Mukanda W’oma Le Olui-walɔmbɔla

Anangɛso l’Akadiyɛso wa Ngandji,

“Ngandji ka mamba kayali lanyu ndu ki k’uma le [Nzambi] Shesu, la uma le Khumadiondjo Yesu Kristu!” (1 Kor. 1:⁠3) Ande woho walongamɛso mɛtɛ l’asolo walomɔlomɔ etena kɛnɛ kele ɛngɔ tshɛ kele la lomu kayosha Jehowa lotombo lakoka lande lee! (Osam. 150:⁠6) Etena kakongɛso lushi la woke lɔsɔ, nyɛsɔ totetemale la mbewoya lokumu l’ɔlɔlɔ la Diolelo diaki Nzambi ndo mbetɛ anto ambeki.

Olimu w’esambishelo mbele olimu woleki ohomba waki Jehowa wahomba kambema lanɛ la nkɛtɛ. (Mako 13:10) Lam’ele tekɔ lo mbeya dimɛna woho wangɛnangɛna Jehowa olimu ɔsɔ, sho mbɔlɔmbaka dia nde tetemala la tshɔkɔla olimu ɔsɔ woho w’onto tshɛ monga la diaaso dia kondja ɛtshɔkɔ w’oma l’olambo wa tshungo. (Eny. 14:​6, 7, 14, 15) Lo mɛtɛ, tekɔ lo diɛnɛ l’ekakatanu, koko tekɔ mɛtɛ la lowando lo woho ‘wambotolodiama la wolo w’oma l’olongo’ dia kotsha olimu ɔsɔ!​—⁠ Luka 24:⁠49.

Ekɔ ɔngɛnɔngɛnɔ dia vusola awui w’olimu w’ɔnɔnyi wakete dia mɛna kɛnɛ kakakotsha Jehowa oma lo tshimbo y’ekambi ande wa kɔlamelo. Oko wakawakondja wolo oma l’ekimanyielo ka nyuma k’ekila, ekambi waki Nzambi wakakɛnɛmɔla ngandji kele oko kaki Kristo, lo mbidja lohetsho lakahomana lawɔ l’andja w’otondo otshumba. Ngandji ka ngasɔ kakɛnama lo nsanganya yaso ya weke. Oma lo Ngɔndɔ ka Samalo polo ndo Ngɔndɔ ka Dikumi l’Ahende 2003, atomami w’oma lo wedja ndekana lokama wakatshu l’ahole 32 wakasalema nsanganya ya wedja efula l’Afrikɛ, l’Amɛrikɛ wa la Nɔrdɛ, l’Amɛrikɛ wa la Sidɛ, l’Asiya, l’Australie ndo l’Erɔpɛ. Waa misiɔnɛrɛ, ekambi weteta lo wedja efula, ndo ase Bɛtɛlɛ wakamba lo wedja ekina wakakɔnyama lo nsanganya shɔ ya distrikɛ ndo ya wedja efula.

Lo nsanganya shɔ, takalongola dibuku ‘Voyez le bon pays’ la dibuku “Etshama oma le Ombetsha a Woke.” Ndo nto, wakatewoya dia dibuku di’oyoyo diendana la Kalasa k’Ambatshi Mboka diayotomba l’ekomelo k’ɔnɔnyi w’olimu wa 2004. Yema yema, ambatshi mboka wambokamba olimu edja efula wanɛ wambɔtɔka kalasa kɛsɔ wayoyɔtɔ kalasa kakɔ nto kâmɛ l’ambatshi mboka w’eyoyo.

Osukɔ w’oma le Nzambi ndo lokaho l’anangɛso lakakimanyiya dia mbikisha Mbalasa ya Diolelo, djekoleko lo wedja wele kema l’ekondjelo k’efula. Lam’ele l’andja w’otondo anto waya l’ohomba w’efula wa mbo ya ndɛ ya lo nyuma, tɛdikɔ tambɔsama dia mbikisha mvudu kina ya Bɛtɛlɛ lo wedja efula. Biukubuku Nyudjase pundju l’ongenongeno la kete! yekɔ kakianɛ l’ɛtɛkɛta 299, ndo yambotomba kɔpi miliyɔ 139; Ewo Katɔla Otsha lo Lɔsɛnɔ la Pondjo ambotomba kɔpi ndekana miliyɔ 93 l’ɛtɛkɛta 161; ndo ndekana yɛdikɔ ya kɔpi miliyɔ 200 ya biukubuku Kakɔna Katɔlɔmba Nzambi? yambofundama l’ɛtɛkɛta 267.

Tambolongola la wangasanu tshɛ anto 258845 wanɛ wakɛnya ndjakimɔ kawɔ le Nzambi lo batizama l’ashi l’ɔnɔnyi w’olimu wetshi! Kânga mbele woho wasukɛnyu Diolelo diaki Nzambi akanyela lohetsho la mamba oma le Satana, dui sɔ diakanyokonya mpoke ya nɛmɔ efula ndo nyakalongola ɛtshɔkɔ wa mamba w’oma le Jehowa etena katanyalawɔ lowango lele la ntondo kanyu. (Heb. 12:​1, 2; Eny. 12:17) Eelo, nyoyashikikɛ dia ‘Ɔnɛ latonyolamaka hanyingɔnyingɔ djɔ.’​—⁠Osam. 121:⁠3.

Divɛsa di’ɔnɔnyi 2004, diata ɔnɛ: ‘Nyosungukalake ndo Nyoyalɔngɔsɔlake’ diamboya mɛtɛ la wonya. (Mat. 24:​42, 44) Ɔtɛkɛta wa Nzambi mbutaka di’Akristo wekɔ angɛndangɛna lo dikongɛ di’akambo nɛ. (1 Pet. 2:11; 4:⁠7) Omalɔkɔ, sho pombaka ndjasha l’akambo wa lo nyuma, lo monga la lɔsɛnɔ l’ɔsɛlɛngɛ ndo sɛdingolaka otema aso dimɛna dimɛna. “Ului a wuki” wekɔ lo nyanga dia tɔlɛ lo todja l’awui wa lo dikongɛ diande di’akambo nɛ.​—⁠Eny. 12:⁠9.

Wadielo wa Bible wa lushi la lushi tokimanyiyaka dia sho sɛnaka wolo. Dui sɔ koka tokimanyiya dia ‘Eelo kaso monga Eelo’ lo kotsha ndjakimɔ kaso ndo “tetemala nkimela elungamelu kasu wulu edja ndu l’ekumelu.” (Jak. 5:12; Heb. 3:14) Wadielo wa Bible wa lushi la lushi koka tokimanyiya dia mbohɔ polo ndo lo yɛdikɔ yakɔna yambangana anto wa l’andja ɔnɛ l’ɛlɛmbɛ waki Nzambi wahatshikitana. (Mal. 3:6; 2 Tim. 3:​1, 13) Ewo k’oma lo Bible koka tokimanyiya dia sho mbewɔ “ekondo w’uma lu yimba y’antu” ndo tshikala la kɔlamelo otsha le Jehowa.​—⁠2 Pet. 1:16; 3:⁠11.

Ambutshi etena kenyu lo mbodia ananyu lo wetshelo ndo l’ɛlɛmbɛ wa Jehowa, onde nyekɔ lo mbakimanyiya dia vɔ ndjadjɛ eyango wa lo nyuma ndo dia ‘sungukalaka’? (Ef. 6:⁠4) Onde nyekɔ lo mbaetsha dia vɔ mbɔsa nshi yawɔ yayaye oko wakayiɔsaka Yeso onto loleki lomba lo nkɛtɛ k’otondo? Yeso akakoke monga otshudi w’ambaya, osadi wa diangɔ kana onganga woleki woke l’andja w’otondo, koko lo dihole dia nde ndjasha l’awui asɔ nde akakambe olimu wa lo tena tshɛ. Ɛnyɛlɔ kande koka nyotshutshuya dia kimanyiya ananyu dia vɔ mbetsha wahɔ wa Diolelo lo dihole dia ntondo lo nsɛnɔ yawɔ.

Lo tshimbo y’Olui-Walɔmbɔla, ɔhɔmbɔ wa kɔlamelo ndo wa kɛsɔ ekɔ lo kaloya ‘olui a woke’ losaka l’otema ɔtɔi lo woho watokimanyiyawɔ dia kotsha ɔkɛndɛ aso wa ‘lokumu l’ɔlɔlɔ sambishama lo nkɛtɛ k’otondo oko ɔmɛnyi le wedja tshɛ.’ (Eny. 7:9; Mat. 24:​14, 45) Nyu anangɛso l’akadiyɛso wa ngandji, nyonge l’eshikikelo dia Jehowa ekɔ lo mbohɔ “ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.” (Heb. 6:10) Oko wayonyala akambo w’ɔlɔlɔ wakete ndo nembetɛ etombelo w’ɔlɔlɔ wakatombe oma lo welo wadjaso kâmɛ, nyeye dia nyakakambe olimu efula lo sambisha l’andja w’otondo.

Nyotokome nshi yayaye la dihonga tshɛ etena katetemalanyu la ‘nongamɛ difuto diele la ntondo,’ aha la tshika ndoko onto kana ɛdiɛngɛ nyoshishɛ difuto sɔ. (Heb. 11:26; Kol. 2:18) Eelo, nyoyaɛkɛ le Jehowa, l’eshikikelo ɔnɛ nde ayokimanyiya anto tshɛ wawoka ngandji dia vɔ ndjonga la lɔsɛnɔ lele bu l’ekomelo.​—⁠Joa. 6:​48-54.

Nyeye dia tekɔ l’ɔngɛnɔngɛnɔ efula lo woho wakambaso la nyu dia lotombo laki Jehowa.

Anangɛnyu,

Olui-Walɔmbɔla w’Ɛmɛnyi wa Jehowa