“Ahombami Ntsha la Lɔsɛnɔ Lami Na?”

¹ Wɛ ɔlɔngɔlɔngɔ wayanga koma opalanga w’onto, wɛ kokaka ndjambola wate: ‘Ahombami ntsha la lɔsɛnɔ lami na?’ Ɛlɔngɔlɔngɔ w’Akristo nangaka nyomoleka kambɛ Jehowa. Ko ngande wakokayɛ ntsha dui sɔ l’etena kakɔ kâmɛ kɛmbayɛ ndo ɛkɛndɛ w’opalanga w’onto, ɛnyɛlɔ oko ndjâkotshɛ ehomba wa l’emunyi na? Mbeyaka monga wolo di’onto kondja okadimwelo lo dimbola sɔ.

² Ɛlɔngɔlɔngɔ ɛmɔtshi ndjâkiyanyaka lam’ɛnawɔ eongelo ka lɔsɛnɔ l’andja ɔnɛ ndo ɛnamelo ka woho wayokoka lɔsɛnɔ lakɔ monga lo nshi yayaye. Vɔ ndjambolaka ɔnɛ: ‘Onde pombaka nyomɔtɔ yema ya kalasa ka l’emunyi nto? Pombaka mbɔtɔ l’olimu wa Nzambi wa tena tshɛ kakianɛ?’ Dia mbɔsa yɛdikɔ ya dimɛna, ɔlɔngɔlɔngɔ pombaka kadimola dimbola nɛ l’otema ɔtɔi: ‘Lo lɔsɛnɔ lami, dikambo diakɔna dioleki ohomba na?’ Nde pombaka sɛdingola nsaki ya l’otema ande.

³ Lo nshi yakiyɛ ɔlɔngɔlɔngɔ, dikambo diakɔna diamboyolekaka mbidja l’otema ayɛ? Onde wɛ ndeka ndjasha paka l’oyango w’ekundji, kana wɛ mɛtɛ nangaka kamba la lɔsɛnɔ layɛ dia ntɔla wahɔ wa Diolelo otsha la ntondo? Ah’ɔnɛ naka wɛ aya la dipɔlɔmɛ di’oma lo kalasa k’adidi kete lâsɔ wɛ hahombaki olimu pondjo. Lo dihole dia kalasa k’adidi, efula wakakondja akoka walɔmbama le ewandji w’elimu lo mbɔtɔ kalasa yalakanyawɔ elimu w’anya, lo mbeka ntumu mɔtshi kana lo mbɔtɔ kalasa ka lâdiko ka tshena pe kahawaɔsɛ wenya efula ndo kahâlɔmbɛ dia vɔ ndjasha tshɛ lɔkɔ.

⁴ Ɛkɛ Otema lo Daka dia Jehowa: Dui dioleki ohomba diahombaso menda ele woho ɔnɛ watoshikikɛ Jehowa Nzambi ɔnɛ nde ayokotsha ehomba a wanɛ wadja wahɔ wa Diolelo lo dihole dia ntondo. (Mat. 6:33) Ɔsɔ kema daka di’anyanya. Anangɛso efula wanɛ wɔtɔ lo Kalasa k’Olowanyelo w’Ekambi wakatalongodi apɔlɔmɛ wa lo kalasa y’adidi la ntondo ka vɔ ndjêka akambo wa mɛtɛ. Ko akawasalaka lo elimu wa l’emunyi na? Atɔi ato l’atei awɔ mbakakambaka elimu wɔtɔnɛ la kalasa yakawɔtɔ. Efula wakakambaka elimu w’anya wakawayeka l’ɔkɔngɔ, koko wakakotshaka ehomba awɔ wa l’emunyi dimɛna ko wakakambaka ndo oko ambatshi mboka. Oko akawaleke ndjasha l’olimu a Nzambi, vɔ wekɔ lo nongola ɛtshɔkɔ woleki ndo falanga etale.

⁵ L’etena kɔsayɛ tɛdikɔ dia mbeya kɛnɛ kahombayɛ ntsha l’ɔkɔngɔ a wɛ nongola dipɔlɔmɛ dia sɛkɔndɛrɛ, enda akambo tshɛ dimɛna dimɛna ndo sɛdingola nsaki ya l’otema ayɛ ɔlɔlɔ. Dia wɛ mbɔsa yɛdikɔ y’oshika, enda awui wakatɛkɛtama lo Réveillez-vous ! wa Ngɔndɔ ka Sato 8, 1998, lɛkɛ 19-21. Sawola l’ambutshi ayɛ, la dikumanyi, l’omendji anyu w’otshimbedi, ndo l’ambatshi mboka w’eshika wa lo ngelo keyɛ. Kɛsɔ ayokokimanyiya dia wɛ mbɔsa yɛdikɔ y’oshika dia mbeya kɛnɛ kahombayɛ ntsha la lɔsɛnɔ layɛ.​—⁠Und. 12:​1, 13.