Toyalɔngɔsɔlɛ ‘Dimɛna ndo aha l’Ofukutanu’

¹ Dia losanganya la distrikɛ mbeta dimɛna, paka sho mbidja welo kâmɛ. Anɔmbɔdi wa losanganya nyangaka dihole dia dimɛna diahomba losanganya salema ndo ahole wahomba anto ndjohanga. Elui w’anto ndo nkumbo nɔngɔsɔlaka lɔkɛndɔ lawɔ ndo kongɛka woho wa tɔsɛna lo pango. Ndo tshumanelo nɔmbɔlaka welo w’anto wa lɔkɔ wakayakimɔ la lolango dia kamba l’adepartɛma efula wahombawɔ ekimanyielo lo losanganya. Oyango wa dui sɔ ele di’‘akambo tshɛ salema dimɛna ndo aha l’ofukutanu.’​—⁠1 Kor. 14:⁠40.

² Dia wɛ mbidja welo ayɛ kamɛ la wa wanɛ walɔngɔsɔla losanganya, tohɛke dia ekɔ ohomba ndjalɔngɔsɔla l’edja ka ngɔndɔ kana mbala mɔtshi k’ɛnɔnyi. Nkama y’anangɛso mbetshaka wenya efula dia nɔngɔsɔla akambo. Kɛsɔ mendanaka l’ahole wa ndowɛ, tshumanya dihomɔ, ndo nyanga wanɛ wahomba kamba olimu. Ɛlɔngɔswamelo wasalema la ntondo ɛsɔ mbelaka anto tshɛ ɛtshɔkɔ wa lo nyuma. Ahombaso sala dia mbisha lonya na?

³ Tonge Angɛndangɛna Wele la Loshilambo: Sho nangaka kamba kamɛ la wanɛ washa anto pango. Naka tamboyalɔngɔsɔla dia todjasɛ laka nkumbo k’ɛmɔtshi k’Akristo, kete tatshi la ntondo di’aha vɔ mbidja lokombo laso l’ɔnɔngɔ wa wanɛ wayowosha pango. Naka takalɔmbɛ pango ko tambokikondja laka nkumbo kɛmɔtshi, kete sho pombaka nɛmiya ekongelo kɛsɔ. Hatokoke ndjotshikitanya akambo l’ekomelo ndo ndjokana l’onto okina. Sala ngasɔ koka kɔmɔla etema waki anangɛso watolongola dia vɔ ndjosala dikambo sɔ lo nshi yayaye. Amɔtshi wa l’atei aso wele l’ewotɔ lo ngelo kasalema losanganya koka ndeka nanga totshikala kamɛ lawɔ. Kɛsɔ ekɔ diaaso dia dimɛna dia mbâsambisha akambo wa mɛtɛ ndo dia mbaeta oya lo losanganya. Ndo nto, dikambo sɔ kimanyiyaka dia tshika ahole efula laka anangɛso woho wa nongola wanɛ waya lo losanganya hawotɔ ndoko l’onto l’osomba wasalema losanganya.

⁴ Naka wambotosha pango laka nkumbo kɛmɔtshi, tatoshake ɔnangɛso wotsho lo tetemala la tshikala naka losanganya lamboshila. Lam’adjasɛso l’anangɛso, sho pombaka nɛmiya diangɔ diawɔ ndo aha mbɔtɔ l’akambo awɔ. Oko weso angɛndangɛnda, hatohombe munanda kana kamba la mashinyi, abuku ndo diangɔ dikina aha la dikimɔ dia kanga ngelo. Woho akɔ wamɛ kele kema dimɛna mbɔtɔ lo mvudu kina ya lo lokombo. Sho pombaka menda ɔlɔlɔ dia ndo ana aso nɛmiya akambo asɔ. Tonge la dilɛmiyɛlɔ lo mbewɔ mbidja londjo l’efula, tɛkɛta la dui dia wolo, sakanya nkuke la wolo ndo akambo akina.

⁵ Naka tambonga la diɛsɛ dia kondja pango laka anangɛso, kete hatohombe monga tshondo ya wotsho le wɔ. Vɔ kema l’ɔkɛndɛ wa kotsha ehomba aso wa l’emunyi paka kana vamɛ mbolangi sala dikambo sɔ. Onto tshɛ pombaka momba akuta wahombama ndo tasadi ɛlɔngɔswɛlɔ la ntondo ka ndja lo losanganya woho wa ndjolesha nkumbo kande ndo akuta wa ndjosala akambo akina. Ɔnangɛso ɔmɔtshi akasondja etenyi kɛmɔtshi k’ɛtshi kande ka nkɛtɛ woho wa futa lɔkɛndɔ l’otsha lo losanganya ndo wa tokotsha ehomba ekina. Nde aki suke dia nshisha efula woho wa tɔtɔ lo losanganya ndo di’aha monga wotsho le ɔnɛ lakolongola.

⁶ Naka wambotosha Mbalasa ka Diolelo dia panga, kete sho pombaka monga la dilɛmiɛlɔ lo kɛnɛ tshɛ katanema lɔkɔ. Hatonga dimɛna mbeta onto okina dia ndjodjasɛ laso lo mbalasa aha la kondja dikimɔ dia wanɛ washana pango. Mbalasa pombaka tshikalaka pudipudi ndo aha l’ofukutanu. Anto tshɛ pombaka nɛmiya lotshungɔ l’anto akina la mumuya lo mbewɔ asawo wa polo ndo l’otsho w’efula. Pombaka nima atala lo wonya wakoka. Onto tshɛ ekɔ l’ohomba wa mumuya dimɛna dia monga la wolo lo losanganya la wedi a pindju. Kam’ashila losanganya mbalasa pombaka tshikala hwe dia tshumanelo diasangana lɔkɔ tatɛ l’elimu awɔ. La ntondo ka tshika mbalasa, nyoyashikikɛ dia tɔ kekɔ pudipudi ndo aha l’ofukutanu dia mɛnya dilɛmiɛlɔ le anangɛso ndo kɛnɛmɔ le Nzambi katɛmɔlaso.​—⁠1 Pet.1:​15, 16.

⁷ Oko weso ekambi waki Nzambi, tekɔ la diaaso dia kɛnɛmɔla lonto lande lo kɛnɛ tshɛ kasalaso. Kɛsɔ nembetshiyaka dia sho la dia ndjalɔngɔsɔlaka dia mbɔtɔka lo nsanganya ya weke lɛnɛ atɛkɛtawɔ dia lokombo laki Nzambi. Tohɔke dia nde kema “[Nzambi k]a ufukutanu, keli eko [Nzambi k]a ki.” (1 Kor. 14:33) Ɔnkɔnɛ, nyɛsɔ toyashikikɛ di’anto tshɛ watenda mɛna dia tekɔ la dionga sɔ diaki Jehowa lo lɔkɛwɔ laso ndo l’etsha aso otsha le anto akina etena kayalɔngɔsɔlaso ndo kɔtɔso lo Losanganya la Distrikɛ “Embetsha w’Ɔtɛkɛta wa Nzambi.” Tambolongamɛ di’anto watenda wele l’etema w’ɔlɔlɔ koma lo mɛna dia olui w’anto waki Jehowa wotshumanyi ndjakongɛ ‘dimɛna ndo aha l’ofukutanu.’​—⁠1 Kor. 14:40; Osam. 68:⁠26.