Mbetawɔ Kaso Totshutshuyaka l’Elimu w’Ɔlɔlɔ
1 Mbetawɔ akatshutshuya Nɔa, Mɔsɛ ndo Rahaba dia sala akambo amɔtshi. Nɔa akasɛlɛ wato. Mɔsɛ akatone ɛngɛnɔngɛnɔ wa lo tshanda wa lɔsɛnɔ la lo luudu la Farawɔ. Rahaba akashɛ atɔpi ndo oma lâsɔ, nde akakitanyiya kɛnɛ kakawotɛ atɔpi akɔ ndo akewola ase nkumbo kande. (Heb. 11:7, 24-26, 31) Naa elimu w’ɔlɔlɔ watotshutshuya mbetawɔ kaso dia sala ɛlɔ kɛnɛ na?
2 Esambishelo: Mbetawɔ totshutshuyaka dia tɛkɛta akambo wendana la Nzambi kaso ka diambo ndo la tɛdikɔ tɔsande dikambo di’ɔngɛnɔngɛnɔ aso wa pondjo. (2 Kor. 4:13) Tena dimɔtshi, sho mbeyaka mboka wɔma dia sambisha. Koko, naka sho ‘kitshaka Jehowa la ntondo kaso wonya tshɛ,’ kete tayokeketshama ndo wɔma wele laso wayofumbɔ. (Osam. 16:8) Ndo nto, mbetawɔ kaso totshutshuyaka dia sambisha ase nkumbo yaso, asukanyi aso, anto wakamba laso, asekaso wa lo kalasa, ndo anto akina lokumu l’ɔlɔlɔ lo diaaso tshɛ diakoka.—Romo 1:14-16.
3 Sanganaka Kamɛ: Wɔtwɛlɔ wa mbala la mbala lo nsanganya ekɔ dikambo dikina di’ɔlɔlɔ diaya oma lo mbetawɔ. Lande na? Vɔ mɛnyaka eshikikelo kele laso k’ɔnɛ lam’asanganaso lo nsanganya y’Akristo, Yeso ekɔ kamɛ la so lo tshimbo ya nyuma k’ekila kaki Nzambi. (Mat. 18:20) Vɔ mɛnyaka nsaki kele laso ka ‘mpokamɛ kɛnɛ katɛ nyuma tshumanelo.’ (Eny. 3:6) Sho mongaka la yambalo efula lo wetshelo walongolaso, nɛ dia washo aso wa mbetawɔ tɛnyaka dia onto latetsha ko Ombetsha aso wa Woke, Jehowa.—Is. 30:20.
4 Ɛsɔnwɛlɔ Wasalaso: Eshikikelo ka wolo k’akambo wahɛnama totshutshuyaka dia mbetsha akambo wa lo nyuma lo dihole dia ntondo lo nsɛnɔ yaso. (Heb. 11:1) Kɛsɔ nembetshiyaka dia sho mbetawɔ ndjahombia diangɔ dia l’emunyi. Ɛnyɛlɔ, ekumanyi kɛmɔtshi akatone dia vɔ mbodiya lo dihole dia lâdiko l’olimu ande wa l’emunyi nɛ dia nde konanga dia mbetshaka nsanganya mɔtshi ya l’etshumanelo, nde kombetawɔ dia mangana la nkumbo kande edja, ndo nde konanga tshika olimu ande w’ombatshi mboka. L’ɛnyɛlɔ kande, nyɛsɔ toyaɛkɛ tshɛ l’eshikikelo kasha Bible dia Jehowa ayokotsha ehomba wa wanɛ ‘watetemala nyanga ntondo Diolelo ndo losembwe laki Nzambi.’—Mat. 6:33.
5 Shɛngiya ya wolo yele la mbetawɔ lo nsɛnɔ yaso mɛnamaka le anto akina. Eelo mɛtɛ, mbetawɔ kaso mbeyamaka l’andja w’otondo. (Romo 1:8) Lâsɔ, nyɛsɔ sho tshɛ tɛnyake oma l’elimu aso w’ɔlɔlɔ dia tekɔ la mbetawɔ kasɛna, mbut’ate kele l’etsha.—Jak. 2:26.