Ekongelo ka losanganya l’otshimbedi layaye

Oko wadieyaso, Jehowa Nzambi mbasungana sho mboka ngandji ndo mbomamema. Koko, andja ɔnɛ nyangaka dia tɔ̂nga woho wa sho shisha diɔtɔnganelo diasaso la nde. (Joa. 17:14) Dia keketsha ngandji kokaso Jehowa ndo dia tokeketsha woho wa mbeya shika ekolo la ntondo k’akambo wa l’andja ɔnɛ wadja lonyuma laso lo wâle, losanganya l’otshimbedi la l’ɔnɔnyi w’olimu wa 2001 layonga l’ɔtɛ a dui ate: ‘Tolange Nzambi, Koko Aha Diangɔ dia l’Andja Ɔnɛ.’​—⁠1 Joa. 2:​15-17.

Ngandji k’efula kokaso Jehowa totshutshuyaka dia sambisha awui ande. Kânga mbediɔ ɔsɔku, olimu w’esambishelo bu dikambo dia wɔdu le efula k’ekambi waki Nzambi. Lo etenyi kele l’ɔtɛ a dui ɔnɛ: “Ngandji Kokaso Nzambi Totshutshuyaka l’Olimu Aso,” tayɛna nganɛ wakalɛndja kana wakanya anto efula sɔnyi ndo wekamu ekina dia vɔ kamba olimu ɔsɔ dimɛna.

Woho watalana akambo wa l’andja ɔnɛ ekɔ la shɛngiya yakɔna le so na? Ɛlɔ kɛnɛ, akambo wakɛnamaka kɔlɔ wɛnamaka dimɛna to. Sawo diele l’ɔtɛ a dui ɔnɛ: “Wanɛ Woka Jehowa Ngandji Mpetshaka Kɛnɛ Kele Kɔlɔ” ndo dako dia tenyi sato diele l’ɔtɛ a dui ɔnɛ: “Ngande Wahombaso Mbɔsa Akambo wa l’Andja Ɔnɛ?” ayokeketsha eshikikelo kaso ka tona nsaki ya kɔlɔ.

Lo losanganya lɔnɛ tayɛna nto yoho y’oyoyo ya nɔmbɔla Kalasa k’Olimu wa Teokrasi ndo Losanganya l’Olimu, kamɛ ndo wekelo wa Tshoto y’Etangelo ya lo lomingu lakɔ lo hiembola. Dako dia lo sɛkɛ diele l’ɔtɛ a dui ɔnɛ: “Woho wa Mbidja Andja Otshumba oma lo Ngandji la Mbetawɔ,” ayotokeketsha dia mbokoya ɛnyɛlɔ kaki Yeso lo kɛnɛ kendana la shika tanga lo tɔsɛngiya ta l’andja ɔnɛ. (Joa. 16:33) Ndja yimba dia mbeta ambeki ayɛ wa Bible lo losanganya lɔsɔ. Onto tshɛ lalanga batizama pombaka tewoyisha omendji walɔmbɔla kɔl’ɔmɔ woho wa vɔ tɔshi tɛdikɔ tele ohomba.

Losanganya l’otshimbedi lɔnɛ, layoleka kotola yambalo yaso paka l’akambo wahombaso ndeka mɛnya ngandji kaso dia sho kondja ɛtshɔkɔ waki Jehowa. Tatohandjake kanga yangɔ ya lo losanganya lɔnɛ!