Mbɔtwɛlɔ ya Wɔdu Yekɔ l’Etombelo w’Amɛna Efula
1 Lande na kele mbala efula apandjudi wêke akɛnda kotolaka yambalo ya wanɛ wasambishawɔ losango la Diolelo? Ɔkɔkɔ ɔmɔtshi ele, vɔ tɛkɛtaka ɛtɛkɛta wa wɔdu. Apandjudi amɔtshi mbeyaka fɔnya ɔnɛ dia sambisha dimɛna pombaka tɛkɛta la diewo di’efula dia mbɔtshiya sawo. Koko, kɛnɛ keta mɛnyaka dia mbɔtwɛlɔ ka wɔdu ndo kokɛma hwe ndeka dimɛna.
2 Yeso akasambisha Diolelo diaki Nzambi l’ɛtɛkɛta wa wɔdu, wokɛma hwe, ndo wasembɔ tɔɔ lo dikambo ndo nde aketsha ambeki ande dia vɔ sala woho akɔ wamɛ. (Mat. 4:17; 10:5-7; Luka 10:1, 9) Nde akakambe la mbɔtwɛlɔ, wembola ndo bɛnyɛlɔ dia wɔdu dia kotola yambalo y’ampokami ande ndo dia munanda etema awɔ. (Joa. 4:7-14) Sho pombaka mbokoya ɛnyɛlɔ kande ndo salaka mbɔtwɛlɔ yokɛma esadi eto.
3 “Lokumu l’ololo lone la diolelo” mbele losango lahombaso mbewoya. (Mat. 24:14) Naka wɛ kamba la Diolelo oko ɔtɛ ayɛ wa sawo, kete mbɔtwɛlɔ yayɛ yayongaka wɔdu. Tɛkɛta akambo wendana l’ampokami ayɛ. Wamato kotɔmaka mbala efula l’akambo wendana la nkumbo yawɔ oleki akambo wa pɔlitikɛ. Ombutshi wa pami ndeka ndjakiyanya di’olimu ande ndo di’ekokelo ka nkumbo kande. Ɛlɔngɔlɔngɔ kotɔmaka l’asawo wendana la nshi yawɔ yayaye, esombe w’anto kotɔmaka l’akambo wendana la yonge ya dimɛna ndo l’ekokelo kawɔ. Mbala efula anto ndjashaka efula l’akambo weta lo ngelo kawɔ oleki lo kɛnɛ keta lo wedja wa tale. L’ɔkɔngɔ wa wɛ sawola la wɔ akambo wakotola yambalo y’anto tshɛ, kotola yambalo yawɔ l’ɛtshɔkɔ wayokondja anto w’okitanyiya l’ɛlɔmbwɛlɔ ka Diolelo diaki Nzambi. Ɛtɛkɛta engana eto wa wɔdu ndo wɔsɔnami dimɛna sanganya la divɛsa dimɔtshi koka monga yoho yoleki ɔlɔlɔ ya kotola yambalo y’ompokami ayɛ.
4 Wɛ koka tatɛ sawo lo mbuta ɔnɛ:
◼ “Aha la tamu wɛ mbetawɔka dia anto wekɔ lo diɛnɛ la weho wa hemɔ efula yahakɔnɔ. Ko onde wɛ mbeyaka dia Nzambi ambolaka dia kem’edja nto nde ayanga minya weho wa hemɔ tshɛ ndo nyɔi?” Tshikande akadimole, oma lâsɔ kowɛ mbadia Enyelo 21:3, 4.
5 Lo sala mbɔtwɛlɔ yokɛma hwe ndo ya wɔdu, wɛ kokaka munanda tomba ndo etema w’anto efula wa l’ɛtshi kayɛ ka nkɛtɛ ndo mbakimanyiya dia vɔ mbeka akambo wendana la Jehowa ndo woho wa vɔ monga l’elongamelo ka kondja lɔsɛnɔ la pondjo.—Joa. 17:3.