Mukanda w’oma le Olui-Walɔmbɔla
SHO mɛtɛ tekɔ la diɛsɛ! Oko weso Ɛmɛnyi wa Jehowa, sho mbeyaka Jehowa, Nzambi ɔtɔi ka mɛtɛ kasɛna, Otungi w’andja w’otondo, ndo tekɔ lo mbokambɛ ndo mɛmba lokombo lande. Onde ekɔ diɛsɛ dimɔtshi dioleki sɔ oka?—Isa. 43:12; Heb. 8:11.
Tekɔ l’elongamelo ka panda ndo takalongola ɔkɛndɛ wa sambisha lokumu l’ɔlɔlɔ la Diolelo, woho w’anto akina ndjokoma lo tɛmɔla Jehowa ndo monga ndo vɔ lawɔ l’elongamelo kele laso. (Mat. 24:14; Romo 10:13, 14; 1 Tes. 5:8) Tekɔ nto l’ɔngɛnɔngɛnɔ dia kenga nkumbo ka l’andja w’otondo k’atɛmɔdi wele la ngandji lam’asawɔ ndo wakimanyiyana. Ande ɔngɛnɔngɛnɔ lee!
Bible toshaka leeta lɔnɛ lasungana mɛtɛ ɔnɛ: “Nyukambelaki [Jehowa] olimu l’ongenongeno. [. . .] Nyotoki l’asuku w’etemwelo kandi la lusaka, ndu lu aseke andi la diandu! Nyuwukaki lusaka, nyutumbulaki lukumbu landi, ne dia [Jehowa] eli ololo! Ngandji kandi ka shikaa katuyalaka pundju, ndo kolamelu yandi le wa lu nonga tshe.” (Osam. 100:2-5) Dia kambɛ Jehowa l’ɔngɛnɔngɛnɔ, sho pombaka monga la diɔtɔnganelo di’ɔlɔlɔ lam’asaso lande ndo kokɛ diɔtɔnganelo diakɔ. Woho wetawɔ Nzambi dia sho monga la diɔtɔnganelo di’ɔlɔlɔ lam’asaso la nde ekɔ tshondo ya diɛsɛ le so. Naka sho monga la diɔtɔnganelo dia ngasɔ lam’asaso la nde, kete tayeya dia nde ekɔ wonya tshɛ suke dia tokimanyiya ndo tokeketsha etena tshɛ keso l’ohomba w’akambo asɔ. Sho tekɔ l’eshikikelo dia nde ayotosha wolo ndo ɛlɔmbwɛlɔ ka lo nyuma keso l’ohomba dia tondoya ekakatanu wa lo lɔsɛnɔ lo nshi nyɛ y’ekomelo ka dikongɛ nɛ di’akambo. Oyadi ekakatanu akɔna wahomana laso, sho tekɔ lo kamba olimu aso l’ɔngɛnɔngɛnɔ ndo sho kawoyaka Jehowa losaka lushi tshɛ, oko watohola Ɔtɛkɛta ande ɔnɛ ‘nde ndjakiyanyaka dikambo diaso.’—1 Pet. 5:7.
Ɔnɔnyi wetshi, Jehowa akatɔtshɔkɔla efula. Lo nsanganya ya distrikɛ “ Wanɛ Wakitanyiya Ɔtɛkɛta Waki Nzambi,” takasangana l’ɔngɛnɔngɛnɔ la nunu di’atɛmɔdi wele la mbetawɔ k’oshinga wolo oko sho dia memba ndo ndotshama lo mɛsa wa lo nyuma waki Jehowa. Lo wekelo aso wa dibuku, takakeketsha mbetawɔ kaso lam’akateke kamɛ dibuku Prêtons attention à la prophétie de Daniel! (He Dja Yimba lo Prɔfɛsiya ka Danyɛlɛ!) Ndo lâdiko di’akambo asɔ tshɛ, taki l’ɔngɛnɔngɛnɔ wa nongola vɔlimɛ 1 ya dibuku La prophétie d’Isaïe, lumière pour tous les humains. (Prɔfɛsiya k’Isaya—Osase Dikambo di’Anto Tshɛ 1) Dikɔhɔ diaso diekɔ lo fukɔfukɔ mɛtɛ.—Osam. 23:5.
Ekɔ mɛtɛ ɔngɛnɔngɛnɔ dia mbeya ɔnɛ tambosangana la miliyɔ y’anangɛso l’akadiyɛso wa lo nyuma l’olimu waki Jehowa! Kema sho keketshamaka lo menda lofulo loleki tshɛ l’anto wakayasha l’olimu w’esambishelo? Tekɔ nto l’ɔngɛnɔngɛnɔ dia mɛna dia miliyɔ y’anto wakɔtɔ lo losanganya la Eohwelo ka nyɔi ka Nkumɛso, kânga mbambolola andja ɔnɛ l’ekakatanu. Mɛnamaka dia l’andja w’otondo ‘Dinela diekɔ woke.’ (Luka 10:2) Ɔnɔnyi wetshi, lomingu tshɛ yɛdikɔ ya l’atei atei y’ambeki wa Bible 5555 wakayakimɔka le Nzambi lo batizama l’ashi. Ekɔ mɛtɛ dia dinela diekɔ woke efula lo wedja ɛmɔtshi oleki lo wedja ekina, koko tekɔ lo ngɛnangɛna kɛnɛ tshɛ kasala Jehowa. Ɔsɔ ekɔ djembetelo ya mɛtɛ mɛtɛ yɛnya dia nde ekɔ lo tshɔkɔla welo wadja ekambi ande kâmɛ.
Wokelo wa Mbalasa ya Diolelo ekɔ kiɔkɔ kina y’ɔngɛnɔngɛnɔ w’efula wele laso. Tekɔ l’ɔngɛnɔngɛnɔ dia mɛna di’anangɛso l’akadiyɛso wa lo wedja wa wola wekɔ lo sukɛ olimu ɔsɔ l’otema ɔtɔi. Nkama ya Mbalasa ya Diolelo yamboshila mbikama l’ekimanyielo k’anangɛso l’akadiyɛso wa l’elui wa wanɛ waka Mbalasa ya Diolelo, wakalakanyema olimu ɔsɔ yoho ya dimɛna efula. Anangɛso asɔ wekɔ lo takindola etshumanelo l’etshumanelo ka lo wodja awɔ dia nɔmbɔla olimu ɔsɔ. Lam’ele teke l’ohomba wa nunu dia Mbalasa ya Diolelo, tambɔlɔmba anangɛso l’akadiyɛso wa lo wedja wele kema l’ekondjelo k’efula dia vɔ ndeka ndjasha la lolango lawɔ woho wa mbisha lonya l’olimu w’ohomba ɔsɔ. Naka wɛ ekɔ lo wedja ɛsɔ, onde wɛ hakoke mbisha lonya l’olimu ɔsɔ? Anangɛso l’akadiyɛso wekɔ l’ɔngɛnɔngɛnɔ dia monga la Mbalasa ya Diolelo yawɔ hita dia tɛmɔlaka Nzambi. Vɔ wekɔ la lowando efula le anangɛwɔ l’akadiyɛwɔ tshɛ wa l’andja w’otondo wakimɔ falanga yawɔ di’olimu ɔsɔ kambema.
Nsango yalongolaso lo kɛnɛ kendana l’etshumba watatadje l’awui wa laka lɛɛta tokeketshaka, koko l’ahole efula anto wa lokumu nangaka shisha ɔtɛmwɛlɔ wa Jehowa. Lo tena dia ngasɔ, sho nongamɛka aha la tamu dia kondja ekimanyielo kaki Nzambi, nɛ dia nde kimanyiyaka ekambi ande oyadi atunyi awɔ wekɔ anto wa woho akɔna. (2 Ek. 14:11) Tekɔ lo mandola anangɛso l’akadiyɛso tshɛ wamamema ɔtɛmwɛlɔ wa mɛtɛ la wolo tshɛ.
Etena kɛnɛ kenyu lo mɛmba ɛkɛndɛ anyu w’Akristo l’ɔngɛnɔngɛnɔ tshɛ, nyotetemale la keketsha mbetawɔ kanyu, ndo ndjaɛkɛ tshɛ le Jehowa ndo nyanga ɛlɔmbwɛlɔ kande. (Tuk. 3:5, 6) Oyadi kânga Jehowa akatshike atunyi aso dia vɔ sala kɛnɛ kasalawɔ, sho hatohombe nkɔmɔ etema. Nyohɔ ɛtɛkɛta w’ekeketshelo wakatɛ Elisha okambi ande waki la wɔma ate: “Tukaki woma, ne dia wane weli la su ndeka waku weli la wo efula.” (2 Khum. 6:15-17) Oko wakidiɔ lo nshi y’Elisha, mbele polo ndo nshi nyɛ, alembe wa l’olongo waki Jehowa wekɔ suke dia mamɛ ɔtɛmwɛlɔ wa mɛtɛ. Tekɔ lo kongɛ nshi yayaye y’ɔngɛnɔngɛnɔ l’eshikikelo tshɛ, nɛ dia Jehowa mbokime akambo tshɛ l’anya ande, ndo wedja hawokoke sɛmanɛ la nde. Nde akahenya Ɔnande l’okudi ndo akawosha lowandji tshɛ. “Wane tshe watekamaka le ndi, wayongenangenaka.”—Osam. 2:1-6, 12.
Anangɛso l’akadiyɛso le, tanyohɛke dia sho nyohɔka la ngandji tshɛ. Tekɔ lo nɔmba l’otema ɔtɔi dia nyu tshɛ monga ‘kokele ndo la mbetawɔ ka nge lo kɛnɛ kendana la lolango tshɛ laki Nzambi.’—Kol. 4:12.
Anagɛnyu, Olui-Walɔmbɔla w’Ɛmɛnyi wa Jehowa