Tatoshishake ngandji kaki laso ntondo
1 Yeso laki lo lotombo akalake etshumanelo ka l’Ɛfɛsɔ ka lo ntambe ka ntondo ate: “Dimi laye dikambu! ne dia we akakimo ngandji kaye ka ntundu.” (Eny. 2:4) Mɛnamaka dia anto efula wamboshisha ngandji kaki lawɔ ntondo le Jehowa. Etena kakatekaka akambo wa mɛtɛ, taki la ngandji k’efula le Nzambi ndo le wanyaso anto ndo kɛsɔ mbakatotshutshuya dia sambisha anto akina l’ohetoheto tshɛ dikambo di’elongamelo kaso k’oyoyo. Kakɔna kayotokimanyiya diaha sho shisha ngandji kaki laso ntondo ndo ohetoheto aso l’esambishelo?
2 Wekelo w’onto ndamɛ ndo wɔtwɛlɔ wa nsanganya: Kakɔna kakatokonya dia sho mboka Nzambi ndo wonyaso onto ngandji mbala ka ntondo kakateke akambo wa mɛtɛ? Shi aki akambo tshɛ wakateke wendana la Jehowa oma lo wekelo aso w’Afundelo? (1 Joa. 4:16, 19) Ɔnkɔnɛ, dia ngandji kaso “tamanya mbula,” sho pombaka tetemalaka kondja ewo k’oshika, mbuta ate tshimolaka ‘akambo woshami etale waki Nzambi.’—Fil. 1:9-11; 1 Kor. 2:10.
3 Lo nshi nyɛ y’ekomelo yambolola la ekakatanu ndo l’awui wekola anto yimba, monga l’ekongelo ka dimɛna ka wekelo w’onto ndamɛ koka monga dikambo dia wolo. (2 Tim. 3:1) Sho pombaka ndjaombɛka etena ka ndɛka waa mma wa lo nyuma. Wɔtwɛlɔ wa nsanganya ya l’etshumanelo mbala la mbala ekɔ nto ohomba, djekoleko oko “[wɛnaso dia] lushi lako laya suki.”—Heb. 10:24, 25.
4 Esambishelo: Sambishaka l’ohetoheto tokimanyiyaka diaha shisha ngandji kaki laso ntondo le Nzambi. Etena kasambishaso lokumu l’ɔlɔlɔ, sho ndjaoholaka alaka wa ngandji waki Jehowa, ndo dui sɔ tokimanyiyaka dia pɛtshahɛtsha elongamelo kaso ndo diaha ngandji kaso mbɔla. Mbetsha akambo wa mɛtɛ wa lo Bible nɔmbaka dia sho sala eyangelo dia shoamɛ mbashihodia dimɛna, ndo dikambo sɔ keketshaka mbetawɔ kaso.—1 Tim. 4:15, 16.
5 Jehowa mbakoka nongola diangɔ tshɛ, kamɛ ndo ngandji kaso. (Eny. 4:11) Tatetawɔke dia ngandji kaso kitakita. Tolame ngandji ka wolo kaki laso lo salaka wekelo w’onto ndamɛ wa l’otema ɔtɔi, lo mbɔtɔka lo nsanganya mbala la mbala ndo lo sambishaka akina awui woleki ohomba le so l’ohetoheto tshɛ.—Romo 10:10.