L’Eyango akɔna wahombaso tayalɔngɔsɔdi?
1 Sho tshɛ tokanyiyaka yema lo kɛnɛ kendana l’eyango aso wa lo nshi yayaye. Wanɛ wele l’elongamelo ka sɛna la nkɛtɛ wekɔ lo kongɛ dia ndjɔsɛna pondjo pondjo l’andja w’oyoyo waki Nzambi wele la losembwe. Koko ekɔ tɔsɛngiya tɔmɔtshi takoka toshishɛ elongamelo kɛsɔ ka shikaa. Lâsɔ, ekɔ ohomba sho ndjakimɔ tshɛ l’elimu wendana la Diolelo diaki Nzambi ndo menda di’aha nsaki ya demba ndjotoshishɛ oyango aso.—1 Joa. 2:15-17.
2 Anto wa l’andja ɔnɛ hawokoke shihodia eyango wele l’anto wayasha tshɛ l’akambo wa lo nyuma. (1 Kor. 2:14) Etena kɛnɛ kasala anto akina la wolo dia kondja lokumu, lowandji kana ɔngɔnyi, sho tekɔ lo ndjâketembola dia nyanga ɛngɔnyi wa lo nyuma. (Mat. 6:19-21) Naka sho pemba mbɔsa nshi yayaye oko wayiɔsa as’andja ɔnɛ, onde tayokotsha eyango aso wa lo nyuma? Akambo wa l’andja ɔnɛ mbeyaka ndola esadi eto l’etema aso. Ngande wakokaso mbewɔ dikambo sɔ na?
3 “Nyolote Khumadiondjo Jesu Kristu”: Yoho mɔtshi ya shikikɛ dia kana eyango aso wa lo nshi yayaye mendanaka paka la wahɔ kana l’elimu wa Diolelo ele sɛdingola asawo wakiso. Onde sho tɛkɛtaka esangɔ l’esangɔ paka akambo wendana la lomombo la l’emunyi ndo la wahɔ wa l’andja ɔnɛ? Naka eelo, kete sho pombaka menda dia kana otema aso hawoyoyasha tshɛ l’akambo wa lo nyuma. Sho koka monga l’ohomba w’efula wa ‘ndɔta Nkumadiɔndjɔ Yeso Kristo lo dihole dia ndjandjɛ eyango wendana la nsaki ya demba.’—Romo 13:14.
4 Ɛlɔngɔlɔngɔ koka ‘ndɔta Kristo’ lo ndjalɔngɔsɔla dia ndjokamba olimu wa lo tena tshɛ lushi lɔmɔtshi. Ɔlɔngɔlɔngɔ ɔmɔtshi wakalange monga ombatshi mboka wa pondjo akole lo dihole diakalekaka ɛlɔngɔlɔngɔ ndjasha dia monga l’ekondjelo k’efula. Ɔnkɔnɛ, nde akayoyashaka efula l’akambo w’okanda polo ndo lo yɛdikɔ ya nde ɔtɔka lo nsanganya ndo otombaka l’esambishelo oko l’etema ehende. Lam’akandatatɛ ndjaɛkɛ l’ɛtɛkɛta waki Yeso watanema lo Mateu 6:33 ndo wakandatshike tshelo ya salaka akambo paka ɔnɛ kawotake, nde akayomɛka kamba olimu wa lo tena tshɛ. Ɛlɔ kɛnɛ, nde ekɔ lo kambɛ Jehowa la nkum’otema k’ɔlɔlɔ oko watande ndamɛ ate ‘la wolo ande tshɛ.’
5 Bible mbutaka dia ekɔ dui dia lomba monga l’eyango wendana la nshi yayaye. (Tuk. 21:5) Nyɛsɔ sho tshɛ tosale dikambo sɔ lo mbidja lolango laki Nzambi lo dihole dia ntondo.—Ef. 5:15-17.