Tɛnya Lowando lo Kɛtshi ka Nzambi
1 La ntondo ka nde koma Okristo, ɔpɔstɔlɔ Paulo akatonaka la wolo tshɛ dia Lokristo diangana. Koko, lam’ele nde akasale dui sɔ aha la nde mbeya, nde akokama kɛtshi. Jehowa akɛnya ngandji kande ka mamba ndo akasha Paulo olimu wa sambisha. Nde akangɛnangɛna olimu ɔsɔ. (Etsha 26:9-18; 1 Tim. 1:12-14) Lowando laki la Paulo lo kɛtshi ka Jehowa lakotshutshuya dia nde ndjasha tshɛ dia kotsha olimu ande.—2 Kor. 12:15.
2 Oma lo kɛtshi ka Nzambi, takalongola sho lawɔ olimu ɔmɔtshi. (2 Kor. 4:1) Oko Paulo, sho koka mɛnya lowando laso lo kɛtshi kakawatoke lo ndjasha tshɛ dia kimanyiya akina dia vɔ pama lo nyuma. Yoho mɔtshi yakokaso sala dui sɔ ele lo tatɛ mbeka l’anto Bible.
3 Totate Mbeka l’Anto Bible: Yoho mɔtshi ya tatɛ mbeka l’anto Bible ele mbɔsa yɛdikɔ ya tɔlɛka anto amɔtshi periodikɛ mbala la mbala. Naka tayotshɔka tenda anto asɔ mbala la mbala, kete tayeya dimɛna ekiyanu wele lawɔ. L’ɔkɔngɔ diko, sawo dimɔtshi dia lo periodikɛ koka ndjotokimanyiya dia mbɔtshiya wekelo wa Bible lo biukubuku Katɔlɔmba. Lo waendelo wayela, sho koka tetemala la kɛtshanya lo biukubuku Katɔlɔmba lam’ashaso ɔnɛ lasawola laso periodikɛ.
4 Ekɔ Ohomba Sho Mbidja Welo wa Lânde: Dɔmbɛlɔ ndo welo wadjaso ayotokimanyiya dia pamia olimu aso w’esambishelo. Kadiyɛso kɛmɔtshi k’ombatshi mboka laki l’ombeki wa Bible ɔtɔi akalɔmbɛ Jehowa dia nde mbɔtshɔkɔla dia kondja ambeki efula wa Bible. Nde akɔtɔnganyiya akambo l’alɔmbɛlɔ ande. Nde akasɛdingola olimu ande ndo akɛnyi dia lam’akandasalaka waendelo w’eyoyo nde kɔnɔmbaka anto dia mbeka la wɔ Bible. Nde akamɛ sala dui sɔ ndo aha la tshimbatshimba nde akayongaka l’ambeki akina ahende wa Bible.
5 Ande diɛsɛ diele laso dia mbeyanya “lukumu l’ololo la ngandji ka mamba ka [Nzambi]” lee! (Etsha 20:24) Lowando lele laso lo kɛtshi ka Nzambi latotshutshuya dia monga l’etete lo kimanyiya akina dia vɔ kondja wahɔ lo ngandji ka mamba ka Jehowa.