Waewoyelo

◼ Ekanda wayotosha anto Ngɔndɔ ka Sato: Dibuku Ewo Katɔla Otsha lo Lɔsɛnɔ la Pondjo. Welo wa lânde wayodjama dia tatɛ mbeka l’anto Bible lawakawɔ. Ngɔndɔ ka Nɛi la ka Tanu: Tshoto y’Etangelo la Réveillez-vous! Apandjudi pombaka mbewoya atɛkɛtshi dia vɔ kokaka kimɔ yema ya woshasha dia sukɛ olimu aso wakambema l’andja w’otondo naka vɔ nangaka. Lam’akalolayɛ dia tembola anto wakɛnya wahɔ, sala la wolo dia mbasha dibuku Tɛmɔla Nzambi Ɔtɔi ka Mɛtɛ. Pombaka mbidja welo wa lânde dia tatɛ mbeka l’anto Bible, djekoleko naka amɔtshi wamboshilaka la mbeka dibuku Ewo ndo biukubuku Kakɔna Katɔlɔmba Nzambi?

◼ Apandjudi wakombola kamba oko ambatshi mboka wa tshanda lo Ngɔndɔ ka Nɛi pombaka ndjalɔngɔsɔla oma ko kakianɛ ndo kawoya adɛmandɛ awɔ la wonya. Kɛsɔ ayokimanyiya dikumanyi dia sala ɛlɔngɔswɛlɔ wahombama dikambo di’esambishelo ndo dia monga l’ekanda k’ɔlɔlɔ ka periodikɛ la ekanda ekina wahombama. Pombaka mbewoya etshumanelo nkombo y’anto tshɛ wambetawɔma dia kamba oko ambatshi mboka wa tshanda.

◼ Bɛtɛlɛ hatɔlɛmiya kɔmandɛ k’ekanda kosadi opandjudi nde ndamɛ. Omendji-walɔmbɔla pombaka nɔngɔsɔla dia diewoyelo mbishama la ntondo ka tomɛ Bɛtɛlɛ kɔmandɛ k’ekanda k’etshumanelo woho w’onto tshɛ lalanga kondja ekanda ande ndamɛ mbisha ɔnangɛso lendana l’awui w’ekanda kɔmandɛ kande. Tanyohɛke dikambo di’ekanda watɔlɔmbamaka paka lo yoho ya lânde.

◼ Naka nyambolongola mukanda oma lo Bɛtɛlɛ watomɛwɔ olui wa dikumanyi, omendji-walɔmbɔla ayowofola ndo mbâdia. Oma lâsɔ, ko nde mbisha sekeletɛrɛ, lele l’ɔkɔngɔ wa nde lawɔ shidiya mbadia mukanda ɔsɔ, nde ayosha dikumanyi diotshikadi. L’ɔkɔngɔ wa vɔ tshɛ mbadia, ekumanyi tshɛ ayosha kanyi yande. Naka nyayosala ngasɔ, kete olui wa dikumanyi tshɛ wayeya kɛnɛ kofundami lo mukanda.

◼ Dibuku Kondja Wahɔ oma lo Kalasa k’Olimu wa Teokrasi diekɔ lo nɔngɔswama l’ɛtɛkɛta tshɛ wakadimwama Tshoto y’Etangelo wa lo wodja aso. Tshumanelo diele watadilongola, hawotoshaka sawo diendana la ‘Waonga w’Ɔtɛkɛtshi’ diele l’ekongelo ka Kalasa k’Olimu wa Teokrasi ndo ‘Sawo No. 1’ diayoshamaka l’edja ka minitɛ 15 lo dihole dia minitɛ 10 oko wodiɛnyishawɔ l’ekongelo. Diɔ diayokumiya la sala ngasɔ naka wambolongola dibuku Kalasa k’Olimu.