Naka Wɛ Haye, Anto Tshɛ Mbeyaka!
1 Tena la tena, ondo sho tetshaka lo losanganya kana nsanganya efula ya l’etshumanelo tafɔnya ɔnɛ: “Atshande; hawoteya ndo ɔnɛ dimi bu.” Ɔsɔ ekɔ kashi! Oko ele tenyi dia demba, sho tshɛ tekɔ ohomba efula dia etshumanelo pɛtahɛta. (1 Kor. 12:12) Naka tambetsha losanganya lɔmɔtshi lɔtɔso lomingu tshɛ, lonyuma l’anto wakaye mbeyaka ndana. Naka wɛ haye, kete eya dia: anto tshɛ mbeyaka vate wɛ haye!
2 Ɔkɛndɛ w’Ohomba Efula w’Onto l’Onto: Paulo akakombolaka sangana l’anango. Nde mɛnyaka bonde lo Romo 1:11, 12 ate: “Dia dimi nyusha ushasha omotshi wa nyuma . . . dia shu ndjukikitshanya leku dimi la nyu lu mbetawo kasu.” Woho akɔ wamɛ, oma lo kɔmatɛrɛ yaso, asawo aso, ndo oma lo woho wakataye, sho mbodianaka l’asaso ndo keketshanaka dia tshikala la kɔlamelo.—1 Tes. 5:11.
3 Onde wɛ hakombola mɛnana l’anyayɛ Akristo lo nsanganya ya l’etshumanelo? Wɛ ayolonga kɔmatɛrɛ yawɔ la yambalo tshɛ ndo ayandola woho wɛnyawɔ mbetawɔ kawɔ lo kɔmatɛrɛ yakɔ. Eshasha awɔ wa lo nyuma kokimanyiyaka dia wɛ pama. Naka amɔtshi hawoye lo losanganya, kete wɛ ayoka dia ɛngɔ kɛmɔtshi k’ohomba bu. Woho akɔ wamɛ mbôka ananyɔ l’akadiyɛ naka wɛ bu.
4 Ohomba wa Nsanganya: Tshoto y’Etangelo mɔtshi yakate lo dikambo dia ohomba wele la nsanganya lo lonyuma laso ɔnɛ: “L’andja ɔnɛ wambolola l’akambo wa mindo ndo wambohandjɔ l’ewanu wa weho weho, etshumanelo k’Akristo ekɔ tshondo y’eshamelo ka lo nyuma . . . , longele la wɔladi ndo la ngandji. Omalɔkɔ, ɔtɔka lo nsanganya tshɛ ya l’etshumanelo.” (w93 15/8 11) Lushi tshɛ, sho pomanaka l’akambo wadja lonyuma laso l’ohemba a wolo. Naka hatongi la yewo, kete sho kokaka ndjoyasha tshɛ l’ekiyanu aso shamɛ polo ndo lo yɛdikɔ ya ndjonya washo l’akambo wa lo nyuma woleki ohomba. Sho tshɛ tekɔ l’ohomba wa anyaso dia kondja ekeketshelo kahombama ndo dia sho tshikala kâmɛ ndo l’ohetoheto l’olimu wa Nzambi.—Heb. 10:24, 25.
5 Ekɔ ohomba efula sho mbɔtɔka lo nsanganya. Hemɔ kana dikambo dimɔtshi dia shashimuya mbeyaka toshimba di’aha sho monga lawɔ, koko wenya ekina tshɛ, nyɛsɔ tɔshi yɛdikɔ ya mongaka nshi tshɛ l’atei w’elui w’anto wosanganyi watombola Jehowa!—Osam. 26:12.
[Caption on page 1]
Vɔ Kokaka Mɛna Ɔnɛ Sho Tshikitana L’anto Akina
1 Ɔnɔnyi wetshi, ndekana anto 300 000 wakaye lo wedi aso lo batizama. Kakɔna kakɛnyi anto asɔ le Ɛmɛnyi wa Jehowa kakâsokoya lo vɔ mbɔtɔ l’ɔlɔngɔswamelo wa Nzambi na? Lande na kahatafɔnɛ l’ɛtɛmwɛlɔ ekina tshɛ na? Ekadimwelo ɛmɔtshi wɛnama vɔɛnɛ:
—Sho mamemaka Bible oleki tokanyi taso shamɛ: Sho tɛmɔlaka Jehowa Nzambi ‘lo nyuma la lo mɛtɛ,’ oko akate Yeso Kristo. Kɛsɔ mɛnyaka ɔnɛ sho tonaka awui wa kashi w’ɛtɛmwɛlɔ ndo ndjelaka Ɔtɛkɛta wa Nzambi wakafundama.—Joa. 4:23, 24; 2 Tim. 3:15-17.
—Sho ntshɔka le anto lo dihole dia kongɛ ɔnɛ waye le so: Sho taketawɔ lotumu lakatosha Kristo la sambisha la ndakanya, ndo tekɔ lo ndjela ɛnyɛlɔ kande ka tayangaka anto w’etema ɔlɔlɔ. Sho mbâyangaka lo mvudu yawɔ, l’ɛsɛsɛ, kana l’ahole tshɛ wakokawɔ tanema.—Mat. 9:35; 10:11; 28:19, 20; Etsha 10:42.
—Sho mbetshaka onto tshɛ Bible ofele: La lolango laso shamɛ, sho shishaka okundji aso la lokalo laso lo mbetshaka wenya ndekana miliyara ɔnɔnyi tshɛ l’olimu wa Nzambi. Sho mbekaka Bible l’anto wa weho tshɛ aha la shɔnɔdi.—Mat. 10:8; Etsha 10:34, 35; Eny. 22:17.
—Tambolowanyema dimɛna dia kimanyiya anto lo nyuma: Oma lo wekelo aso wa Bible w’onto ndamɛ ndo kɛnɛ katolakanyawɔ lo nsanganya ya l’etshumanelo, lo waa assemblées ndo lo nsanganya ya weke, sho nongolaka wetshelo wa mamba watosha akoka wa ngamula anto akina lo nyuma.—Is. 54:13; 2 Tim. 2:15; 1 Pet. 3:15.
—Sho mbɔsaka mɛtɛ la nɛmɔ ndo kambaka la tɔ lo lɔsɛnɔ laso la lushi la lushi: Oma lo ngandji kokaso Nzambi, sho tshikitanyaka lɔkɛwɔ laso, lo liɔtɔnganyiya la lolango lande. Lonto laso l’oyoyo lafɔna la Kristo kotolaka anto akina oya lo mɛtɛ.—Kol. 3:9, 10; Jak. 1:22, 25; 1 Joa. 5:3.
—Sho ntshaka tshɛ dia mbidjasɛ ndo kamba l’anto akina lo wɔladi: Woho wakɛnɛmɔlaso waonga a Nzambi tokimanyiyaka dia nama etsha ndo ɛtɛkɛta aso. Sho ‘nyangaka ki’ l’anto tshɛ, ndo kiyelaka.—1 Pet. 3:10, 11; Ef. 4:1-3.
2 Anto efula wambetawɔ akambo wa mɛtɛ oma lo bɛnyɛlɔ diɛnawɔ l’Ɛmɛnyi wa Jehowa, mbut’ate dionga diawɔ l’atei w’ɔlɔngɔswamelo wa Jehowa. Ɛnyɛlɔ kaso shamɛ konge la shɛngiya ya ngasɔ le wanɛ wateya ndo watoshishima.