Mukanda w’oma le Olui-walɔmbɔla
LO NDJELA ɛnyɛlɔ kaki Yeso, sho nɔmbaka Nzambi l’otema ɔtɔi ɔnɛ: ‘Lokombo layɛ lakidiame.’ Nsaki kaso ka wolo ka nsɛna lo woho wɔtɔnɛ la dɔmbɛlɔ sɔ mɛnamaka oma lo yoho yasɛnaso oko weso Ɛmɛnyi wa Jehowa. Lo mɛtɛ, sho nɔmbamaka awui efula, koko aha tsho mbeya lokombo la Nzambi. Sho pombaka kamba la diaaso tshɛ dia tombola lokombo lɔsɔ. Lo mɛtɛ, nɛmɔ dioleki diakokaso ngɛnangɛna la diɔ ele dia mbelamɛ Ɛmɛnyi wa Jehowa.—Mat. 6:9; Is. 43:10.
Lo yoho yɔtɔnɛ la Osambu 110:3, ekambi waki Jehowa ndjashaka la lolango l’olimu wakate Jehowa dia vɔ pombaka salema. Lande na kayasha anto wa lo nɔnga tshɛ ndo wa weho tshɛ l’olimu w’esambishelo? Ntondotondo, ekɔ nɛ dia vɔ mbokaka Nzambi ngandji ndo vɔ mbômamemaka. Euhwelu k’Elembe 6:5, 6 todjangɛka dia nanga Jehowa ‘l’otema aso tshɛ, l’anima aso tshɛ ndo la wolo aso tshɛ.’ Ngandji k’oma k’ɛse otema kɛsɔ totshutshuyaka dia kamba la wenya aso, wolo aso ndo la diangɔ diaso dia tɔla wahɔ wa Diolelo dia Nzambi otsha la ntondo ndo yoho mɔtshi yakokaso sala dui sɔ ele lo sambisha lo yɛdikɔ yɛdimi l’akoka aso.
Ngandji koka Jehowa anto mbakotshutshuya dia mbidjanga dia lokumu l’ɔlɔlɔ sambishama lo nkɛtɛ k’otondo. Nde halange dia kânga onto ɔtɔi ndjakema koko nde kombolaka di’anto tshɛ ndjatshumoya oma lo mboka yawɔ ya kɔlɔ ndo kadimɔ otsha le Otungi awɔ dia vɔ monga la lɔsɛnɔ. (2 Pet. 3:9) Jehowa mbutaka ate: “Dimi hangenangena nyoi k’untu a kolo! Dimi nangaka ndi nkalula uma lu kolo kandi, la ndi ndjala la lumu.” (Ezek. 33:11) Etena kayashaso l’olimu w’esambishelo, tekɔ djembetelo yɛnama ya ngandji koka Jehowa anyaso anto. Aha la tâmu, ɔsɔ ekɔ dui dimɔtshi diele lo kiɔkɔ y’ɔngɛnɔngɛnɔ wonga laso etena kayashaso l’olimu w’ohomba efula ɔsɔ.
Ngandji k’efula kokaso Jehowa mɛnamaka nto oma lo woho wɔsaso Ɔtɛkɛta ande wakasambiyama, mbuta ate Afundelo w’Ekila. Otondonga aha Bible, tshike tototeya Nzambi ndo ndjasukanya la nde oko watɔlɔmba Jakoba 4:8. Ndo tototeya nto lande na keso lânɛ la nkɛtɛ ndo kɛnɛ katokongɛ lo nshi yayaye. Tototeya dia lɔtshɛtshɛ laso tshɛ Adama mbele kiɔkɔ y’ekakatanu aso. (Romo 5:12) Tototeya nto dia tshelo yoleki tshɛ ya ngandji katoka Nzambi ele woho wakandakimɔ Ɔnande ɛtɔi lakandote oko tshungo dikambo diaso. Jehowa toshaka ewo, lomba ndo eokelo kande lo yɛdikɔ mɔtshi lo toho tokina efula. Sho mɛtɛ mbɔsaka woshasha ɔsɔ wa Ɔtɛkɛta ande wakasambiyama oko ɛngɔ k’oshinga wolo mɛtɛ! Lowando lele laso l’ɔtɛ wa woshasha wa diambo ɔsɔ totshutshuyaka dia sho ‘ndjatshungwɛka etena’ ka mbadia, mbeka ndo kana yimba lo ɛtɛkɛta wa Jehowa. (Ef. 5:15, 16; Osam. 1:1-3) Sho pombaka ngɛnangɛna etena kɔsaso dia mbadia Ɔtɛkɛta wa Nzambi lushi la lushi. Ɔnkɔnɛ, ngandji kokaso Nzambi pombaka tosukanya la Ɔtɛkɛta ande, lo tokimanyiya dia sho nyomoleka mbeya Jehowa ndo mbôka ngandji.
Takeke oma lo Bible dia etena kakatɔmbɔkwɛ Adama Jehowa, nde akela tokanula tande tshɛ mbidja ndo sho lɔsɛnɔ la shɔkɔ ndo laha l’elongamelo. Koko, Nzambi aki l’akoka ndo akalɔngɔsɔla yoho mɔtshi ya kimanyiya anto, ndo akayashikikɛ dia sangwelo diande diendana la nkɛtɛ diayokotshama.—Etat. 3:15.
Aha la tâmu, sho tshɛ tekɔ la nsaki k’efula ka kidia lokombo la diambo laki Nzambi kaso. Etena katataleke mbeya woho wele Jehowa Nzambi ka diambo, sho tshutshuyamaka dia kamba kâmɛ la nde ndo la okongamelo ande dia mbeyanya lokombo lande la woke ndo sangwelo diande. Ɔnkɔnɛ, tekɔ l’eshikikelo k’efula k’ɔnɛ ɛlɔ kɛnɛ tekɔ lo mbetawɔma ndo tekɔ lo tshɔkwama oma le nde oma ko kakianɛ ndo lo nshi yayaye tayokondja lɔsɛnɔ laha l’ekomelo lo andja w’oyoyo.
Anangɛso la akadiyɛso wa ngandji lee, sho ase Olui-walɔmbɔla kombolaka nyoshikikɛ ngandji kanyokaso. Sho nangaka nto nyɛnya lowando l’efula lele laso lo welo wadjanyu dia kamba la etena kambotshikala la ntondo ka ‘fɔnu ka woke’ dia ndeka sambisha anto lokumu l’ɔlɔlɔ. (Eny. 7:14) Lo sala ngasɔ, nyu mbashaka diaaso diâmɛ diakanyakondja dia monga la ewo ka Nzambi ndo ka Kristo katɔla otsha lo lɔsɛnɔ la pondjo.—Joa. 17:3.
Anangɛnyu,
Olui-walɔmbɔla w’Ɛmɛnyi wa Jehowa