Kânga Akanga wa Dikɔmɔ Kondjaka Etombelo w’Ɔlɔlɔ
1 Naka wɛ ekɔ l’atei w’Ɛmɛnyi wa Jehowa efula wele la dikɔmɔ, kete eya dia wɛ kokaka kondja etombelo w’ɔlɔlɔ l’olimu w’esambishelo. Lâsɔ, pâ yele layɛ mbeyaka kosha waaso wa lânde wa wɛ sambisha ndo keketsha anto akina.
2 Waaso wa Sambisha: Anto efula wele la dikɔmɔ sambishaka efula. Ɛnyɛlɔ, kadiyɛso kɛmɔtshi kele la pâ dia tɛkɛta ndo kɛndakɛnda l’ɔtɛ w’epaso wakawosale akɛnyi dia nde kokaka mbisha lonya l’okahanyelo wa periodikɛ naka omɛnde ayemadjaka mutuka awɔ l’omamu wa mboka. Lushi lɔmɔtshi nde akasha anto periodikɛ 80 lo wenya wa tango ehende eto! Pâ ka lânde kele layɛ koka kokonya la ntondo k’anto wele dia wɛ mɛnana la wɔ ekɔ dikambo dia wolo. Naka ngasɔ, kete ɔsawɔ oko mbilo kayɛ ka lânde.
3 Wɛ koka kondja etombelo w’ɔlɔlɔ efula oma l’esambishelo kayɛ! Etena kɛna anto akina eshikikelo kayɛ ndo etombelo w’ɔlɔlɔ wele l’awui w’oma lo Bible lo lɔsɛnɔ layɛ, vɔ koka kotɔma lo losango la Diolelo. Ndo nto, etena kahomanayɛ l’anto wele la pâ, awui wamboyɛna lo lɔsɛnɔ kokaka kokimanyiya dia wɛ mbakeketsha oma l’ekimanyielo k’Ɔtɛkɛta wa Nzambi.—2 Kor. 1:4.
4 Wɛ Koka Keketsha Anto Akina: Onde wɛ kokeketshama oma l’ɔkɔndɔ wa lɔsɛnɔ laki Laurel laki la hemɔ ka muyɛkɛ lakadjama lo mashinyi wakimanyiya anto dia pɛnga dimɛna welɛwɔ poumon d’acier ɛnɔnyi 37 lakakimanyiya anto 17 dia vɔ kondja ewo k’oshika k’oma lo Bible? Woho akɔ wamɛ, ɛnyɛlɔ kayɛ koka keketsha anyayɛ ambetawudi dia vɔ ndjasha tshɛ l’olimu waki Jehowa.—g93 22/1 lɛkɛ 18-21.
5 Kânga mbele pâ kele layɛ koshimbaka dia wɛ sambisha efula oko wakombolayɛ, wɛ koka keketsha anto akina. Ɔnangɛso ɔmɔtshi akate ate: “Dimi lakeke dia kânga onto lele l’ɛkɔmɔ ka woke koka monga ekimanyielo ka woke le anto akina. Dimi la wadɛmi takonge oko osukɔ le anto efula wa l’atei w’etshumanelo. L’ɔtɛ wa pâ yaki laso sho takatanemaka wonya tshɛ la ngelo, ndo taki wonya tshɛ suke dia pokamɛ kɛnɛ kalangawɔ totɛ.” Koko, mbokɛmaka dia l’ɔtɛ w’ɛkɔmɔ kele layɛ wɛ hatongaka wonya tshɛ suke dia sambisha lo yɛdikɔ yɛdimi l’ohetoheto ayɛ. Lâsɔ, naka wɛ kondja yema y’ekimanyelo, kete wɛ ayonga l’akoka wa sambishaka efula. Ɔnkɔnɛ, naka wɛ ekɔ l’ohomba wa yema y’ekimanyielo, kete tengengake dia mbewoya dikumanyi kana as’etshumanelo wakoka kokimanyiya.
6 Jehowa mɛnaka kɛnɛ tshɛ kasalayɛ dia mbokambɛ, ndo nde ngɛnangɛnaka olimu wokambɛyɛ l’anima ayɛ tshɛ. (Osam. 139:1-4) Naka wɛ ndjaɛkɛ le nde, kete nde ayokoka kosha wolo dia wɛ sambisha dimɛna ndo kondja etombelo w’ɔlɔlɔ.—2 Kor. 12:7-10.