Tokondja Wahɔ oma lo Wekelo wa Dibuku Prɔfɛsiya ka Danyɛlɛ
1 Tatɛ oma lo lomingu la Ngɔndɔ ka Sato 15, tayeka dibuku He Dja Yimba lo Prɔfɛsiya ka Danyɛlɛ! lo Wekelo wa Dibuku wa l’Etshumanelo. Efula wamboshilaka mbadia dibuku sɔ dia dimɛna efula, koko kakianɛ tambokondja diaaso dia kondja wahɔ oma l’ɔkɛtshanyelo wa l’olui w’awui wele lo dibuku sɔ. Apandjudi tshɛ, wanɛ wayasha l’akambo wa mɛtɛ ndo ana mbelamɛka ndo vɔ keketshamaka dia mongaka lomingu tshɛ lo wekelo wa dibuku dia lo Bible dielɛwɔ ɔnɛ Danyele.—Euh. 31:12, 13.
2 Ekongelo ka Wekelo ndo Alako: Ekongelo k’otondo ka wekelo wa dibuku Prɔfɛsiya ka Danyɛlɛ kekɔ lo numɛlɔ kɛnɛ k’Olimu Aso wa Diolelo. Sala tshɛ dia momba ekongelo kɛmɔtshi lo dibuku diayɛ dia wekelo. Ekongelo mɛnyaka tshapita la edingɔ w’oma lo dibuku ndo avɛsa w’oma lo Danyele wayekamaka lomingu tshɛ. Nɔtɛ ya l’ɛse ka dikatshi nembetshiyaka woho ndo etena kayekama awui amɔtshi wa lo dibuku. L’ekomelo ka wekelo tshɛ wa lomingu la lomingu, omendji keketshamaka dia vusola avɛsa amɔtshi wa shikaa w’oma lo Danyele wa l’ekongelo ka lomingu lakɔ, kâmɛ l’olui ande wa wekelo wa dibuku. Naka wonya wekɔ, kete avɛsa akɔ kokaka mbadiema ndo nembetshiyama. Avɛsa amɔtshi wayadiemaka kânga mingu hiende y’etondo naka elembetshiyelo k’avɛsa akɔ kâkatatetemala.
3 Lɔngɔsɔlaka Wekelo Dimɛna Dimɛna: Wakasale la wolo dia awui wayekama mbɔsa wenya wahombama, aha la kɛtshanya awui akɔ lowango lowango. Wekelo ɛnɛi mbele tomondo efula. Diakɔ diele, l’ekomelo ka wekelo wa lomingu la Ngɔndɔ ka Tanu 3, omendji koka mbidja ovuswelo wa Danyele 2:1-40. Lomingu la Ngɔndɔ ka Tanu 24, nde koka vusola Danyele 3:1-30. Lo lomingu la Ngɔndɔ k’Enanɛi 2 la dia ndjala ndo l’ɔkɛtshanyelo wa dimɛna efula w’esato ndo w’avɛsa wa lo lɛkɛ 139. Asango wa lo lɛkɛ 188 ndo la 189 la dia kɛtshanyema lo wekelo wa lomingu la Ngɔndɔ k’Enanɛi 30.
4 Lɔngɔsɔlaka wekelo wa dibuku lomingu tshɛ dimɛna ndo shaka kɔmatɛrɛ lɔkɔ. Ngɛnangɛna diɛsɛ diele layɛ dia kamba kâmɛ l’ɔlɔngɔswamelo wɛnama waki Jehowa ndo kondja wahɔ oma lo yimba ndo oma lo eokelo katosha akitami ande w’esɔ wa kɔlamelo. (Dan. 12:3, 4) Keketsha anto akina la ngandji tshɛ dia vɔ mbɔtɔka lo wekelo wa dibuku mbala la mbala. Nyɛsɔ sho tshɛ todje yimba l’ɔtɛkɛta wa prɔfɛsiya waki Nzambi oko wakawashɔma lo yoho ya diambo lo dibuku dia Danyɛlɛ.—Heb. 10:23-25; 2 Pet. 1:19.