Ekadimwelo lo ambola anyu
◼ Onde ‘ɔhɔmbɔ wa kɔlamelo ndo wa kɛsɔ’ mbetawɔka kɛnɛ kasala elui w’Ɛmɛnyi wa Jehowa wasangana kâmɛ lo yoho yawɔ vɔamɛ dia sala eyangelo kana ɔkɛtshanyelo w’awui amɔtshi wa l’Afundelo?—Mat. 24:45, 47.
Kema. Lo ahole efula wa l’andja w’otondo, anto amɔtshi wele l’okongamelo aso wambosala elui dia sala eyangelo lo awui amɔtshi wa lo Bible lo yoho yawɔ vɔamɛ. Amɔtshi wekɔ lo sala wekelo wa Hɛbɛru la Grɛkɛ ka lo Bible lo yoho yawɔ vɔamɛ dia sɛdingola kana Traduction du monde nouveau kekɔ mɛtɛ. Akina wekɔ lo sala eyangelo lo awui wa siansɛ watɛkɛtama lo Bible. Vɔ wambosala waa sitɛ Web ndo ahole wa sawolaka la anto lo Ɛtɛrnɛtɛ l’oyango wa kɛtshanyaka ndo mbishanaka tokanyi. Vɔ salaka nto nsanganya ndo wekɔ lo tondja ekanda dia mɛnya kɛnɛ kambowoshola ndo dia kotsha lâdiko dia kɛnɛ kalongolaso lo nsanganya y’Akristo ndo l’ekanda aso.
Lo nkɛtɛ k’otondo, ekambi waki Jehowa wekɔ lo nongola wetshelo wa lo nyuma ndo ekeketshelo k’efula lo nsanganya ya l’etshumanelo, lo nsanganya ya weke ndo lo tshimbo y’ekanda watondja okongamelo waki Jehowa. Lo ɛlɔmbwɛlɔ ka nyuma kande k’ekila ndo l’ekimanyielo ka Ɔtɛkɛta ande w’akambo wa mɛtɛ, Jehowa mbishaka ekambi ande tshɛ kɛnɛ kele ohomba dia vɔ “nduwanyema lu yimba ndu lu tukanyi kame” ndo ‘shikikala lo mbetawɔ.’ (1 Kor. 1:10; Kol. 2:6, 7) Lo mɛtɛ, tekɔ la lowando le Jehowa lo menda mbo ya ndɛ ya lo nyuma yatoshande lo nshi nyɛ y’ekomelo. Ɔnkɔnɛ, ‘ɔhɔmbɔ wa kɔlamelo ndo wa kɛsɔ’ hetawɔ oseka okanda tshɛ wahatondjami kana nsanganya tshɛ ndo sitɛ Web tshɛ yahakongɛmi oma lo ɛlɔmbwɛlɔ kande.—Mat. 24:45-47.
Ekɔ dui dia dimɛna efula dia anto kombola dia kamba la dikoka diawɔ di’ekanelo ka yimba dia sukɛ lokumu l’ɔlɔlɔ. Koko, ndoko oyangelo ɔtɔi wasala anto lo yoho yawɔ vɔamɛ wahomba tanganya la kɛnɛ kasala Yeso Kristo lo tshimbo ya etshumanelo kande ka la nkɛtɛ ɛlɔ kɛnɛ. Lo ntambe ka ntondo, ɔpɔstɔlɔ Paulo akewola anto lo kɛnɛ kendana la ndjasha lo awui walɛndja demba ndo wɔsɛ anto wenya efula wele oko ‘akambo wa nɔnga y’anto wahɛnɛ pe, koko watonyiyaka ambola walɔmba dia sala eyangelo lo dihole dia akambo walakanya Nzambi lo kɛnɛ kendana la mbetawɔ.’ (1 Tim. 1:3-7) Akristo tshɛ pombaka sala la wolo dia “[tona] dimbwanelu dia dinginya, ndu akambu wa nonga y’antu, ndu etshanelu, ndu tamu t’elembe. Akambu ako kema waho, ndu weko anyanya.”—Tito 3:9.
Le wanɛ wakombola sala eyangelo ndo wekelo wa Bible wa lâdiko, sho mbalɔmbaka dia vɔ kamba la Étude perspicace des Écritures, “ Toute Écriture est inspirée de Dieu et utile, ” ndo ekanda aso ekina oko wɛnɛ watɛkɛta dia prɔfɛsiya yele lo dibuku dia lo Bible dia Danyele, dia Isaya ndo dia Enyelo. Dihomɔ sɔ diekɔ la awui efula wa lo Bible wa sho mbeka ndo kana la wɔ yimba dia sho ‘ndodiama la ewo k’oshika ka lolango laki Nzambi lo lomba tshɛ ndo lo eokelo ka lo nyuma, dia sho kɛndakɛnda lo yoho yalanga Jehowa ndo mbɔngɛnyangɛnya tshɛ lo tshɛ ndo dia sho tetemala ntɔ elowa lo elimu tshɛ w’ɔlɔlɔ ndo dia sho pama lo ewo k’oshika ka Nzambi.’—Kol. 1:9, 10.