Ngandji ekɔ ohomba dia kondja etombelo w’ɛlɔlɔ l’esambishelo
1 “Nyuyi le mi, . . . ku dimi layunyusha mumuya.” (Mat. 11:28) Ɛtɛkɛta ɛsɔ wakakɛnɛmɔlaka ngandji k’efula kakokaka Yeso anto. Oko weso ekambi w’Akristo, sho kombolaka mbokoya Yeso lo kɛnɛmɔla ngandji kaso le anto wambɔkɔmɔ oma le andja ɔnɛ waha la ngandji. Ngande wakokaso mɛnya ngandji kokaso anto etena kasambishaso lokumu l’ɔlɔlɔ?
2 Lo ɛtɛkɛta: Ngandji kakandokaka anto akatshutshuya Yeso dia nde kamba la diaaso tshɛ diakandakondjaka dia mbasambisha lokumu l’ɔlɔlɔ. (Joa. 4:7-14) Ngandji kayotokimanyiya diaha sho mengenga sambisha lo tshakitudi. Yana ya yimato mɔtshi y’ɛnɔnyi esamalo akasambisha mama kɛmɔtshi kakadjasɛ suke la nde lo luudu lalongolawɔ ɛkɔnyi la lopitadi. Kakɔna kakôtshutshuya dia nde sala dui sɔ? Nde akate ate: “Akɛnamaka diele oko mama kɛsɔ aki l’ohomba wa mbeya akambo wendana la Jehowa.”
3 Sho koka mɛnya woho wayashaso le anto akina lo monga l’ɔmɔnɔmɔnɔ wa mɛtɛ ndo la wendjo wa dui wele oko onto asawola l’ɔngɛnyi. Sho kɛnɛmɔlaka ngandji lo mpokamɛka kɔmatɛrɛ y’anto akina dimɛna, lo mbeya ekiyanu awɔ ndo lo mɛnya dia tekɔ lo ndjasha l’otema ɔtɔi le wɔ. (Tuk. 15:23) L’ɛnyɛlɔ ka Yeso, sho pombaka mbidjaka dikako vɔlɛ lo losango la Diolelo lakeketsha ndo lo ngandji la kɛtshi koka Jehowa anto.—Mat. 24:14; Luka 4:18.
4 Lo etsha: Yeso kotshimbatshimbaka dia kotsha ehomba w’anto akina lo toho ta shikaa ndo tɛnama. (Mat. 15:32) Sho lawɔ koka monga la waaso wa kɛnɛmɔla etsha wa ngandji ka lɔsɛngɔ etena keso l’esambishelo. Kadiyɛso kɛmɔ akɛnyi dia mama kɛmɔ aki l’okakatanu dia mboka dui di’ohomba diakawawotɛka lo telefɔnɛ. Kadiyɛso akokimanyiya la mbokadimolɛka kɛnɛ kakataka onto lakawelɛ. Tshelo ya ngandji shɔ akawosha diaaso dia vɔ sawola awui w’oma l’Afundelo wakayokonyaka mama kɛsɔ dia nde mbetawɔ mbeka Bible. Ndo nto, ɔnangɛso ɔmɔtshi akatshu dia tosala wendelo w’oyoyo le onto ɔmɔtshi, ko nde akotane atshimba wɔɔngɔ, nɛ dia nde ambohekɔ minya kɔsa ka wotsho kakakakatɛ la soko. L’ɔkɔngɔ wa nde mbokimanyiya dia minya kɔsa kakakakatɛ kɛsɔ, oshimu kele edja, paka lo kɔsa kakɔ mbakayodjasɛka ɔnangɛso ko nde tatɛ mbeka Bible la pami kakɔ kaki la lowando l’efula.
5 Etena kasambishaso, sho kɛnɛmɔlaka ngandji kokaso Nzambi ndo wonyaso onto. (Mat. 22:36-40) Kɛnɛmɔla ngandji oma lo ɛtɛkɛta ndo oma lo etsha ngasɔ kimanyiyaka akanga w’etema ɛlɔlɔ dia vɔ mbetawɔ dia tekɔ la akambo wa mɛtɛ.