Ngande wahomba nɔmbɔma nsanganya y’otsha l’olimu w’esambishelo?

¹ Losanganya l’otsha l’olimu w’esambishelo ekɔ ekongelo kɔsama oma le etshumanelo. Lɔ pombaka nɔmbɔma lo yoho yaha l’ofukutanu ndo yele la kɛnɛmɔ. Dionga ndo ɔlɔtɔ waya laso lo losanganya lakɔ pombaka monga oko watotɔlɔtaka otsha lo nsanganya kina ya l’etshumanelo. Lɔ layotatɛka la wonya, oyadi kânga nyu mbeyaka di’anto akina wayoyokoma l’ɔkɔngɔ. Onto lakasɔnama dia nɔmbɔla losanganya lɔnɛ la dia ndjâlɔngɔsɔla dimɛna woho wa tondja tokanyi t’ohomba takoka anto kamba latɔ lushi lakɔ l’esambishelo. Olimu Aso wa Diolelo mbishaka waewoyelo ndo alako wele ohomba dikambo dia losanganya lɔnɛ.

² Aha lo losanganya tshɛ l’otsha l’esambishelo mbahombama sɛdingolaka divɛsa dia lushi la lushi, koko naka mɛnamaka dia ekɔ ohomba disɛdingola dia keketsha olimu w’esambishelo, kete kokaka disɛdingola lo tshena pe. Losanganya kalosalemake la wonya di’aha nshisha wonya wele ohomba dia tatɛ esambishelo. Lɔ halokoke ndekana minitɛ 10 kana 15. Koko, lɔ koka nyomonga mondo naka lɔ lambosalema l’ekomelo ka losanganya lɔmɔtshi la l’etshumanelo. Pombaka kanɛ ambatshi mboka; omalɔkɔ, losanganya lamboleka otale kana lamboyosalema l’ɔkɔngɔ kokaka ndjonga tshondo ya wotsho le wanɛ wasɛkɛwɔ lofulo lɔmɔtshi la wenya lahombawɔ sambisha.

³ Pombaka mbisha opandjudi tshɛ ɛtshi kande ka nkɛtɛ. Koko, mbeyaka monga ko anto amɔtshi wakatokanyi dia tosala waendelo w’eyoyo kana dia tɔlɔmbɔla wekelo wa Bible, lâsɔ vɔ hawotonga l’ohomba wa mbakahanya.

⁴ Anto tshɛ wele lo losanganya la dia monga la yambalo ndo konga polo lam’ayowokahanya anto ndo wayowosala dɔmbɛlɔ. Wanɛ wakatokanyi dia tomba pombaka tewoyisha la ntondo. Okahanyelo w’apandjudi ndo wa bɛtshi dia nkɛtɛ pombaka tasadimi la ntondo k’ekomelo ka losanganya koko aha l’andja wa lokombo kana l’ahole wɛnama le anto tshɛ. Losanganya l’otsha l’olimu w’esambishelo pombaka komɛ la dɔmbɛlɔ. Naka anto tshɛ mbidja alako asɔ tshɛ l’atei w’etema, kete sho koka nongamɛ l’eshikikelo tshɛ ɔnɛ Jehowa ayɔtshɔkɔla lo yoho y’efula, olimu w’esambishelo wayosalema.