Ekadimwelo Lo Wembola Anyu

◼ Lo dui diakɔna diahomba ambutshi mbidja yimba ɔlɔlɔ naka anawɔ wa totshitshɛ wotomba l’esambishelo?

Ambutshi w’Akristo tombaka l’anawɔ l’olimu w’esambishelo, lo mbalakanya woho wa vɔ sambishaka anto akina lokumu l’ɔlɔlɔ la Diolelo. Lo ntsha ngasɔ, ekɔ ohomba vɔ namaka anawɔ w’akɛnda dimɛna lo kɛnɛ kendana la mpokoso kakoka mbakomɛ lo mbilo oyadi kanga lo nyɛ yele bu ‘wâle.’ Mbala efula, lam’ele anto wamboleka monga la lokaki ndo ndjakimɔ l’akambo wa dieyanelo lo ‘tena nɛ dia wolo,’ ana tɔkɔka l’anya wa dengalenga ndo anto teyanaka la wɔ la wolo. (2 Tim. 3:​1-5) Ambutshi pombaka mbɔsa tɛdikɔ t’ɔlɔlɔ dia kokɛ anawɔ wa totshitshɛ oma le weho w’anto asɔ. Kakɔna kakokawɔ sala na?

Bible tolakaka l’ɔlɔlɔ tshɛ dia monga la yêwo ndo mambalɛka wâle tshɛ wakoka tokomɛ. (Tuk. 22:3; Mat. 10:16) Aha shate paka, koko ekɔ ɔlɔlɔ di’ombutshi kana opalanga okina tshindɛ ɔna l’esambishelo lo dihole dia mbokimɔ ndamɛ. Naka apandjudi ahende w’akɛnda wambotomba kâmɛ, kete ekɔ ɔlɔlɔ di’ombutshi kana opalanga ɔmɔtshi mbadjaka sso wonya tshɛ. Lo mɛtɛ, lam’ayole ɔna ndo wondɛnya dia nde ambokoka ntsha akambo ndamɛ, ambutshi kokaka menda dia kana aya bu ohomba efula wa vɔ mbolamaka.​—⁠Enda ndo l’Olimu Aso wa Diolelo wa Ngɔndɔ ka Hende 1993, lo kiombo yele l’ɔtɛ a dui ɔnɛ Ekadimwelo lo Wembola Anyu.

Ekɔ nto ohomba mendaka ɔlɔlɔ wonya watayeteta lo mutuka kana l’ekolo. Sho kokaka ndjakokɛ oma lo waa aksida, kana pâ mɔtshi y’anyanya, toshisha falanga laka enganga, kana abasa l’andja ɔnɛ wele kambokambo tshɛ paka funana lo tominadi naka tayonga la yêwo.

Ekɔ ɔlɔlɔ di’ɛlɔngɔlɔngɔ l’esekaseka ‘tombola lokombo la Jehowa.’ (Osam. 148:​12, 13) Ɛtɛkɛta awɔ ndo lɔkɛwɔ l’ɔlɔlɔ lele lawɔ l’esambishelo mambiyaka anto akina ndo tombolaka Jehowa. Ambutshi, nyokimanyiya ananyu lo weho akɔ tshɛ dia vɔ mbewoyaka lokumu l’ɔlɔlɔ mbala la mbala aha la mbohɛ mbakokɛ oma lo wâle!