Ambutshi​—⁠nyɔkɔkɔmiya mbekelo y’ɔlɔlɔ l’etema w’ananyu

¹ Onto hotɔ la mbekelo y’ɔlɔlɔ oma l’otema, ndo hatoyikondja oko lo shaba. Ndo nto, di’onto kɔkɔmiya mbekelo y’ɔlɔlɔ l’etema w’anande bu dikambo dia lushi ɔtɔi. “Kɔkɔmiya” kɛdikɛdi “mbetsha yema yema” kana “mbɔtshiya awui lo wɔɔngɔ yema yema.” Ɔnkɔnɛ, ambutshi pombaka monga l’etete woho wa vɔ mbeya “[mbodia anawɔ] lu elembe la lu wetshelu wa [Jehowa].”​—⁠Ef. 6:⁠4.

² Nyotate kam’ekewɔ ashashi: Akɛnda wekɔ l’akoka wa diambo wa mbeka ndo wa sala akambo w’eyoyo. Kânga mbele mbala efula epalanga mongaka l’okakatanu dia mbeka ɔtɛkɛta w’oyoyo, ana lo wedi awɔ, kanga wanɛ wele watakotsha ɛnɔnyi wa mbɔtɔ kalasa kokaka mbeka ɛtɛkɛta ehende kana esato mbala ɔtɔi. Tɔfɔnyake pondjo wate lam’ele ɔnayɛ eke dikɛnda efula, nde atakoke monga la mbekelo y’ɔlɔlɔ. Naka wɛ tatɛ kɔlɔ̂mɔ ndo tetemala mbetsha ɔna akambo wa mɛtɛ wa lo Bible, kete lam’ayondola, wɔɔngɔ ande wayolola l’ewo kayowokonya ‘kanga lomba dikambo dia panda.’​—⁠2 Tim. 3:⁠15.

³ Nyônge la mbekelo ka tombaka l’esambishelo: Mbekelo kɛmɔtshi k’ɔlɔlɔ kahombanyu kɔkɔmiya l’etema w’ananyu lam’ekewɔ totshitshɛ ele ka sambishaka mbala la mbala lokumu l’ɔlɔlɔ la Diolelo diaki Nzambi. Ambutshi efula tatɛka sala dikambo sɔ lo tombaka l’anawɔ l’esambishelo ka luudu la luudu etena kekewɔ totshitshɛ efula. Woho watomba ambutshi mbala la mbala l’olimu w’esambishelo kimanyiyaka anawɔ dia vɔ ngɛnangɛna ndo monga la waasaso l’olimu ɔsɔ. Ambutshi kokaka mɛnya anawɔ woho wakokawɔ sambishaka lo luudu la luudu kana lo toho tokina.

⁴ Mbafundja nkombo lo Kalasa k’Olimu wa Teokrasi kimanyiyaka nto ana. Tɔ mbaetshaka mbekelo y’ɔlɔlɔ ya wekelo, ndo woho wa mbadiaka la eokelo k’ɔlɔlɔ. Vɔ mbekaka woho wa sawola l’anto awui wa lo Bible, sala waendelo w’eyoyo, ndo mbeka l’anto Bible. Wetshelo wa ngasɔ mbeyaka mbasha mposa ka kamba olimu w’ombatshi mboka ndo kondja waɛsɛ wa lânde w’olimu. Ase Bɛtɛlɛ ndo waa misiɔnɛrɛ efula mbohɔka la ngandji k’efula nshi yakawatatɛ ndjadja lo kalasa kɛsɔ ndo vɔ kiɔsaka oko ehomɔ kakakimanyiya dia vɔ monga la mbekelo y’ɔlɔlɔ.

⁵ Sho tshɛ tekɔ oko diwomba l’anya w’Okengi wa Woke, Jehowa. (Is. 64:⁠8) Diwomba dia wɔdu wɔdu mboleki wɔdu mbodikenga. Lam’ayakame diwomba, mbayadialeke monga wolo. Ngasɔ mbele anto. Lam’ekewɔ akɛnda, mbekende wɔdu mbakenga, mbut’ate naka ambutshi tatɛ mbetsha anawɔ mbekelo y’ɔlɔlɔ l’etena kɛsɔ, kete wayoyokondja etombelo w’amɛna efula. L’ɛnɔnyi wekewɔ akɛnda mbahombama mbaetsha, etena kayomɛ dionga di’ɔlɔlɔ kana dia kɔlɔ tomba sɛkɛ. Oko weyɛ ombutshi wa shikaa, tatɛ kɔ̂lɔmɔ la kɔkɔmiya l’etema w’anayɛ mbekelo y’ɔlɔlɔ l’olimu w’Okristo.