Oyango Akɔna Wele Laso?
1 Lande na kekaso Bible l’anto lawakawɔ na? Onde paka dia mbasha ewo ka shikaa, ndowanya nsɛnɔ yawɔ, kana mbaɔmbɔla wɛɔngɔ lo kɛnɛ kendana la nshi yayaye? Kema. Oyango aso woleki tshɛ ele wa mbakonya ambeki waki Yeso Kristo! (Mat. 28:19; Etsha 14:21) Omalɔkɔ mbele anto weka laso pombaka sanganaka la etshumanelo. Ohamelo awɔ wa lo nyuma nemanɛka la woho wayowoshihodia ɔlɔngɔswamelo w’Akristo dimɛna.
2 Woho Wakokaso Kotsha Oyango Akɔ: Oma k’etatelo, keketshaka ombeki wa Bible dia nde mbɔtɔka lo nsanganya ya l’etshumanelo. (Heb. 10:24, 25) Lembetshiyande woho wele nsanganya yakɔ yayokeketsha mbetawɔ kande, yayowokimanyiya dia sala lolango la Nzambi, ndo mbokimanyiya dia monga la lɔngɛnyi la dimɛna l’anto akina wele vɔ lawɔ kombolaka dia tombola Jehowa. (Esam. 27:13; 32:8; 35:18) Yoho yayoyɛnya wɛmɛ dia wɛ ekɔ la ngandji ndo la lowando l’etshumanelo ndo lo nsanganya mbayofudia nsaki kande dia nde mbɔtɔka lo nsanganya yakɔ.
3 Eyoyo pombaka shihodia dia ɔlɔngɔswamelo waki Jehowa wekɔ wa nkumbo k’anto l’ɔnango ka l’andja w’otondo. Ɛnyawɔ bandɛ vidɛo Les Témoins de Jéhovah: un nom, une organisation ndo Our Whole Association of Brothers. (Tshunda di’Otondo di’Anangɛso) Kimanyiyawɔ dia vɔ shihodia dia Jehowa ekɔ lo kamba la miliyɔ y’anto wamboyakimɔ le nde dia kotsha lolango lande. Ewoya eyoyo akɔ dia vɔ lawɔ nɔmbamaka dia kambɛ Nzambi.—Is. 2:2, 3.
4 Ekɔ ɔngɛnɔngɛnɔ heyama dia mɛna onto leka laso Bible ambokoma ombeki wa mɛtɛ waki Yeso. Ɔsɔ mbele oyango wakiso!—3 Joa. 4.