Todje yimba l’elimu wa diambo waki Nzambi
1 Takasangana nshi shato y’etondo lo Losanganya la Distrikɛ laki l’ɔtɛ a dui ɔnɛ: “Wanɛ Wakitanyiya Ɔtɛkɛta wa Nzambi.” L’edja ka nshi shato shɔ, takatokohɛ yema, ekiyanu wa lushi la lushi wa lo lɔsɛnɔ nɛ dia timba taso takashikimala paka lo mpokamɛ elimu wa diambo waki Jehowa. Losanganya lɔnɛ laki l’oyango wa pamia mbetawɔ kaso le Nzambi ndo l’Ɔtɛkɛta wakinde, keketsha diɔtɔnganelo diasaso lande, ndo totshutshuya dia sho ndeka monga l’ohetoheto l’esambishelo. Ngande wakondjaso wahɔ oma l’awui wakawatetsha na?—Joa. 13:17.
2 Nkumbo nyokitanyiya Ɔtɛkɛta wa Nzambi: Sawo dia tenyi sato diaki l’ɔtɛ a dui ɔnɛ: “Tokitanyiya Ɔtɛkɛta wa Nzambi,” diakatokimanyiya dia sɛdingola woho wele lonyuma la nkumbo yaso. Ana nangaka mbeka. Diakɔ mbele, ambutshi woka Nzambi wɔma wakakeketshama dia mbetsha wekelo wa Bible tshondo y’etshina kahomba kimanyiya nkumbo dia monga la lonyuma la wolo. Ɛnɔmbɔdi efula wa nkumbo wekɔ lo mbeka biukubuku y’oyoyo Wɛ Kokaka Monga Ɔngɛnyi wa Nzambi! kâmɛ l’anawɔ weke tɔkɛndakɛnda. Kɛsɔ ayowakimanyiya dia monga la diɔtɔnganelo di’ɔngɛnɔngɛnɔ ndo dia shikaa la Jehowa. Ambutshi le, nyetshake ananyu woho wa vɔ mbidja yimba lo tokanyi taki Nzambi. Nyɔkɛnɛmɔlɛ ngandji kawokanyu ndo kokanyu etsha wakinde. (Osam. 103:2) Nyokambe kâmɛ dia ndjadjɛ eyango wa lo nyuma ndo kotsha eyango akɔ ndo dia ndjasha tshɛ dia kambɛka Jehowa.
3 Ɔtɛkɛta waki Nzambi ngamulaka mboka kaso: Takangɛnangɛna efula dia nongola dibuku di’oyoyo Prɔfɛsiya k’Isaya—Osase Dikambo di’Anto Tshɛ Vɔlimɛ 1 (lo Falase). Polo lende amboyokoma la wadielo wa vɔlimɛ ya ntondo nyɛ na? Dibuku di’Isaya mbewoyaka woho wayolanya Nzambi wedja wa kɔlɔ ndo diɔ tɛkɛtaka di’ɛtshɔkɔ w’amɛna efula wayela Diolelo ekambi waki Nzambi. (Is. 34:2; 35:10) Lâdiko dia lâsɔ, diɔ keketshaka mbetawɔ ndo ɛ̂kamelo le Jehowa ndo lo woho wasalande akambo.—Is. 12:2-5.
4 Lam’ayoyotadiaka Prɔfɛsiya k’Isaya ka 1, wɛ koka nembetɛ oma ko tshate woho wakatshikala Isaya la kɔlamelo le Jehowa kânga mbakandadingama l’anto wakatshaka awui wa kɔlɔ. Etena kakandalongola leeta la monga ɔkɛndji waki Nzambi, Isaya akakadimola ate: “Dim’one, utumi.” (Is. 6:8) Naka wɛ kana yimba lo yimba y’okitanyiya yaki lande, kete dikambo sɔ diayokokeketsha dia wɛ tetemala la sambisha lokumu l’ɔlɔlɔ ndo ndjasha lo lietɛ “omenyi le wedja tshe.”—Mat. 24:14.
5 Naka sho mbidja yimba l’elimu wa diambo waki Jehowa, kete tayotombolaka woke woke wakinde. Lâsɔ, nyɛsɔ tɔshi diɛsɛ diele laso dia monga wanɛ wakitanyiya ɔtɛkɛta waki Nzambi la nɛmɔ!