛkɛ lele ohomba w’ekimanyielo ndeka efula? Onde sho kokaka ndjatshungolɛ diaaso dia tokamba lo Bɛtɛlɛ ko todja lonya laso dia ntɔla olimu wa l’andja w’otondo otsha la ntondo? Lotumu la mamba lambosalema lo dikambo dia wokelo wa Mbalasa ya Diolelo, Mbalasa ya Nsanganya ya Weke ndo mvudu ya Bɛtɛlɛ l’andja w’otondo, ndo wekɔ l’ohomba w’anto efula wayakimɔ la lolango lawɔ vamɛ dia sala ntumu shɔ. Wanɛ wakayakimɔ la lolango lawɔ vamɛ dia sala ntumu shɔ y’ɛlɔlɔ mandɔmaka efula ndo nongolaka ɛtshɔkɔ efula.​—⁠Luka 6:⁠38.

⁵ Tekɔ lo sɛna l’etena k’ɔngɛnɔngɛnɔ wa mamba. Oma lo nyuma kande, Jehowa ekɔ lo sala olimu wa diambo efula lo nkɛtɛ k’otondo l’ekimanyielo k’ekambi ande wayakimɔ la lolango lawɔ vamɛ! Mbala tshɛ kayotetaka Jehowa lo tshimbo y’ɔlɔngɔswamelo ande dia sho nyomoleka sala olimu wa Diolelo, ayonga ɔlɔlɔ sho ndjambolaka ɔnɛ: ‘Onde dimi ndjakimɔka la lolango lami nshi tshɛ?’ Oma lâsɔ, sho pombaka sɛdingola otema aso la lɔsɛnɔ laso lo dɔmbɛlɔ. Woho wamamemaso Nzambi ayototshutshuya dia sho ntsha kɛnɛ tshɛ kakokaso ntsha l’olimu w’ekila ko ndodja otema wa Jehowa l’ɔngɛnɔngɛnɔ.​—⁠Zef. 3:⁠17.