“Jehowa Ekɔ Okimanyidi Ami”
1 Lam’akasha Yeso ambeki ande wa ntondo ɔkɛndɛ wa sambisha, nde akawatɛ ate: “Nyulungi, dimi lambunyutuma uku ekoko l’atei wa ndjaundu.” (Mat. 10:16) Onde vɔ wakoke wɔma oma lo dui sɔ ndo wakatone sambisha? Kema. Vɔ wakatshe nganɛ wakayofundɛka ɔpɔstɔlɔ Paulo anyande Akristo ate: “Sho kokaka monga la dihonga ndo mbuta ɔnɛ: ‘Jehowa ekɔ okimanyidi ami; hatoka wɔma. Kakɔna kokoki onto tshelami na?’ ” (Hɛb. 13:6, NW ) Vɔ wakangɛnangɛnaka nɛ dia wakɛnama oma le anto ɔnɛ vɔ sunganaka mbotshama sɔnyi lo dikambo dia lokombo la Yeso, ndo wakatetemala la sambisha ndo la mbewoya lokumu l’ɔlɔlɔ aha la pekɔ.—Etsha 5:41, 42.
2 Ɛlɔ kɛnɛ, olimu w’esambishelo wakambema l’andja w’otondo aya ka komɛ. Paka oko akataditshi Yeso, tekɔ lo mpetshama le wedja tshɛ. (Mat. 24:9) Esambishelo pomanaka la wekamu, tɔ mɔnywamaka ndo sekɛmaka l’ahole amɔ lanɛ la nkɛtɛ. Otondonga sho bu la mbetawɔ, tshike tekɔ la wɔ̂ma. Koko, woho weyaso ɔnɛ Jehowa ekɔ okimanyidi aso ndo ɔnɛ nde toshaka wolo keketshaka yɛdikɔ yakatɔshi ya tetemala.
3 Monga la dihonga, kɛdikɛdi monga la wolo ndo pangakala. Dihonga tshikitana la wɔma, ɔsɔnyi ndo osuwa kana djɔmɔ tɛwɛ. Ambeki wa Yeso wekɔ nshi tshɛ l’ohomba wa dihonga dia mbikikɛ. Ekɔ ohomba efula sho monga la dihonga di’aha nɛmbiama la lɔkɛwɔ ndo l’etsha w’andja ɔnɛ wele otunyi wa Nzambi. Ande ekeketshelo kakondjaso lo kanyiya ɛnyɛlɔ ka dimɛna ka Yeso, ɔnɛ lakadje andja otshumba lee! (Joa. 16:33) Tôhɔ ndo apɔstɔlɔ, wanɛ waki la ntondo k’ehemba wa wolo, wakate la dihonga ɔnɛ: ‘Sho la dia kitanyiya awui wa Nzambi, oko wende owandji, oleki awui w’anto ato.’—Etsha 5:29.
4 Sho Kema l’Atei a Wanɛ Wakalola Ɛkɔngɔkɔngɔ: Sho la dia ndjatshutshuya dia mɛnaka olimu aso la sso di’ɔlɔlɔ nshi tshɛ. (Heb. 10:39) Tatohɛke dia Jehowa mbatotoma oma lo ngandji ndo kɛtshi kokande anto wa l’andja w’otondo. Nde halɔmbaka pondjo ekambi ande dia vɔ ntsha awui w’otshatsha. Kɛnɛ tshɛ katɔlɔmbande dia ntsha kayohomba monga di’ɔlɔlɔ wa wanɛ walanga Nzambi.—Romo 8:28.
5 Yimba ya mɛnaka akambo la sso di’ɔlɔlɔ ayotokimanyiya dia tetemala la nyanga anto wele oko ɛkɔkɔ lo mbilo kaso. Sho koka mbɔsa wendjodi w’anto oko djembetelo yɛnya ɔnɛ waya bu l’elongamelo. Ngandji atokimanyiya dia sho mbaoka ndo monga l’asolo a lotutsha! Etena tshɛ katshikɛso onto okanda kana kɛnaso yema ya saki, sho la dia monga l’oyango wa membola onto akɔ esadi esadi dia pɛtshahɛtsha saki kakɔ. Hatohombe mbuta ɔnɛ sho bu la dikoka dia tatɛ kana dia mbeka l’onto Bible. Koko, sho la dia nyangaka tena tshɛ lo dɔmbɛlɔ osukɔ ndo ɛlɔmbwɛlɔ ka Jehowa, tele l’elongamelo ɔnɛ nde ayotokimanyiya.
6 Tekɔ la mbetawɔ ɔnɛ Jehowa ayotsha dia olimu koma l’ekomelo kawɔ. (Enda Filipi 1:6.) Jehowa ekɔ okimanyidi aso, ndo woho wayaɛkɛso tshɛ le nde tokeketshaka di’aha ‘sho pekɔ ntsha kɛnɛ koleki ɔlɔlɔ.’—Ngal. 6:9.
[Caption on page 7]
Waewoyelo
◼ Ekanda wayotosha anto lo Ngɔndɔ ka Dikumi l’Ɔtɔi: Ewo Katɔla Otsha lo Lɔsɛnɔ la Pondjo. Ngɔndɔ ka Dikumi l’Ahende: Ewo Katɔla Otsha lo Lɔsɛnɔ la Pondjo la Traduction du monde nouveau. Ngɔndɔ ka Ntondo: Dibuku tshɛ dia ndjɛkɛ 192 diakatombe la ntondo ka 1985 diele lo lɔkɔtɔ l’etshumanelo. Tshumanelo diele bu l’abuku wa ngasɔ, kawosha anto dibuku La paix et la sécurité véritables : comment est-ce possible ? kana Kokaka We Monga la Loseno la Pondjo lo Paradiso ka la Kete. Ngɔndɔ ka Hende: Sheke y’Ɔngɛnɔngɛnɔ wa lo Nkumbo.
◼ Tshumanelo diayotatɛ nɔmba Annuaire des Témoins de Jéhovah 1999 lam’ayowɔlɔmba ekanda lo Ngɔndɔ ka Dikumi l’Ɔtɔi. Annuaire ayonga l’Angɛlɛ l’Arabɛ, lo Falase la lo Portugais. Tayofundaka l’akatshi w’otomelo ɔnɛ “Noté pour plus tard “ edja ndo lam’ayoya Annuaire akɔ ndo lam’ayotonyotomɛwɔ. Annuaire nɔmbamaka paka lo yoho ya lânde.
◼ Nshi nyɛ, aya bu wolo di’onto ntshɔ lo wodja w’angɛndangɛnda. Ɔnkɔnɛ, anangɛso efula wotshɔ lo wedja ekina. Mbala efula vɔ mumbolaka biro ya filialɛ yaki la Société awui amɔtshi. Filialɛ yekɔ l’ɔngɛnɔngɛnɔ wa mbaewoya adrɛsɛ wa Mbalasa ya Diolelo ndo nshi yɔtɔwɔ nsanganya, dia kimanyiya anangɛso dia vɔ tɛnana la tshumanelo dia lo ngelo yakɔ. Filialɛ kokaka mbaewoya ndo woho wa vɔ tenda mvudu ya filialɛ. Koko, vɔ mumbolaka filialɛ ndo awui akina efula wendana la woho wa vɔ ntshɔ, lɛnɛ ayowotodjasɛ, ahole wayowotɔsɛnya washo, ndo awui akina wa ngasɔ. Biro ya filialɛ kema l’akoka kânga l’etena ka kadimula lo wembola wa ngasɔ. Tambɔlɔmba wanɛ walanga mɛngɔla dia vɔ ntshɔ tombola lo waa agence kana lo biro y’amɛngɔdi wasɛnya washo, nɛ dia vɔ mbele l’akoka wa mbewoya amɛngɔdi awui asɔ tshɛ.