Nyuma Ka Jehowa Kekɔ La So
1 Sho Ɛmɛnyi wa Jehowa takakondja olimu wa woke efula. Yeso akate di’olimu akɔ ate: “Dieli la lukumu l’ololo nsambishama ntundu lu wedja tshe.” (Mako 13:10) Lo washo w’anto, dikambo sɔ koka mɛnama oko hakokaki ntshama. Koko wolo ɔmɔtshi wekɔ l’olongo watosukɛ: nyuma ka Nzambi.—Mat. 19:26.
2 Esambishelo ka l’Eleko ka Ntondo: Yeso akate lo pɔlɔfɛsi k’Isaya lo kɛnɛ kendana la nde ndamɛ ate: ‘Nyuma ka Jehowa kambombahema . . . dia dimi nsambisha lokumu l’ɔlɔlɔ.’ (Luka 4:17, 18) La ntondo ka wodelo ande, nde akatɛ apɔstɔlɔ ande ate ndo vɔ lawɔ wayolongola wolo wa nyuma k’ekila dia vɔ nsambisha ‘polo lo tokoma ta nkɛtɛ.’ L’ɔkɔngɔ diko, nyuma k’ekila akasokoya Filipɛ dia nde nsambisha ose olimu wa lo mbalasa k’Ase Etiyɔpiya, tɔ kakalɔmbɔla Petero otsha le ɔlɔmbɔdi w’alembe w’Ose Rɔmɔ, ndo paka nyuma k’ekila mbakatome Paulo nde la Baranaba dia vɔ tosambisha ase wedja. Akakoke fɔnya ɔnɛ anto wa lo bɛkɛ diotshikitanyi ngasɔ woketawɔ akambo wa mɛtɛ? Koko vɔ wakawaetawɔ l’ɔlɔlɔ tshɛ.—Etsha 1:8; 8:29-38; 10:19, 20, 44-48; 13:2-4, 46-48.
3 Esambishelo ka Nshi Nyɛ: Dibuku di’Ɛnyɛlɔ mbikaka epole ɔsɛkɛ lo lotumu lakamba nyuma k’ekila nshi yaso nyɛ l’olimu w’esambishelo. Wakafunde lɔkɔ vate: ‘Nyuma la otshukami wambuta vate: Yaka! . . . Ɔnɛ lalanga ɔsɛ ashi wa lɔsɛnɔ wɔsɔsa.’ (Eny. 22:17) Nyuma akatshutshuya olui wa otshukami wa Kristo ndo anyande, ‘ɛkɔkɔ ekina,’ dia vɔ mbewoya anto tshɛ lokumu l’ɔlɔlɔ. (Joa. 10:16) Omalɔkɔ, sho la dia nsambisha la dihonga. Tatokandakandake pondjo dia mbutɛ anto wa weho tshɛ, koko toyalake l’eshikikelo ɔnɛ nyuma ka Nzambi ayotokimanyiya. Annuaire 1998 mɛnyaka lo yoho yahatakoke mama ɔnɛ nyuma ka Nzambi kekɔ nshi tshɛ l’ekambi ande. Onde nyakalembetɛ toshifidi tele lɔkɔ? L’edja k’ɛnɔnyi ehende wetshi w’olimu, lofulo la l’atei atei l’anto 1 000 wakabatizamaka lushi tshɛ.
4 Toyale l’eshikikelo ɔnɛ nyuma ka Nzambi kayongaka la so edja tshɛ kayolanga Jehowa dia sho nsambisha losango la Diolelo. Lam’eyaso ngasɔ, totetemale la ndjasha la wolo tshɛ l’olimu woleki ohomba wa Diolelo!—1 Tim. 4:10.