‘Salaka Akambo Ayɛ Tshɛ la Ngandji’
1 “Tamamba heyama lo menda ɔlɔngɔswɛlɔ ndo loshilambo lanyu. Kɛsɔ totshutshuyaka dia nyɔngɛnangɛna ndo nyɔlɛmiya.” Ɔsɔ ekɔ ɛtɛkɛta waki owandji ɔmɔtshi w’olimu wakamba lo biro kɛmɔtshi ka ministrɛ, owandji ɔsɔ akɔtɔ lo losanganya laso lɔmɔtshi la distrikɛ. Sho mɛtɛ tokeketshamaka lam’andɔmaso ngasɔ oma lo lɔkɛwɔ longa laso la ntondo k’anto tshɛ. Dui sɔ mɛnyaka dia lo tshɛ kaso, tekɔ lo ‘ntsha akambo aso la ngandji.’ (1 Kor. 16:14) Koko, ekɔ akambo amɔtshi wele naka hatowadjisha yimba kete wayolanya lokumu l’ɔlɔlɔ lele l’ekambi waki Nzambi.
2 Tɛnya Ngandji Kaso lo Ndjakimɔ la Lolango: Olowanelo wa losanganya la woke nemanɛka efula la woho wɔlɔngɔswamilɔ. Diɔ diakɔ dianyɔlɔmbaso dia nyu kamba la yimba yanyu ya ndjakimɔ la lolango woho wa kimanɛ la kɔmite ya nsanganya yakasɔnama lo lɛtshi lanyu la nkɛtɛ. Sho nangaka mandola wanɛ tshɛ wayasha dia mbika adepartɛma w’elimu wotshikitanyi wa lo losanganya ndo wanɛ wayonyaka diangɔ sɔ l’ɔkɔngɔ wa losanganya. Koko, akambo efula wa ntsha wekɔ. Mbala efula, sho pombaka mɔmba ahole asɔ dimɛna dimɛna. Pombaka tayangi anangɛso amɔtshi wahomba ndjolama dihole dia losanganya. Lo wonya wa losanganya, amɔtshi pombaka namaka pudipudi ka waa komba.
3 Alapɔlɔ walongolaso oma l’ahole efula mɛnyaka dia tɔtɔi t’anangɛso l’akadiyɛso toto mbetawɔ ndjakimɔ la lolango l’ɔlɔngɔswɛlɔ wa nsanganya ya weke. Amɔtshi l’atei wa wanɛ wayakimɔ la lolango nɔmbaka dia vɔ mbafuta ndo dia Société mbaleshaka. Akina kambaka kana kimɔka dihomɔ diawɔ di’olimu lo nɔmba etenyi kɛmɔtshi ka dikuta. Vɔ haweye dia nsanganya yaso y’ekila mbashaka diaaso di’ɔlɔlɔ dia kimɔ woshasha wa la lolango woho wa tɔla ɔtɛmwɛlɔ wa pudipudi waki Jehowa otsha la ntondo.—Osam. 110:3.
4 Lo nshi yakafundamaka Bible, wokelo wa tɛmpɛlɔ ndo wa dihele dia Jerusalɛma aki tena di’ɔngɛnɔngɛnɔ le ekambi wa Jehowa. Ekambi waki Nzambi wakɔsaka dia ɔsɔ ekɔ diaaso dia mɛnya lowando lawɔ otsha le Jehowa. Apami la wamato wakatɔlaka weshasha onto l’onto lo ndjela ekondjelo kande ndo wakayakimɔka tshɛ l’elimu w’anya wa weho la weho.—Ez. 2:64, 65, 69 ; 3:1, 3.
5 Sho kokaka mbeka akambo efula oma l’ɛnyɛlɔ kawɔ. Vɔ wakayakimɔ tshɛ ndo wakakambaka vɔ tshɛ la lolango lawɔ. Vɔ komonga la lɔsɛnɔ la wɔdu. Lo nshi y’Ɛzɛra, wanɛ wakakambaka olimu w’ohikelo waki eyoyo l’osomba ɔsɔ. Vɔ wakasɛnɛ edja efula lo lɔhɔmbɔ ndo akahombamaka mbɔsa nshi efula dia vɔ ndjekesanɛ ndo ndjoyakongɛ dimɛna lo nkɛtɛ yawɔ nto. Lâdiko dia lâsɔ, vɔ wakahɛnyahɛnyamaka oma le atunyi awɔ wanɛ waki konangaka di’ɔtɛmwɛlɔ wa mɛtɛ mbolwama la Jerusalɛma. Vɔ mɛtɛ komonga la lɔsɛnɔ la wɔdu. (Ez. 4:1-5) Vɔ kɔkɔmɔ etema. Kânga mbakiwɔ eyoyo l’osomba, vɔ kɔnɔmba dia vɔ mbafutaka oma l’olimu wa wokelo wa tɛmpɛlɔ wakawakambaka. Lo dihole dia ntsha ngasɔ, vɔ wakakambe ‘aha la tɛwɔla anya’ ndo Jehowa akâtshɔkɔla.—Ez. 4:22.
6 Ɔlɔngɔswɛlɔ wa losanganya la woke ekɔ etena k’ɔngɛnɔngɛnɔ. (Euh. 16:15) Etshumanelo tshɛ ndo nkumbo tshɛ k’Okristo pombaka mbeya dia vɔ mendanaka la dikambo sɔ. Dikumanyi kokaka tshutshuya ase etshumanelo kawɔ oma l’ɛnyɛlɔ kawɔ ndo oma l’ekeketshelo kawɔ. Lam’akasukana Losanganya la Distrikɛ laki l’ɔtɛ a dui ɔnɛ “Ɔtɛkɛta wa Prɔfɛsiya Waki Nzambi,” dikumanyi dia l’etshumanelo kɛmɔtshi ka lo wodja aso wakatshumanya ɛlɔngɔlɔngɔ l’esekaseka wa l’etshumanelo kawɔ, ko wakawaɛnya bandɛ video kele l’ɔtɛ a dui ɔnɛ “ Unis grâce à l’enseignement divin, ” bandɛ kɛnya nganɛ wayasha ɛlɔngɔlɔngɔ l’akɛnda wa l’andja w’otondo lo ɔlɔngɔswɛlɔ wa nsanganya ya weke. Lo ndjela kɛnɛ kakawɛnyi, ɛlɔngɔlɔngɔ l’esekaseka efula wa l’etshumanelo wakayakimɔ la lolango dia mbidja pudipudi lo sɛkɛ dia ponde diakahombama salema losanganya la woke. Oyadi lɔsɛnɔ la ngande lele laso, tokambe ndo tokimɔ weshasha l’ɔngɛnɔngɛnɔ dia nsanganya yaso ya distrikɛ y’ɔnɔnyi ɔnɛ mbeta dimɛna.
7 Tɛnyanya Ngandji Wonya wa Diomuyelo: L’oyango wa mbetsha akambo wɔdu ndo wa kondja wenya, Société akatɔlɔmbɛ dia sho ndjaka lushi tshɛ la yangɔ ya ndɛ shamɛ. Anangɛso efula wakayele dako sɔ ko wakɛnyi dia lo wonya wa diomuyelo dia midi, vɔ wakakoke mbidjasɛ kâmɛ la nkumbo yawɔ ko ndɛ yangɔ yakawela. Efula wakate dia vɔ waya la diaaso dia sembola yema y’ekolo wonya wa diomuyelo ndo mbetsha wenya efula vɔ l’anangɛwɔ l’akadiyɛwɔ. Dikambo sɔ mbâlɔmbaka dia talɔngɔsɔdi yangɔ ya ndɛ la ya nɔ ndo didja lo kisaka ka tshitshɛ kana l’ɛngɔ kokoki mbɔtɔ l’ɛse ka kɔsa kana k’okala awɔ. Sho nɔmbaka di’ampokami tshɛ ndjela dako sɔ. Lo nsanganya yêke kambeta, wakɛnyi di’anangɛso wakatombatombaka dia tosomba diangɔ dia ndɛ l’ahole wosukanyi la dihole diasalema losanganya. Diɔ diakɔ diɔkɔtɔ wanɛ wasodja diangɔ polo ndo lo sɛkɛ dia losanganya. Amɔtshi l’atei w’anto asɔ wakalɔmbɛ ndo nɔmba dia kana vɔ kokaka ndihola rɛstora dikambo dia wanɛ waya lo losanganya. Koko, naka sho mbetawo dikambo sɔ, kete ndo wanɛ w’oma l’andja a ngelo wele bu la nsaki ka mbɔtɔ lo losanganya wayɔsɔhana kâmɛ la so. Lâsɔ kete, shambu ya mbɔtɔka l’ɛnɔngɔ w’etale etale dia tosomba diangɔ dia ndɛ yayokalola nto, ko tete le dui sɔ mbêla ofukutanu ndo mbashidiya nɛmɔ dia nsanganya yaso. Diɔ diakɔ dialɔmbaso onto tshɛ dia nde mbela yangɔ yande ya ndɛ la ya nɔ lushi tshɛ la losanganya. Ndo anto wayasha waya la nyu mbahomba ntsha ngasɔ. Aha ndja l’elangi kana tɔvɛrɛ takoka mbolɛ ndo dinɔnɔ dia wolo lo dihole dia losanganya.
8 Tekɔ lo kongɛ l’asolo walokɔlokɔ dia mbɔtɔ lo Losanganya la Distrikɛ lele l’ɔtɛ a dui ɔnɛ ‘Wanɛ Wakitanyiya Ɔtɛkɛta wa Nzambi.’ Onde wɛ amboshidiya ndjalɔngɔsɔla dimɛna dimɛna? Onde wɛ ayotoyakimɔ la lolango dia kamba elimu wa lo losanganya? Lɔkɛwɔ laso lo waa ɔtɛlɛ ndo l’osomba wasalema losanganya lɛnyake wonya tshɛ akambo wa mɛtɛ wele l’etema wakiso ndo ngandji kele laso le Otungi wakiso.