Tewoya Akambo wa Mɛtɛ Wendana la Yeso
1 Akristo w’akitami w’esɔ wakimanyiyama oma le anyawɔ ɛkɔkɔ ekina, ‘wekɔ lo sambisha awui wendana la Yeso.’ (Eny. 12:17 ) Ɔsɔ ekɔ olimu w’ohomba efula, nɛ dia paka lo tshimbo yande mbele panda.—Joa. 17:3; Etsha 4:12.
2 ‘Mboka, Mɛtɛ, la Lɔsɛnɔ’: Yeso akate ate: “Dimi leli mbuka, mete la [lɔsɛnɔ]. Nduku untu laya le Papa, tshikima uma le mi.” (Joa.14:6) Paka oma lo tshimbo ya Yeso, ɔnɛ lele “mbuka,” mbakokaso ndjasukanya le Nzambi lo dɔmbɛlɔ ndo monga la diokanelo di’ɔlɔlɔ lam’asaso la nde. (Joa. 15:16) Yeso ekɔ “mete” lo woho ɔnɛ wele prɔfɛsiya ya l’Afundelo wa lo Hɛbɛru ndo didjidji dia lo prɔfɛsiya yakɔ yakakotshama le nde. (Joa. 1:17; Kol. 2:16, 17) Lo mɛtɛ, oyango wa ntondo wa prɔfɛsiya ka mɛtɛ ele wa kimanyiya anto dia vɔ shihodia dimɛna ɔkɛndɛ wa woke wele la Yeso l’ekotshamelo ka sangwelo dia Nzambi. (Eny. 19:10) Lâdiko dia lâsɔ, Yeso ekɔ ‘lɔsɛnɔ.’ Dia kondja woshasha wa lɔsɛnɔ la pondjo, sho pombaka monga la mbetawɔ l’olambo ande wa tshungo.—Joa. 3:16, 36; Heb. 2:9.
3 Ɔtɛ ndo Nkumekanga Kolɛ: Anto pombaka mbeya nto ɔnɛ Jehowa amboshaka Ɔnande lowandji woho wa nde mendana l’anto wasekola ɛlɛmbɛ. Yeso akahenyama oko Nkumekanga ka lo Diolelo diaki Nzambi ndo ‘wedja tshɛ pombaka kitanyiya awui ande.’ (Etat. 49:10) Ladiko dia lâsɔ, Jehowa akɔ̂sɔnɛ oko Ɔtɛ w’etshumanelo. (Ef. 1:22, 23) Sho pombaka kimanyiya ambeki aso wa Bible dia vɔ shihodia woho walɔmbɔla Yeso etshumanelo ndo wakambande l’‘ɔhɔmbɔ wa kɔlamelo ndo wa kɛsɔ’ dia tosha “mbu ya nde [ya lo nyuma] lu tena diayo.”—Mat. 24:45-47.
4 Ɔlɔmbɛdi wa Lâdiko Wokana Kɛtshi: Oma l’ehemba ndo asui wakokomɛ lam’akinde oko onto, Yeso ‘aya l’akoka wa kimanyiya wanɛ wahembama.’ (Heb. 2:17, 18) Oko wewɔ kema kokele, etema w’anto munandemaka efula etena kekawɔ dia Yeso mbaokaka kɛtshi lo wɛɔdu awɔ ndo mbatɛkɛtɛlaka la ngandji tshɛ! (Romo 8:34) Oma l’olambo wa Yeso ndo oma l’elimu ande w’Ɔlɔmbɛdi wa Lâdiko, sho kokaka ndjasukanya le Jehowa la “dihunga” tshɛ dia sho kondja ‘ekimanyielo l’etena keso latɔ ohomba.’—Heb. 4:15, 16.
5 Weolo wadjaso dia mbewoya anto akina akambo wa mɛtɛ wendana la Yeso awatshutshuya dia vɔ monga l’okitanyiya le nde ndo sangana la so dia mbôkambɛ.- Joa. 14:15, 21.