Dibasa diokolamiso le anto akina
1 Ɔpɔstɔlɔ Paulo akayaokaka dia nde aki la ɔkɛndɛ wa sambisha anto. Nde akeyaka dia Jehowa mbakasale dia weho w’anto tshɛ shimbamela oma lo ekimanyielo ka dikila di’oshinga wolo diaki Ɔnande. (1 Tim. 2:3-6) Diɔ diakɔ diakate Paulo ate: “Dimi leko la dibasa le asi Ngirika, ndu le asendji, le akanga a yimba ndu le akanga a dinginya.” Nde akakambe la etete, aha la nɛmba dia futa dibasa diakandakolama le anyande anto lo mbasambisha lokumu l’ɔlɔlɔ.—Romo 1:14, 15.
2 Lo ɛnyɛlɔ ka Paulo, Akristo wa nshi nyɛ nyangaka woho wa sambisha anyawɔ anto lokumu l’ɔlɔlɔ lo diaaso tshɛ. Lam’ele ‘fɔnu ka woke’ kekɔ lo ndjasukana esadi, sho pombaka nyanga wanɛ wele la etema w’ɔlɔlɔ la shamanya y’efula. Ngandji ka mɛtɛ kokaso anto katotshutshuya dia monga la etete lo olimu ɔnɛ washimbɛ nsɛnɔ.—Mat. 24:21; Ezek. 33:8.
3 Tofute dibasa diaso: Yoho ya ntondo yatanaso anto ele sambisha lo soko la soko. Lo bɛtshi dia nkɛtɛ diele anto hawoleke tanema lawakawɔ, mbɔsa nɔtɛ ya shikaa ndo kalola lo wenya ekina ayotokimanyiya dia sawola la anto efula. (1 Kor. 10:33) Sho koka nto sambisha anto efula lo sambishaka lo ɛtshi ka nkɛtɛ k’amundji w’okanda, lo toshinga, lo waa parkɛ, lo waa parkingɛ ndo lo telefɔnɛ. Sho kokaka ndjambola ɔnɛ: ‘Onde lekɔ lo sala kɛnɛ tshɛ kakokami sala dia kamba la toho tshɛ t’esambishelo la oyango wa mbewoya anto losango la lɔsɛnɔ?’—Mat. 10:11.
4 Ombatshi mboka ɔmɔtshi akayaoke dia nde aki la ɔkɛndɛ wa woke wa sambisha anto tshɛ wa lo ɛtshi kande ka nkɛtɛ. Lo luudu lɔmɔtshi, nde akɛnaka tena tshɛ adidishi ndihama ndo ndoko onto lakongaka lo luudu lakɔ. Koko, lushi lɔmɔtshi, etena kele ombatshi mboka ɔsɔ komonga lo esambishelo, nde akɛnyi mutuka ɔmɔtshi wemadi la ntondo ka soko diele mbala ko mbala nde kotanaka onto lâwɔ. Lam’ele nde konanga shisha diaaso sɔ, nde akamine butɔ ka lo lokuke lɔsɔ dia kɔkɔla, ko pami kɛmɔtshi akatombe. Sawo dia ntondo sɔ diakakonya dia kadiyɛso kɛsɔ nde la omɛnde ndjoya mbala efula dia ndjembola pami kɛsɔ. L’ɔkɔngɔ diko, pami kɛsɔ aketawɔ dia mbeka Bible ndo ɛlɔ kɛnɛ nde aya ɔnangɛso lamboshila batizama. Nde ekɔ la lowando efula lo woho wakayaoke kadiyɛso dia nde ekɔ la ɔkɛndɛ wa sambisha anto akina.
5 Lam’ele ekomelo kekɔ lo ndjasukana esadi, ɔnɛ ekɔ etena ka sho futa dibasa diokolamiso le anyaso anto lo ndjasha tshɛ l’olimu aso wa esambishelo.—2 Kor. 6:1, 2.