Onde Pasiɔ Mbishaka Onto Diaaso dia Fudia Olimu Ande?

¹ Efula ka wanɛ wakamba olimu wa wolo wekɔ lo kongɛ l’asolo walomɔlomɔ dia pasiɔ mbatshungola oma l’asui l’ekakatanu w’oma l’elimu awɔ wa l’emunyi. Mbala efula, pasiɔ konyaka onto dia monga la wendjudi, l’ekakatanu ndo dia tshunda esadi. Naka onto aya bu l’olimu w’ɔlɔlɔ wa kamba, kete dui sɔ koka mbokonya lo nde ndjakiyanya efula lo dikambo diande. Lo wedi okina, ambutshi amɔtshi waya esombe kokɛka ekana awɔ ndo ana akina etena kele ambutshi w’anasɔ wakatatombe dungu saso la nyanga falanga. Dui sɔ hadioshidiya ekakatanu wa lo lɔsɛnɔ.

² Koko, Akristo efula mɛnaka dia pasiɔ mbashaka diaaso dia fudia olimu awɔ wa lo nyuma. Naka anawɔ waya epalanga mbakimanyiya, kete dui sɔ diayowasha diaaso dia kamba olimu ɔsɔ. Ɔnangɛso ɔmɔtshi lakatatɛ kamba olimu w’ombatshi mboka mingu hiende l’ɔkɔngɔ wa nde kotsha ɛnɔnyi 65 akate ate: “Lo lɔsɛnɔ lami, ndoko lushi lamomolongola ɛtshɔkɔ efula oko wɛnɛ wamomolongola lo ɛnɔnyi dikumi wetshi wokambimi olimu w’ombatshi mboka.” Atshukanyi amɔtshi wakafunde ɔnɛ: “Ɛnɔnyi aso woleki amɛna ele wɛnɛ wakatatatɛ kamba olimu w’ombatshi mboka.” Eelo, le anto efula pasiɔ mbashaka diaaso dioleki dimɛna dia vɔ fudia olimu awɔ w’esambishelo ndo kondja ɛtshɔkɔ efula oma le Jehowa.

³ Nyotetemale ndjasha l’Esambishelo ndo Nyɔtɔ Elowa: Anto efula wambolongola pasiɔ ɛlɔ kɛnɛ wakole lo lɔsɛnɔ la pâ ndo wakeke dia kamba olimu efula lo nshi yakiwɔ weke akɛnda. Kânga mbele ondo vɔ waya bu la wolo waki lawɔ lo nshi y’ɔlɔngɔlɔngɔ kana y’osekaseka, vɔ wâkatetemala kondja etombelo w’ɔlɔlɔ l’olimu awɔ. Lo mbilo ka filialɛ kɛmɔtshi, pursa 22 y’anto wekɔ ambatshi mboka ndo l’atei awɔ tekɔ la yɛdikɔ y’anangɛso l’akadiyɛso 20 000 waya l’ɛnɔnyi oko 60. Epalanga ɛsɔ wekɔ lo mbisha ekimanyielo kawɔ l’olimu w’esambishelo. Diewo ndo waonga w’ɔlɔlɔ wele lawɔ kimanyiyaka tshumanelo diele lɛnɛ akambawɔ.​—⁠Jak. 3:​17, 18.

⁴ Tetemala ndjasha l’olimu w’esambishelo mbakimanyiyaka dia monga la yonge ndo la yoho ya lɔsɛnɔ y’ɔlɔlɔ. Kadiyɛso kɛmɔtshi kaya l’ɛnɔnyi 84 kakatatɛ kamba olimu w’ombatshi mboka lam’akandalongola pasiɔ akate ate: “Monga l’ambeki wa Bible efula wayasha kimanyiyakami dia monga la yimba y’osalosalo. Dimi bu la mutuka, ɔnkɔnɛ dimi kɛndakɛndaka efula. Dui sɔ mbishakami yonge ya dimɛna.” Atshukanyi amɔtshi waya epalanga wakamba oko ambatshi mboka wakate ɔnɛ: “Olimu ɔsɔ toshaka lomba l’ɔlɔlɔ ndo demba dia wolo. Tekɔ wonya tshɛ kâmɛ. Sho mbɔlaka efula ndo ngɛnangɛnaka la lɔsɛnɔ.”

⁵ Vɔ Tshɔka Tokamba Lɛnɛ Ele Ohomba: Akristo amɔtshi wakalongola pasiɔ waki l’ekondjelo ka dimɛna wakonɔ dia tokamba lɛnɛ akiwɔ l’ohomba w’apandjudi efula wa Diolelo. Akina wakahamia olimu awɔ lo tshɔ dia tokamba lo mbilo kɛmɔtshi katɛkɛtawɔ ɔtɛkɛta w’angɛndangɛnda. L’ɛnyɛlɔ k’ɔpɔstɔlɔ Paulo, apandjudi wele l’ohetoheto asɔ ‘salaka tshɛ dikambo dia lokumu l’ɔlɔlɔ, woho wa vɔ liewoya anto akina.’​—⁠1 Kor. 9:23.

⁶ Atshukanyi amɔtshi wakatatɛ olimu w’ombatshi mboka l’ɔkɔngɔ wa mbodia anawɔ ahende. L’ɔkɔngɔ wa vɔ kamba ɛnɔnyi efula oko ambatshi mboka, vɔ wakɔshi yɛdikɔ ya mbeka ɔtɛkɛta wa chinois. Wony’ɔnɛ wayawɔ l’ɛnɔnyi 70 l’ɛmɔtshi, vɔ wekɔ l’ɔngɛnɔngɛnɔ heyama dia mɛna woho wambokoma olui wa wekelo wa l’ɔtɛkɛta wa chinois tshondo y’etshumanelo. Atshukanyi wele oko wanɛ woshidiso lanɛ wekɔ mɛtɛ tshondo y’ɛtshɔkɔ!

⁷ Olimu w’Esambishelo Kema la Pasiɔ: Etena kɛnɛ kele anto efula mbɔsaka pasiɔ oma l’elimu awɔ wa l’emunyi, olimu waki Nzambi kema la pasiɔ. Anto tshɛ pombaka tetemala la kɔlamelo ‘polo l’ekomelo.’ (Mat. 24:​13, 14) Lo mbilo kaso, ambatshi mboka wa pondjo ndekana 700 waya l’ɛnɔnyi ndekana 60 mɛnyaka woho wayashawɔ efula l’olimu w’esambishelo. Lo mɛtɛ, lam’atawatshunde esombe, amɔtshi waya bu l’akoka wa kamba efula oko wakawakambaka ntondo l’olimu wa Jehowa. Koko ekɔ ekeketshelo heyama dia mbaɛna wasala l’otema ɔtɔi kɛnɛ kewɔ l’akoka wa sala! Ɔtɛkɛta wa Nzambi mbashikikɛka dia Jehowa hatohɛ olimu awɔ ndo ngandji kokawɔ lokombo lande.​—⁠Luka 21:​1-4; Heb. 6:⁠10.

⁸ Naka wɛ aya suke l’ɛnɔnyi washawɔ onto pasiɔ, lande na kahayasɛdingola lo dɔmbɛlɔ yoho yayoyokoka kamba dimɛna l’otshikitanu ɔsɔ wambosalema lo lɔsɛnɔ layɛ na? Oma l’ekimanyielo ka Nzambi, wɛ koka mɛna dia pasiɔ ambokosha diaaso dia fudia olimu ayɛ w’esambishelo watombola Jehowa ndo wele l’ɛtshɔkɔ efula.​—⁠Osam. 148:​12, 13.