‘Pâ kanyu kema anyanya’
1 Ɔsɔ ekɔ mɛtɛ kanyi y’ekeketshelo! Pâ kanyu l’olimu waki Jehowa kema anyanya. (1 Kor. 15:58) Koko, ohokanyiya weolo wadja anto dia ndowanya lɔsɛnɔ kana ekondjelo kawɔ. Esangɔ ɛmɔtshi, vɔ ndjelaka kalasa ya lâdiko, kana kambaka oko fumbe dia kondja lomombo. Koko lam’ele ‘tena la akambo wa shashimoya,’ ndjalaka, vɔ mbeyaka monga ko hawokondjaki pondjo lokumu latawayange, kana ngɛnangɛna efula la lomombo la l’emunyi lakawayangaka. Weolo wakiwɔ wekɔ anyanya oko ‘onto latatshanya lɔpɛpɛ.’ (Und. 1:14; 9:11) Lâsɔ, ekɔ ohomba sho monga l’akambo efula wa ntsha l’olimu akɔ ɔtɔi wele kema anyanya nɛ dia vɔ wekɔ l’ohomba wa pondjo!
2 Olimu wele mɛtɛ l’ohomba efula: Esambishelo ka lokumu l’ɔlɔlɔ la Diolelo diaki Nzambi ekɔ olimu woleki ohomba lanɛ la nkɛtɛ. Vɔ mbele olimu wahomba kambema, oyadi anto tohokamɛ kana kema. Sho nangaka monga l’akoka wa mbuta oko Paulo lakate ate: “Dimi laha l’unungu wa dikila dianyu, nyu tshe ne dia dimi kumbuka woma wa nyutela [kanyi] tshe ya [Nzambi].”—Etsha 20:26, 27.
3 Ande ɔngɛnɔngɛnɔ wonga laso lam’ahokamɛ ndo wetawɔ anto losango la Diolelo lee! Osekaseka ɔmɔtshi akavusha shekadi. Nde akayambolaka ate lende ambotshɔ ɔnango papa la womoto, onde l’olongo kana l’ifɛrnɔ? Nde akalɔmbɛ Nzambi dia mbokimanyiya, lo kamba la lokombo Jehowa woho wakawetsha kadiyɛnde. Kombeta edja nde akamɛ mbeka Bible ndo mbɔtɔ lo nsanganya y’Akristo. Nde akamɛ mbɔsa lɔsɛnɔ lo yoho kina ndo akahembola lɔngɛnyi la dengalenga. Osekaseka ɔsɔ akakile mfɔka, dinɔnɔ dia wolo ndo akatshike wovi. Nde ekɔ lo mbetawɔ ate: “Paka ngandji ka Jehowa mbakakimanyiya dia tshika yoho ya lɔsɛnɔ ya kɔlɔ shɔ. Jehowa oto mbakakoke mbishami elongamelo ka lɔsɛnɔ la pondjo oma lo kɛtshi kande k’efula.” Nde hayetsha lɔsɛnɔ lande l’eyango w’anyanya.
4 Kânga lam’atona anto kohokamɛ, tetemala nɛ dia wɛ ekɔ lo sala dikambo dimɔtshi di’ohomba efula. Vɔ mbeyaka dia Ɛmɛnyi wa Jehowa mbaembolaka. Olowanyi, kɔlamelo ndo ngandji kayɛ mɛnamaka hwe. Onde pâ kayɛ l’olimu wa Nkumadiɔndjɔ kekɔ anyanya? Ndoko!