Tɔlɔmbɛ ekimanyielo ka Jehowa
1 Yeso akɛnya ambeki ande ohomba wa Jehowa tshɔkɔla olimu awɔ w’esambishelo. (Mat. 9:37, 38) Alɔmbɛlɔ aso wa lotombo ndo wa eokelo ka losaka woye oma k’ɛse otema kâmɛ ndo ɛsɛngɔsɛngɔ aso mɛnyaka woho wayaɛkɛso tshɛ le Jehowa dia kondja ekimanyielo kande. (Fil. 4:6, 7) Afundelo tɔkɔkɔmiyaka dia sho tetemala la nɔmba ‘weho tshɛ w’alɔmbɛlɔ ndo ɛsɛngɔsɛngɔ.’ Alɔmbɛlɔ asɔ mendanaka l’olimu aso w’esambishelo.—Ef. 6:18.
2 Lo alɔmbɛlɔ aso, sho tombolaka Jehowa l’ɔtɛ wa waonga la etsha ande waheyama mbɛdika. Sho mbotombolaka nto nɛ dia nde Mbakanga lokumu l’ɔlɔlɔ latatasambisha. Nde kokaka tombwama nɛ dia ndamɛ mbatohumuya lokolo l’ɔlɔ l’olimu aso w’esambishelo.—Osam. 127:1.
3 Lo alɔmbɛlɔ aso wa eokelo ka losaka, sho mbishaka Jehowa losaka lo woho wambondotomanya lolango la sangwelo diande fundo. Shi ekɔ diɛsɛ dia woke dia sho mbewoya anto akina akambo wa mɛtɛ wendana la Diolelo? Sho mbishaka Jehowa losaka lo kɛnɛ tshɛ katshaso l’olimu w’esambishelo.—Osam. 107:8; Ef. 5:20.
4 Ekɔ ɔlɔlɔ mɛtɛ sho nɔmba Jehowa ekimanyielo dia sho tana anto wetawɔ sho mbeka la wɔ Bible ndo dia mindana etema awɔ l’akambo wa mɛtɛ. Lo salaka alɔmbɛlɔ wa ngasɔ, sho mbetawɔka ɔnɛ paka Nzambi oto mbakoka tshɔkɔla olimu aso w’esambishelo.—1 Kor. 3:5-7.
5 Kadiyɛso kɛmɔtshi akafɔnyaka ɔnɛ womoto ɔmɔtshi latondoshaka waa periodikɛ kombadiaka Tshoto y’Etangelo la Réveillez-vous! Lam’ele nde konangaka di’onto kɛnya la tojurunalɛ tɔsɔ t’ohomba efula, nde akalɔmbɛ Jehowa dia naka womoto akɔ kotiadaka, kete atotilongolake nto. Lam’akatshu kadiyɛso mbala kekina dia towenda, omi aki mama kakɔ akawotɛ ate: “Losaka heyama lo woho watelayɛ periodikɛ nyɛ mbala la mbala. Dimi ndjiadiaka ndo ndjilangaka woho w’anyanya.”
6 Sho kokaka sɛngasɛnga Jehowa la ndjakitshakitsha tshɛ ndo l’etete dia nde tokimanyiya dia sho ndɔshana la wêndjodi ndo lɔsɔkɔ lele l’anto ndo minya wɔma tshɛ woho wa sho tetemala sambisha la dihonga. (Etsha 4:31) Naka tayotetemala la nɔmbaka ‘weho w’alɔmbɛlɔ tshɛ ndo ɛsɛngɔsɛngɔ’ lam’atatatetemala l’olimu aso w’ekila l’okitanyiya tshɛ, kete sho kokaka ndjashikikɛ ɔnɛ Jehowa ayotokimanyiya.—1 Joa. 3:22.