Onga Onto Leya Mbewoya Anto Akambo!
1 Dia sho kotsha olimu aso w’esambishelo ndo wa mbetɛ anto ambeki dimɛna , sho pombaka mbewoya anto akina awui weyaso. (Mat. 24:14; 28:19, 20) Mbewoya onto dikambo kokaka monga wolo kânga lam’asa angɛnyi. Kakɔna kakoka tokimanyiya dia sambisha anto wahateye lokumu l’ɔlɔlɔ naa?
2 Sala di’Onto LasawolaLayɛ Kɔsa oko Ɔngɛnyi: Hemba ndjadja lo dihole di’anto wahomana layɛ l’esambishelo. Lo menda woho waya andja ɔnɛ, sho mbokaka bonde kakoka anto amɔtshi kanɛ angɛndangɛnda kɔlɔ kana mbaoka wɔma. Dikambo sɔ kokaka mbidja wekamu lo wewoyanelo w’awui. Woho akɔna wokokiyɛ shidiya wɔma wele l’anto wahomana layɛ nɛ di’ekɔ mbala ka ntondo ka nyu pomana? La ntondo ka sho tondja kânga ɔtɛkɛta oma l’onyɔ, yoho mɔtshi yasawolaso l’anto ele oma l’ɛnamelo kaso ka kɔmba. Ɔlɔtɔ aso wa la kɔmba ndo nɛmɔ diayashaso kimanyiyaka di’aha anto toka wɔma efula.—1 Tim. 2:9, 10.
3 Ehomɔ kekina katokimanyiya dia mbewoya awui weyaso ele tɛkɛta lo yoho y’ɔlɔlɔ ndo la lɔngɛnyi tshɛ. Dikambo sɔ ngɛnyangɛnyaka anto ndo mbatshutshuyaka dia vɔ monga suke dia tohokamɛ. Dikambo sɔ nɔmbaka dia sho ndjalɔngɔsɔla dimɛna. Naka sho mbeyaka shikaa kɛnɛ kayangaso totɛ anto, kete hatotoka wɔma sawola lawɔ. Ndo dionga diaso dia wɔlamu sɔ kokaka kotola anto akina oya lo losango laso. Lo kɛnɛ kendana l’Ɔmɛnyi wa Jehowa ɔmɔtshi wakatshu la towenda, mama kɛmɔtshi akate ate: “Kɛnɛ kohɔmi lo dikambo di’ɔmɔnɔmɔnɔ waki lande l’elongi ele nde aki la ki ka lo yimba. Dui sɔ diakakotola yambalo yami.” Kɛsɔ mbakasha womoto ɔsɔ diaaso dia nde pokamɛ lokumu l’ɔlɔlɔ.
4 Waonga Wakotola Yambalo y’Anto Watɛkɛta la So: Sho pombaka ndjasha l’otema ɔtɔi le anto akina. (Fil. 2:4) Yoho mɔtshi ya sala dikambo sɔ ele aha sho mamamala l’ɔtɛkɛta. Lo mɛtɛ, sawola l’onto nembetshiyaka nto mbohokamɛ la yambalo tshɛ. Etena kashaso anto wasawola la so ɔtɛkɛta ndo kahokamɛso l’otema ɔtɔi kɛnɛ katawɔ, vɔ mbokaka dia sho ndjakiyanyaka dikambo diawɔ. Lâsɔ naka ampokami ayɛ wekɔ lo tɛkɛta, tosakake lokomba dia mbuta kɛnɛ kakayatalɔngɔsɔdi. Andolawɔ l’otema ɔtɔi naka kokaka ndo ona dia kotsha lo kɛnɛ kotshiwɔ. Naka awui watawɔ mɛnyaka kɛnɛ kele l’etema awɔ, kete ɔtɔnganyiya sawo diayɛ la kɛnɛ kɔtɛkɛtshiwɔ.
5 Yimba ya ndjakitshakitsha nɔngɔsɔlaka sawo. (Tuk. 11:2; Etsha 20:19) Anto wakayakaka oya le Yeso dikambo dia nde aki la “memakana la ndjakitshakitsha l’utema.” (Mat. 11:29) Lo wedi okina, dionga dia lotamanya hatshutshuya anto akina dia tɔtɔ lo demba. Ɔnkɔnɛ, kânga mbeyaso shikaa dia sho mbele l’akambo wa mɛtɛ, sho mbewɔka l’ɔlɔlɔ tshɛ di’aha tshutshuya anto dia mbetawɔ la wolo kɛnɛ kataso.
6 Ngande wayotosala naka onto ambototɛ awui wele hawɔtɔnɛ la kɛnɛ ketsha Bible na? Onde tekɔ l’ɔkɛndɛ wa mbowongola? Eelo, koko hatokoke sala dikambo sɔ naka ekɔ mbala ka ntondo ka sho sawola la nde. Mbala efula tongaka dimɛna sho sawolo lo tokanyi tambotosanga l’ompokami aso lolemi la ntondo ka sho mbewoya wetshelo wa lo Bible wokokinde mboka wolo mbetawɔ. Dikambo sɔ tɔlɔmbaka dia monga la solo dia lotutsha ndo la yewo. Paulo akasha ɛnyɛlɔ ka dimɛna efula lo dikambo sɔ lam’akandasambisha Toshushi ta l’Arɛɔpango.—Etsha 17:18, 22-31.
7 Lâdiko di’akambo asɔ tshɛ, ngandji kaha la lokaki kokaso anto kayotokimanyiya dia sho monga anto weya sawola dimɛna l’anto akina. L’ɛnyɛlɔ kaki Yeso, sho pombaka mboka anto ‘wahɛnyahɛnyama ndo wele bu l’ekimanyielo wele oko ɛkɔkɔ waha l’onami’ kɛtshi. (Mat. 9:36) Dikambo sɔ totshutshuyaka dia mbaɛmbɛ lokumu l’ɔlɔlɔ ndo mbakimanyiya dia tana mboka k’otsha lo lɔsɛnɔ. Losango laso lekɔ losango la ngandji, lâsɔ nyɛsɔ totetemale liewoya anto la ngandji tshɛ. Naka tayosalaka ngasɔ, kete tayokoyaka Jehowa Nzambi nde la Yeso Kristo—Anto woleki mbeya mbewoya anto akambo.