Tana Ɔngɛnɔngɛnɔ l’Olimu Ayɛ w’Ekila
1 Vɔ wakakalola “l’ongenongeno.” Ɔkɔndɔ wa lo Bible nembetshiyaka woho wakoke ambeki 70 lam’akawakalola dia ndjosha Yeso alapɔlɔ w’oma lo lɔkɛndɔ lawɔ l’esambishelo. Vɔ wakonge l’ɔngɛnɔngɛnɔ w’oma k’ɛse otema lo sala lolango laki Nzambi. (Luka 10:17) Ko kakɔna kokoki kokimanyiya dia tana woho w’ɔngɛnɔngɛnɔ ɔsɔ l’olimu w’ekila na?
2 Ɛna Akambo la Sso di’Ɔlɔlɔ: Wɛ ekɔ la diɛsɛ di’oma le Nzambi dia mbewoya anto sangwelo diaki Jehowa dia woke. Oma l’esambishelo kayɛ, wɛ koka tshungola onto ɔmɔtshi oma l’akambo wa kɔlɔ wa l’andja ɔnɛ kana oma l’ɔtɛmwɛlɔ wa kashi. Wɛ kokaka mbisha anto elongamelo ka lɔsɛnɔ la l’andja wele bu l’efukutanu watɛnya pâ nshi nyɛ. Ohokanyiya ɔlɔ woka Jehowa etena konɛyɛ dimɛna ntɔngɔ y’akambo wa mɛtɛ l’otema w’onto ɔlɔlɔ. Ɛna akambo la sso di’ɔlɔlɔ lo nɔmba nyuma kaki Nzambi dia tɔ kosha ɔngɛnɔngɛnɔ lam’atayakambe olimu ayɛ l’otema ayɛ tshɛ.
3 Eka Dimɛna: Losanganya la wetshelo lakasale Yeso nde l’ambeki 70, mbɔtɔnɛka la Losanganya l’Olimu latshaso nshi nyɛ. Nde akawaetsha dia vɔ monga l’akoka wa kamba olimu awɔ dimɛna. (Luka 10:1-16) Ɛlɔ kɛnɛ, Losanganya l’Olimu kêtshaka woho wa mbeya sawola l’anto, wa tatɛ asawo ndo wa tatɛ nɔmbɔla wekelo wa Bible. Lo ndjasha wɛmamɛ ndo lo ndowanya akoka ayɛ wa nsambisha, wɔma wamboyokaka lo mbɔsa ɔnɛ olimu ɔsɔ wekɔ wolo ndo hakoke mbokamba wayokitakita ndo wɛ ayonga l’eshikikelo ndo l’ɔngɛnɔngɛnɔ lo dihole dia wɔma ɔsɔ.
4 Ka Washo Ayɛ lo Nshi Yayaye: Yeso akatane ɔngɛnɔngɛnɔ l’olimu ande w’ekila kânga mbakandakikɛka asui. Lande na? Nɛ dia nde akake washo ande l’ɛtshɔkɔ la waɛsɛ wakakitshama la ntondo kande. (Heb. 12:2) Wɛ koka ntsha woho akɔ lo shikimadja yimba yayɛ ndo otema ayɛ lo lokombo laki Jehowa ndo l’ɛtshɔkɔ wayêla andja w’oyoyo waki Nzambi. Kɛsɔ ayetɛ olimu ayɛ ohomba ndo ayokokotshɛ ɔngɛnɔngɛnɔ.
5 Kambɛ Jehowa olimu w’ekila ekɔ diɛsɛ dioleki woke diakoka monga layɛ ɛlɔ kɛnɛ. Lâsɔ wɛ kokaka mbuta wate: “Dimi latongenangenaka dia ntsha lulangu laye, we [Nzambi k]ami.”—Osam. 40:8.