Onde wɛ mandolaka solo dia lotutsha diele la Jehowa?
1 Otondonga Jehowa komonga la solo dia lotutsha lo ɛnɔnyi 10, 20 kana ndekana wambeta ɛnɛ, lo tshika etena k’esambishelo salema, onde wɛ oteya akambo wa mɛtɛ? Tekɔ mɛtɛ la lowando efula lo woho wakandasha anto efula diaaso dia ‘ndjatshumoya.’ Koko lushi la woke l’elombwelo kaki Jehowa “layuya uku uvi.” (2 Pet. 3:9, 10) Ɔnkɔnɛ, hatohombe mbɔsa solo dia lotutsha diaki Nzambi oko nde ekɔ lo tshimbatshimba dia ndanya andja ɔnɛ.—Hab. 2:3.
2 Kɛtshi k’anto: Ndjakimɛ kele la Jehowa tamba eokelo kana timba taso. Tatohɛke bonde kakikɛnde. (Jona 4:1-4, 11) Jehowa ekɔ lo mɛna shɔkɔ yele l’anto ndo ekɔ lo mbaoka kɛtshi. Ndo Yeso mbôka yoho yakɔ yamɛ. Lo kɛtshi kakandoke oloyi w’anto wakandasambisha, nde akalange di’olimu w’esambishelo pama dia mbisha anto efula diaaso dia kondja lɔsɛnɔ la pondjo.—Mat. 9:35-38.
3 Lam’atomba wâle kana mpokoso mɔtshi, kema sho tokaka anto waheye akambo wa mɛtɛ kɛtshi? Ɛlɔ kɛnɛ, anto wekɔ oko ‘ɛkɔkɔ waha l’olami,’ lam’alɔshanawɔ l’ekakatanu ɛsɔ, vɔ nangaka mbeya bonde kambolana andja ɔnɛ. (Mako 6:34). Lam’asambishaso l’ohetoheto lokumu l’ɔlɔlɔ, sho keketshaka wanɛ wele l’etema w’ɔlɔlɔ, ndo sho mɛnyaka lowando laso lo solo dia lotutsha diele la Jehowa.—Etsha 13:48.
4 Olimu aso pombaka salema esadi: Ɔnɔnyi wetshi, anto 323439 wakabatizama ndo ndekana anto 14000000 wakasangana lo Eohwelo. Anto efula kokaka mɛtɛ pandɔ oma l’elanyelo k’andja ɔnɛ wa kɔlɔ! Hateye lofulo l’anto layonga lo ‘lemba la woke l’anto’ lɔsɔ. (Eny. 7:9) Ndoko leya edja ndo kande kayoviya olimu wakiso w’esambishelo. Paka Jehɔwa mbeya. Lokumu l’ɔlɔlɔ layosambishama polo lo yɛdikɔ yayondolanga, ‘ko l’ɔkɔngɔ diko ekomelo kayoya.’—Mat. 24:14.
5 Nshi yaya kashila, ndo lushi la Nzambi laya suke. (1 Kor. 7:29a; Heb. 10:37) Aha la tamu, ‘panda kaso kamboleka monga suke, oleki etena kakatetawɔ.’ (Romo 13:11) Tatohɛke bonde kakikɛ Nzambi. Koko, tosambisha esadi esadi dia efula k’anto wele la mposa ka losembwe ndjôkama kɛtshi oma le Jehowa.