Tɔsɛngiya t’oma le anyayɛ ndo diɛsɛ diele layɛ dia sambisha
1 Shɛngiya y’oma le anyayɛ kokaka kotshutshuya la wolo tshɛ l’akambo w’ɔlɔlɔ kana wa kɔlɔ. Ekambi wa Jehowa w’asekaso wekɔ la shɛngiya y’ɔlɔlɔ le so, yatotshutshuya l’elimu w’Akristo w’ɔlɔlɔ. (Heb. 10:24) Koko, ase nkumbo kaso wele bu Ɛmɛnyi wa Jehowa, asekaso wa l’olimu, wa la kalasa, asukanyi aso kana anto akina weyana la so kokaka totshutshuya dia ndjela kɛnɛ kahɔtɔnɛ la lɔsɛnɔ l’Okristo. Vɔ kokaka tɛkɛta la ‘diɔnyɔ dikambo dia lɔkɛwɔ laso l’ɔlɔlɔ lendana la Kristo.’ (1 Pet. 3:16) Ngande wakokaso ndjashikikɛ dia tetemala la sambisha oyadi kânga lam’ahomanaso la tɔsɛngiya ta kɔlɔ t’oma le anyaso na?
2 Ase nkumbo kaso: Mbala mɔtshi, omi kana ombutshi wa pami wele bu Ɔmɛnyi wa Jehowa mbeyaka tona dia wadɛnde kana anande tomba l’esambishelo. Kɛsɔ mbakatombe lo nkumbo kɛmɔtshi ka lo wodja wa Mexique. Wadi aki pami kɛmɔtshi kâmɛ la ana awɔ esambele wakeke akambo wa mɛtɛ. Ntondotondo, pami kɛsɔ akatone nɛ dia nde konangaka dia nkumbo kande tasambishaka ndo takahanyaka abuku walembetshiya Bible lo luudu la luudu. Nde akɛnaka di’olimu ɔsɔ akashishɛka nkumbo kawɔ nɛmɔ. Koko wadɛnde l’anande wakakukutɛ yɛdikɔ yawɔ ya kambɛ Jehowa ndo ya sambishaka mbala la mbala. L’edjedja ka wonya, pami kɛsɔ akayotatɛka la mɛna ohomba wa mbetawɔ ekongelo kaki Nzambi kendana l’olimu w’esambishelo ko nde lawɔ akayoyakimɔka le Jehowa. Nde akayetawɔka akambo wa mɛtɛ paka l’ɔkɔngɔ w’ɛnɔnyi 15. Onde pami kɛsɔ otokoka ndjɔsa yɛdikɔ shɔ otondoyala nkumbo kande kotetemala la nkukutɛ diɛsɛ diawɔ dia sambisha?—Luka 1:74; 1 Kor. 7:16.
3 Wanɛ wakamba la yɛ Olimu: Asekayɛ wa l’olimu mbeyaka tona kɛnɛ katayɛ kânga mbadjayɛ weolo dia mbâsambisha. Kadiyɛso kɛmɔtshi akate ate: wonya wakatombe tamanu lo bilɔ lo dikambo di’ekomelo k’andja, wakawɔnyɔla efula lam’akandatɛ asekande wa l’olimu dia mbadia Mateu tshapita 24. Koko, nshi ngana l’ɔkɔngɔ wa lâsɔ, osekande ɔmɔtshi la womoto la l’olimu akawotɛ ate dimi lakatadia tshapita yakɔ ko lakambe efula. Kadiyɛso akawosha okanda ɔmɔtshi, ndo akɔshi yɛdikɔ ya mbeka la mama kɛsɔ nde l’omɛnde Bible. Wekelo wa ntondo wakakome polo ndo l’eshidi ehende w’otsho. L’ɔkɔngɔ wa vɔ mbeka mbala ka sato, mama kɛsɔ l’omɛnde wakamɛ mbɔtɔ lo nsanganya, ndo kombeta edja, vɔ wakatshike ɔnwɛlɔ wa mfɔka ndo wakatatɛ sambisha. Onde dui sɔ diotosalema otondonga kadiyɛso kɛsɔ kombidja weolo wa mbewoya elongamelo kaso le anto akina?
4 Asekaso wa la kalasa: Mbala efula Ɛmɛnyi wa Jehowa weke ɛlɔngɔlɔngɔ l’esekaseka mongaka la tɔsɛngiya t’oma le anyawɔ wa la kalasa ndo mbokaka wɔma ɔnɛ ɛlɔngɔlɔngɔ kana esekaseka ekina wayowaɔnyɔla lo woho wetetawɔ dia tasambishaka. Osekaseka ɔmɔtshi w’Okristo wa lo wodja w’États-Unis wele l’ɛnɔnyi dikumi l’ɛmɔ akate ate: “Lakokaka wɔma sambisha ɛlɔngɔlɔngɔ ekina nɛ dia lakoka wɔma nte wayɔmbɔla.” Ɔnkɔnɛ, nde kokamba la waaso wakandakondja dia sambisha asekande wa la kalasa ndo wa lo lɛtshi lande la nkɛtɛ. Ngande wakokayɛ monga la wolo wa shika tanga la ntondo ka tɔsɛngiya t’oma le anyayɛ na? Yaɛkɛ le Jehowa ndo yangaka woho wa mbetawɔma le nde. (Tuk. 29:25) Ngɛnangɛna l’akoka wele layɛ wa kamba l’Ɔtɛkɛta waki Nzambi. (2 Tim. 2:15) Osekaseka wakatatɛkɛtshi dikambo diande, akatatɛ nɔmba Jehowa ekimanyielo woho wa nde monga la dihonga dia sambisha anyande wa la kalasa. Nde akatatɛ sambisha lo tshakitudi la kalasa, akakondja etombelo w’ɔlɔlɔ ndo akayongaka suke dia sambisha oseka onto tshɛ lakandeyaka. Nde akayotaka ate: “Ɛlɔngɔlɔngɔ l’esekaseka ɛsɔ wekɔ l’ohomba w’elongamelo ka lo nshi yayaye, ndo Jehowa ekɔ lo kamba la so dia mbâkimanyiya.”
5 Asukanyi aso: Sho koka monga l’asukanyi kana l’anto akina wekesanɛ la so watomalɛ yema l’ɔtɛ wa kɛnɛ keso ndo wa kɛnɛ ketawɔso. Naka wɛ mbokaka wɔma wa kɛnɛ kafɔnyawɔ, kete yambola wate: ‘Onde vɔ mbeyaka akambo wa mɛtɛ watɔla otsha lo lɔsɛnɔ la pondjo? Ahombami sala dia munanda etema awɔ?’ Omendji ɔmɔtshi w’otshimbedi akɛnyi dia sho koka kondja etombelo w’ɔlɔlɔ etena kasambishaso asekaso naka sho mbewɔ mbâsambisha awui efula mbala kakɔ ɔtɔi. Tɔlɔmbɛ Jehowa dia nde tosha wolo ndo yimba yele laso ohomba dia tetemala la nyanga anto wele l’etema w’ɔlɔlɔ.—Fil. 4:13.
6 Naka sho mbetawɔ nkɔ lo tɔsɛngiya ta kɔlɔ t’oma le anyaso, kete atunyi aso mbeyaka ngɛnangɛna. Ko naka sho sala ngasɔ, onde ayonga lo wahɔ awɔ woleki kana wakiso? Yeso akalɔshama oma le anto wa lo wodja ande hita. Ndo anango w’otema ɔtɔi wakawɛnya pâ koko nde akakikɛ. Nde akeyaka ɔnɛ ndoko woho okina wakokande mbâkimanyiya ele paka tetemala la sala kɛnɛ kakotome Nzambi. Diakɔ diele Yeso “akayashikike l’atei w’omonyodi wa kolo lu dikambu diandi.” (Heb. 12:2, 3) Sho la dia sala woho akɔ wamɛ. Yashikikɛ dia mbetɛ diɛsɛ diayɛ dia sambisha lokumu la Diolelo dikambo dioleki ohomba. Lo sala ngasɔ, “we ayuyashimbela, ndu we ndu wane wuka aui aye.”—1 Tim. 4:16.