Mukanda W’oma Le Olui-walɔmbɔla
Oko wambotɔtɔ l’ɛnɔnyi w’etatelo wa ntambe ka 21, tambɔngɛnangɛna dia nyofundɛ nyu, ‘tshunda di’otondo di’anangɛso’ dia l’andja w’otondo, ndo dia nyândola l’olimu wa wolo wakambanyu. (1 Pet. 2:17) Ambeta suke l’ɛnɔnyi 2000 wele Yeso akambola ate: “Lam’ayuya On’a untu, ndi ayutana mbetawo la kete?” (Luka 18:8) Woho wakanyakambe olimu l’ohetoheto l’ɔnɔnyi wetshi kadimolaka lo wombola waki Yeso ɔsɔ la dui dia wolo tshɛ ɔnɛ eelo! Amɔtshi l’atei anyu, wakɔnywama ndo wakɔsama oko anto w’anyanya l’ɔtɛ wa mbetawɔ kanyu. L’ahole efula, nyu nyakatetemala l’atei w’ata, wa hemɔ, kana wa ndjala ya kasha. (Luka 21:10, 11) Oma l’ohetoheto anyu l’elimu w’ɔlɔlɔ, Yeso akakoke “tana mbetawo la kete.” Lo mɛtɛ, ɔngɛnɔngɛnɔ wekɔ l’olongo l’ɔtɛ wa dikambo sɔ!
Sho mbeyaka dia mbikikɛ kema dikambo dia wɔdu. Tende ehemba wakahomana l’anangɛso wa lo wodja ɔmɔtshi w’Asie wa l’edjelo ka wonya. Ɛmɛnyi wa Jehowa wekɔ lo pɛnyahɛnyama mbala la mbala lo wodja ɔsɔ. Atete edja, apulushi wakashimbe anangɛso dia tetemala la losanganya lɔmɔtshi laki l’anto oko 700 lakawasalaka lo wɔladi tshɛ. Vɔ wakashimbe nto anto akina 1300 wakalangaka mbɔtɔ lo losanganya. Olui w’anto wakakombe ɛtɛ awɔ di’aha vɔ mbaeya, wele amɔtshi l’atei awɔ waki apulushi wakahongomɔ lo dihole dia losanganya, wakakɔmɔla anto efula wakaye lo losanganya, ndo wakatshumbe diangɔ tshɛ diakahombe kambema ladiɔ lo losanganya lakɔ. Lo waaso akina, as’ɛtɛmwɛlɔ wanɛ walanga mbela etshikitanu lo kamba l’awui wa ngala wakakɔmɔla anangɛso woho w’anyanya la fimbo yele la tɛtshi ta mbolo lo tokoma tayɔ.
Ɛhɛnyɔhɛnyɔ wa ngasɔ mbishaka kandji koko vɔ bu akambo wa diambo le so. L’ekimanyelo ka nyuma k’ekila ɔpɔstɔlɔ Paulo akafunde ate: “Wane tshe walanga ndjala la lumu l’ololo le Kristu Jesu, wayusuwa.” (2 Tim. 3:12) Lo ntambe ka ntondo, Akristo wakakikɛ tɛngɔ, lɔsɔkɔ ndo ɛhɛnyɔhɛnyɔ wa lo demba, ndo amɔtshi wakadiakema ndo ndjakema. (Etsha 5:40; 12:2; 16:22-24; 19:9) Ɔsɔku mbakidiɔ ndo lo ntambe ka 20, ndo aha la tâmu dikambo sɔ diayotetemala ndo lo ntambe ka 21. Koko Jehowa totɛka dia: “Ehumo tshe kambutshulama dia ndo la [nyu] holowana.” (Is. 54:17) Ɔsɔ mɛtɛ ekɔ eshikikelo ka dimɛna efula! Mɛtɛ, sho tekɔ la nɛmɔ efula lo washo wa Jehowa, diakɔ diakandate lo tshimbo y’omvutshi ande Zekariya ate: ‘Ɔnɛ lanyonanda, ambonanda ɔna sso diami.’ (Zek. 2:8) L’ekomelo, atunyi w’atɛmɔdi wa Jehowa wayɔlɛndjama. Ɔtɛmwɛlɔ wa mɛtɛ wayodja otshumba!
Ɛnyɛlɔ, lo wodja wakatatɛkɛtshi la diko ongo, Ɛmɛnyi wa Jehowa wakakonya mfulo hiende y’eyoyo y’apandjudi l’ɔnɔnyi w’olimu wa 2001. Eelo, anangɛso l’akadiyɛso wa lo wodja ɔsɔ wekɔ lo tetemala kânga mbahɛnyahɛnyamawɔ, oko wasalema dikambo sɔ l’ahole tshɛ. L’ɔnɔnyi w’olimu wetshi l’andja w’otondo, yɛdikɔ y’anto 5066 wakabatizamaka lomingu tshɛ oko djembetelo ya ndjakimɔ kawɔ le Jehowa. Kakianɛ, eyoyo ɛsɔ wambɔsa yɛdikɔ kamɛ laso dia ‘monga kokele ndo la mbetawɔ ka nge lo kɛnɛ kendana la lolango tshɛ laki Nzambi’—Kol. 4:12.
Tende nto woho w’oma la mbeta akambo lo wodja wa Grèce. Kânga mbakawahɛnyahɛnyama wolo ɛnɔnyi efula oma le Ɛkɛlɛsiya w’Ɔrtɔdɔksɛ wa la Ngirika, Ɛmɛnyi wa Jehowa waya kakianɛ “ɔtɛmwɛlɔ weyama” le lɛɛta. Mukanda w’oma le lɛɛta wakewoya dikambo sɔ waki nto l’ɛtɛkɛta wɛnya dia Bɛtɛlɛ ka la Grèce “ekɔ dihole di’ekila, diambokitshama lânde dikambo dia tɛmɔlaka Nzambi.” Tekɔ nto l’ɔngɛnɔngɛnɔ dia nyewoya dia l’ɔnɔnyi w’olimu wetshi, tuminadi efula takewoya tɛdikɔ t’amɛna takɔshi lɛɛta lo kɛnɛ kendana l’ɔtɛmwɛlɔ aso l’Allemagne, la Bulgarie, lo Canada, l’États-Unis, lo Japon, lo Roumanie, ndo la Russie. Tekɔ lo mbisha Jehowa losaka efula mɛtɛ lo woho wambondotshika asoko w’olimu hwe lo wedja ɛsɔ!
Naka sho sɛdingola toho tasukɛ Jehowa ekambi ande lo nshi y’ekomelo nyɛ, kete tayɛna dia nde kele Ɔngɛnyi aso woleki dimɛna tshɛ. Tekɔ lo ngɛnangɛna diɔtɔnganelo diasaso la nde, lo mbeya dia nde tolangaka, tetshaka, ndo tongolaka. Eelo, tayotetemala pomana l’ehemba wendana la mbetawɔ kaso. Koko mbetawɔ ka nge le Jehowa ayotokokɛ. Jakɔba akafunde ate: “[nyoyale l’ɔngɛnɔngɛnɔ] tshe lam’ayunyutana wehu efula w’ehimba; nyeyi nyati: Ehimbelu ka mbetawo kanyu katutungaka etetemalu.” (Jak. 1:2, 3) Ndo nto, etetemalelo kaso mɛnyaka ngandji kaso otsha le Jehowa, ndo kɛsɔ telaka ɔngɛnɔngɛnɔ efula! Anangɛso wa ngandji le, nyonge l’eshikikelo dia Jehowa ayosukɛ ɔm’ɔmɔ la l’atei aso. Naka sho tshikala la kɔlamelo otsha le nde, kete lo weho tshɛ nde ayotokimanyiya dia mbɔtɔ l’andja w’oyoyo. Nde nangaka dia sho tondoya ehemba wahomana laso.
Omalɔkɔ, mbanyokeketshaso nyu anangɛso l’akadiyɛso, epalanga kana akɛnda, di’aha nyu mbohɛ dia ɛtshɔkɔ wa diambo efula wekɔ la ntondo kaso. Tongake la dionga diele oko nɛ diaki l’ɔpɔstɔlɔ Paulo lakafunde ate: “Dimi lambukana nti: Asui wa l’etena kene hawedima la lutumbu layenama le su l’okongo diku.” (Romo 8:18) Nyoyaɛkɛ le Jehowa lam’ahomananyu la weho w’ekakatanu tshɛ. Nyokikɛ, ndo tanyohekɔke. Nyu hanyonyangaki pondjo dikambo sɔ. Ɔtɛkɛta wa Nzambi toshikikɛka dia: “Untu ololo ayuyala la lumu uma lu mbetawo kandi.”—Hab. 2:4.
Anangɛnyu,
Olui-Walɔmbɔla w’Ɛmɛnyi wa Jehowa