Welo wa lânde wayodjama lo andja w’otondo dia mbelɛ anto oya lo Losanganya la distrikɛ lele l’ɔtɛ a dui ɔnɛ: “Toyele Kristo!”
Apandjudi wayokahanya nto akatshi wa leeta la lânde
1 Okahanyelo wakasalema l’andja w’otondo ɔnɔnyi wetshi dia mbelɛ anto oya lo Losanganya la distrikɛ laki l’ɔtɛ a dui ɔnɛ: “Etshungwelo kaya suke!” waki la etombelo w’ɛlɔlɔ le anto wayasha lo akambo wa mɛtɛ. Wanɛ waketawɔ leeta la lânde lɔsɔ wakɛnyi mbala kawɔ ka ntondo woho wonga dambo dia lo nyuma dia dimɛna efula diaki Ɛmɛnyi wa Jehowa. (Is. 65:13) Vɔ wakangɛnangɛna woho wakawonge kâmɛ la nkumbo kaso k’Akristo k’anto l’ɔnango kele kâmɛ. (Osam. 133:1) Dia sho kimanyiya anto efula dia mbɔtɔ lo Losanganya la distrikɛ lele l’ɔtɛ a dui ɔnɛ: “Toyele Kristo!” tayokahanya akatshi wa leeta la lânde nto l’andja w’otondo.
2 Etombelo waki la kɛnɛ kakatasale ɔnɔnyi wetshi: Lo menda alapɔlɔ wakatalongola oma lo ahole tshɛ wa lo andja w’otondo, takakondja etombelo w’ɛlɔlɔ lo mbelɛ anto oya lo Losanganya la distrikɛ laki l’ɔtɛ a dui ɔnɛ: “Etshungwelo kaya suke!” L’ahole efula, ase tita sango wakatɛkɛta dimɛna lo dikambo diaso. Ɛnyɛlɔ, jurnalɛ mɔtshi yakatondja sawo diaki la kɔlɔnɛ shamalo diakatɛkɛta dia okahanyelo ɔsɔ ɔnɛ: “Dia vɔ mɛnana la onto tshɛ la ntondo ka losanganya, Ɛmɛnyi wa Jehowa wa l’ɛtshi kaso ka nkɛtɛ wakadje welo wa lânde, vɔ wakasambisha wenya efula, wakatshu ahole wa ntale ndo wakasawolaka l’anto lo tshena pe.” Woho wakasalema okahanyelo ɔsɔ aha l’ofukutanu akakotola yambalo y’ase tita sango wa l’osomba okina ndo dui sɔ akâkonya dia dianganya lokumu l’okahanyelo lɔsɔ. Tojurnalɛ oko tosato takatɛkɛta dimɛna dikambo di’olimu wakatakambe la ntondo ka losanganya. Ofundji ɔmɔtshi akafunde asawo amɔtshi w’etale wakɔshi ndjɛkɛ ndekana hiende lo jurnalɛ mɔtshi yakatombe Lushi la lomingu. Yɔ yakatɛkɛta dikambo dia dietawɔ diaso, dia nkumbo kaso k’anto l’ɔnango, di’okahanyelo wa akatshi wa leeta, ndo dia losanganya laso la woke. Etena kakakimɔka opandjudi ɔmɔtshi dikatshi dia leeta lo soko dimɔtshi, kanga luudu akohemboya ɔtɛkɛta lo mbotɛ ate: “Eelo. Dimi mala mbadia awui akɔ lo jurnalɛ!” Onto okina akate la diambo tshɛ ate: “Lambadiaka jurnalɛ yatɛkɛta awui anyu, ko kakianɛ nyu nyaya lânɛ! Onde dikatshi diami dia leeta ndo?” Nde akakotsha ate: “Ɔnɛ ekɔ dikambo dimɔtshi dia dimɛna efula diambosala Ɛmɛnyi wa Jehowa.”
3 Anto efula wakɛnya nsaki wakaye la akatshi awɔ wa leeta l’anya lo dihole diakasalema losanganya. Anto amɔtshi l’atei awɔ wakaye oma lo esomba wa ntale dia ndjɔtɔ lo losanganya. Welo wakatadje l’etete dia mbelɛ anto akina, akakimanyiya dia lofulo l’anto wakaye lo losanganya mbudɛ efula. Ɛnyɛlɔ lo wodja ɔmɔtshi, lofulo l’anto lakadɛ yɛdikɔ ya pursa 27 lo mbɛdika la lofulo l’anto waki lo losanganya l’ɔnɔnyi wetshi.
4 Nyokindjakindja ɛtshi kanyu ka nkɛtɛ: Nyu mbeyaka tatɛ kahanya akatshi wa leeta mingu shato la ntondo ka nyu tatɛ losanganya lanyu la woke. Pombaka mbidja welo wa lânde dia kindjakindja ɛtshi kanyu ka nkɛtɛ k’otondo. Lo tshumanelo diele la bɛtshi dia nkɛtɛ dia weke, apandjudi mbeyaka tshika akatshi wa leeta la yewo tshɛ lo ahole wele anto bu lawakawɔ lo lomingu l’ekomelo la ntondo ka losanganya la woke. Tshumanelo pombaka sala la wolo dia kahanya akatshi wa leeta tshɛ wayowolongola ndo kindjakindja ɛtshi kawɔ ka nkɛtɛ k’otondo lo yɛdikɔ yakoka. Ambatshi mboka wa l’etshumanelo koka kamba la lofulo l’akatshi wa leeta tshɛ layahema lâdiko.
5 Kɛnɛ kahombaso mbuta: Wɛ koka mbuta wate: “Tekɔ lo mbisha lonya lo welo wadjama l’andja w’otondo dia kahanya dikatshi nɛ dia leeta lendana la dui dimɔtshi di’ohomba diaya suke la salema. Dikatshi diayɛ dia leeta diɔ nɛ. Wɛ ayotana awui akina w’ohomba wɔtɛkɛtami lɔkɔ.” Monga la mbɔtwɛlɔ ka mondo ayotokimanyiya dia kahɛ anto efula. Koko, naka ompokami ekɔ la ambola, kete tɔshi etena ka sho mbôkadimolawɔ. Etena kɛnya onto ɔmɔtshi nsaki, tofunde awui wendana la onto akɔ ndo katokalole dia ndjowenda aha la tshimbatshimba.
6 Ekɔ mɛtɛ dikambo di’ohomba efula dia sho sala la wolo dia ndjela Kristo! (Joa. 3:36) Losanganya laso la distrikɛ laya suke layokimanyiya anto tshɛ wayɔtɔ lɔkɔ dia vɔ sala dui sɔ. Lo mɛtɛ, sho kokaka nongamɛ dia tayoka nkumu ya mamba nto oko etombelo w’oma lo welo wa lânde wayotodja dia mbelɛ anto lo losanganya la distrikɛ lele l’ɔtɛ a dui ɔnɛ: “Toyele Kristo!” Ɔnkɔnɛ, onga l’ohetoheto dia mbelɛ anto efula dia vɔ mbɔtɔ lo losanganya lɔsɔ. Jehowa atshɔkɔlɛ welo wayoyodja dia mbisha lonya lo welo wayodjama lo andja w’otondo dia mbelɛ anto oya lo losanganya lɔsɔ.