Totetemale la sambisha!
1 Lolango laki Nzambi ele di’‘anto tshɛ shimbamela ndo ndjala la ewo k’oshika.’ (1 Tim. 2:4) Diakɔ diakandatosha ɔkɛndɛ wa sambisha lokumu l’ɔlɔlɔ. (Mat. 24:14) Naka sho mbeya bonde kahombaso tetemala la sambisha, kete ndoko ɔkɔmwɛlɔ kana awui amɔtshi wokoki mbekola yimba wayotoshimba dia sho tetemala la kamba olimu ɔsɔ.
2 Lande na kahombaso tetemala? Awui kana tɔkɛnyɔ efula ta l’andja ɔnɛ konyaka anto dia vɔ mbohɛ kana monga la wendjodi l’akambo wasambishaso. Diakɔ mbele sho la dia tetemala mbaohola losango laki Nzambi la panda. (Mat. 24:38, 39) Ndo nto, nsɛnɔ y’anto yekɔ lo tatshikitana lushi la lushi. Kânga akambo wa l’andja ɔnɛ kokaka tshikitana lo shashimoya l’otsho wamɛ. (1 Kor. 7:31) Loyi, lomingu layaye, kana ngɔndɔ kayaye, anto wakatasambisha mbeyaka ndjohomana l’ekakatanu kana ekiyanu ekina w’eyoyo wakoka ndjatshutshuya dia mpokamɛ lokumu l’ɔlɔlɔ lawaewoyaso. Onde wɛ kema la lowando lo etete kaki l’Ɔmɛnyi wa Jehowa wakaye dia ndjokosambisha akambo wa mɛtɛ?
3 Yoho ya mbokoya kɛtshi kaki Nzambi: Jehowa ambokikɛ edja efula la ntondo ka nde mbela elanyelo le anto wa kɔlɔ. Oma lo tshimbo yaso, nde ekɔ lo tetemala kotola anto w’etema ɔlɔlɔ dia vɔ kadimɔ otsha le nde woho wa kondja panda. (2 Pet. 3:9) Sho koka nkolama onongo wa dikila naka hatewoyisha anto losango la kɛtshi laki Nzambi ndo hatowaewodi lo kɛnɛ kendana l’elanyelo kayela Nzambi le wanɛ tshɛ wahetawɔ tshika mboka yawɔ ya kɔlɔ. (Ezek. 33:1-11) Kânga mbele aha tena tshɛ mbatetawɔka anto esambishelo kaso dimɛna, hatohombe pondjo nɛmba dia sala tshɛ woho wa kimanyiya anto wele l’etema w’ɔlɔlɔ dia vɔ mandola kɛtshi k’efula kele la Nzambi.—Etsha 20:26, 27; Romo 12:11.
4 Tɛnya ngandji kaso: Jehowa Nzambi, mbakadjanga oma lo tshimbo ya Yeso Kristo dia lokumu l’ɔlɔlɔ sambishama lo nkɛtɛ k’otondo. (Mat. 28:19, 20) Kânga lam’atona anto amɔtshi dia tohokamɛ, tekɔ la diaaso dia mɛnya ngandji ndo omamemelo aso le Nzambi lo tetemala sala kɛnɛ kele ɔlɔlɔ.—1 Joa. 5:3.
5 Nyɛsɔ tɔshi yɛdikɔ ya tetemala la sambisha! Tosale dikambo sɔ l’ohetoheto etena kekeso lo ‘lushi la panda’ laki Jehowa.—2 Kor. 6:2.