Woho wa Mbisha Anto Dibuku Ewo
Okime Bible l’anya, tatɛ mbuta wate: “Tekɔ lo tasawola l’anto wa lo shinga yanyu ɛlɔ lo kɛnɛ kendana la kanyi yele lo divɛsa dimɔtshi dia lo Bible. Diɔ mbutaka ate . . . ” Adia Joani 17:3, oma lâsɔ ko wɛ mombola wate: “Onde wɛ akɛnyi kɛnɛ kambowotolaka naka sho kondja woho w’ewo kahombama? [Tshikande akadimole.] Lende akoka onto tana woho w’ewo kɛsɔ?” L’ɔkɔngɔ w’okadimwelo, ɛnyande dibuku Ewo ndo ta wate: “Dibuku nɛ mɛnyaka ewo katɔla otsha lo lɔsɛnɔ la pondjo. Diɔ salaka ngasɔ lo kadimola lo wembola wele l’anto efula lo kɛnɛ kendana la Bible.” Ɛnyande ɛtɛ w’awui ndo mbolande dia kana ekɔ ɔtɛ a dui ɔmɔtshi wele nde amboyambolaka lushi lɔmɔtshi lo dikambo diakɔ.
“Onde wɛ atayambolaka dia kana mɛtɛ Nzambi ndjakiyanyaka dikambo dia wɛngiya ndo di’asui wasowa anto wotodingi kana wakahomana laso kana shamɛ? [Tshikande akadimole.] Bible toshikikɛka dia Nzambi tolangaka ndo nde ayotokimanyiya lo tena dia pâ.” Adia tenyi dimɔtshi di’Osambu 72:12-17. Fola dibuku Ewo lo tshapita 8, ndo ɛnya dia diɔ mbishaka okadimwelo wakeketsha lo wembola wayambola miliyɔ y’anto ɔnɛ Lande na katshika Nzambi asui? Naka kokaka, nyɔkɛtshanya tokanyi tɔmɔtshi t’oma l’Afundelo tele l’odingɔ 3 polo 5, kana nyu ndjosala dikambo sɔ lo wendelo w’oyoyo.
“Efula ka l’atei aso wambovushaka anto amɔtshi wokawɔ ngandji. Onde wɛ atayambolaka dia kana tokɛnana la wɔ nto? [Tshikande akadimole.] Yeso akate dia wakiso wa ngandji koka la tshungɔ oma lo nyɔi. [Adia Joani 11:11, 25, 44.] Kânga dikambo sɔ diakasalema deko aha nɛ, diɔ mɛnyaka kɛnɛ kakatolake Nzambi.” Fola dibuku Ewo l’osato wele lo lɛkɛ 85, ndo adia kɛnɛ kofundami ladiko w’osato akɔ. Oma lâsɔ, ko wɛ mbɛnya osato wele lo lɛkɛ 86, ndo mbisha kɔmatɛrɛ lɔkɔ. Lɔngɔsɔla wendelo w’oyoyo lo mboka wombola ɔnɛ: “Onde wɛ ayolanga mbeya lande na katshunda anto ndo kavɔwɔ?” Kokawole dia nyu ndjɔkɛtshanya tshapita 6.
“Onde wɛ atakanyiyaka lande na kakombola anto monga la lɔsɛnɔ l’otale?” L’ɔkɔngɔ w’okadimwelo, fola dibuku Ewo lo tshapita 6 ndo adia odingɔ 3. Kana la nde yimba l’avɛsa woshilami. Lo kamba la wembola ehende wele l’ekomelo k’odingɔ, mbola onto akɔ kana nde nangaka kondja ekadimwelo. Naka nde mbetawɔka, kete nyɔkɛtshanya edingɔ ɛmɔtshi engana wayela.
“Tekɔ lo mimbola anto dia kana vɔ mbetawɔka dikambo nɛ . . . ” Adia Etatelo 1:1, oma lâsɔ ko wɛ mombola wate: “Onde wɛ mbetawɔka ɛtɛkɛta ɛsɔ?” Naka nde mbaetawɔka, tɛnde wate: “Ndo dimi lawɔ mbaetawɔka. Ko onde wɛ fɔnyaka dia lam’ele Nzambi mbakatonge diangɔ tshɛ lâsɔ nde mbele nto lo kiɔkɔ y’awui wa kɔlɔ?” L’ɔkɔngɔ wa wɛ mboka woho wokadimudinde, adia Undaki 7:29. Fola dibuku Ewo lo tshapita 8, ndo adia odingɔ 2. Naka onto hetawɔ kɛnɛ kele lo Etatelu 1:1, lɔmbande dia nyu sɛdingola kɛnɛ kɛnya ɔnɛ Otungi ekɔ.—Enda lo dibuku Comment raisonner, lɛkɛ 72-75.
“Onde wɛ hɛnyi dia tekɔ l’ohomba w’ɛlɔmbwɛlɔ k’oshika lo menda woho wele ɛlɔ kɛnɛ ɛlɛmbɛ wendana la lɔkɛwɔ wekɔ lo tatshikitana esadi esadi? [Tshikande akadimole.] Kânga mbediɔ dibuku diamboleka edja, Bible mbishaka alako w’ohomba wendana la lɔsɛnɔ la nshi nyɛ ndo dia lɔsɛnɔ l’ɔngɛnɔngɛnɔ la lo nkumbo.” L’ɔkɔngɔ diko fola dibuku Ewo lo tshapita 2 ko wɛ mbadia odingɔ 10 ndo ɔnɔngɔ wa ntondo w’odingɔ 11, ndo 2 Timote 3:16, 17.
“Onde wɛ nangaka mbeya kɛnɛ kambowotombɛ ndo kayokomɛ nkɛtɛ kɛnɛ lo nshi yayaye? [Tshikande akadimole.] Bible tɛkɛtaka lo tshena pe lo dikambo dia nshi yayaye lo tshɛkɛta tshɔi nyɛ—Paradiso! Lo paradiso mbakadje Nzambi atshukanyi wa ntondo l’ɔkɔngɔ wa nde mbatonga. Tende woho watotɛwɔ lo kɛnɛ kendana la woho waki paradiso kakɔ.” Fola dibuku Ewo lo lɛkɛ 8, ko wɛ mbadia odingɔ 9, l’ɛse k’ɔtɛ a dui wahɔnyi wata ɔnɛ: “Lɔsɛnɔ la lo Paradiso.” Oma lâsɔ ko nyu kɛtshanya awui wele l’odingɔ 10, ndo mbadia divɛsa di’Isaya 55:10, 11 dioshilami. Lɔmbande dia nyu nyomɔkɛtshanya awui wendana la woho wayoyala lɔsɛnɔ lo paradiso kambolwama oma l’odingɔ 11-16.