‘Nyotake paka ɛtɛkɛta wɔsɔhanyemi la lɛhɔ tena tshɛ’
1. Kakɔna kalembetshiya ‘sɔhanya ɛtɛkɛta aso la lɛhɔ’?
1 “Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.” (Kol. 4:6) Sɔhanya ɛtɛkɛta aso la lɛhɔ nembetshiyaka sɔna ɛtɛkɛta w’amɛna ndo tɛkɛta lo yoho yayɔngɛnyangɛnya onto latɛso. Ekɔ ohomba efula sala dui sɔ l’olimu w’esambishelo.
2. Ngande wakakoke Yeso sambisha womoto l’ose Samariya?
2 Ɛnyɛlɔ kaki Yeso: Etena kakinde suke la ɛtɛkɔ k’ashi, Yeso akasambisha womoto ɔmɔtshi l’ose Samariya lakaye oya l’ɛtɛkɔ dia ndjotahola ashi. Tena efula lo edja ka sawo diawɔ, womoto ɔsɔ akɛnya lohetsho lokongaka edjedja l’asa ase Juda la ase Samariya. Womoto ɔsɔ akɛnya nto kanyi yande ɔnɛ ase Samariya wekɔ tokanula taki Jakɔbɔ, kânga mbakataka ase Juda la wolo tshɛ dia ase Samariya komonga tokanula taki Jakɔbɔ. Lo dihole dia manya kɛnɛ kakataka womoto ɔsɔ, Yeso akasale dia sawo diawɔ monga lo yoho yangɛnyangɛnya. Oma lɔkɔ nde akôsambisha ndo dui sɔ diakakimanyiya womoto ɔsɔ ndo anto wa l’osomba.—Joa. 4:7-15, 39.
3. Ngande wakokaso ndjela ɛnyɛlɔ kaki Yeso etena keso l’esambishelo?
3 Etena kasambishaso, sho pombaka nama oyango aso wa ‘sambisha nkumu y’ɔlɔlɔ ya akambo w’ɛlɔlɔ’ lo yimba. (Romo 10:15) Sho nangaka mbewoya ompokami aso kanyi mɔtshi ya dimɛna ndo yakeketsha y’oma lo Bible, koko aha mɛnya di’oko tekɔ lo mɔnyɔla dietawɔ diande. Naka nde ambota kanyi mɔtshi ya kɔlɔ, kete hatohombe mɛnya mbala kakɔ ɔtɔi dia nde akatshi kɔlɔ. Onde ekɔ dui dimɔtshi diakandatshi diakokaso suya kana diakokaso mbândola l’otema ɔtɔi? Ondo sho kokaka mbɔtshiya divɛsa dimɔtshi lo mbuta ɔnɛ: “Onde wɛ atataka dia dui nɛ kokaka monga nganɛ?”
4. Ahombaso sala naka ompokami aso ekɔ lo tɛkɛta lo yoho ya kɔlɔ?
4 Ko akokaso sala naka ompokami ekɔ lo tɛkɛta lo yoho ya kɔlɔ kana mɛnamaka dia nde nangaka paka mbidja tâmu? Sho pombaka tetemala mɛnya loshilambo laso ndo lɔsɛngɔ oma lo etsha aso ndo oma l’ɛtɛkɛta aso. (2 Tim. 2:24, 25) Naka onto hangɛnangɛna losango la Diolelo, kete ayonga dimɛna mbotshika la ɔkɔmi tshɛ.—Mat. 7:6; 10:11-14.
5. Ngande wakakondja kadiyɛso kɛmɔtshi etombelo w’ɛlɔlɔ oma lo okadimwelo ande wa la loshilambo?
5 Etombelo w’ɛlɔlɔ: Etena kakayange kadiyɛso kɛmɔtshi dia sambisha womoto ɔmɔtshi l’osukanyi ande, womoto ɔsɔ akatatɛ pangɔhangɔ la kɛlɛ tshɛ ndo mbɔtɛnga. La lɔsɛngɔ tshɛ, kadiyɛso akawotɛ ate: “Odimanyiya lam’alangɛ, hambeyi nte wɛ ayoyaoka ngasɔ. Kotshikale la wolo.” L’ɔkɔngɔ wa mingu hiende, womoto akɔ akakɔkɔla lo soko diaki kadiyɛso, akɔlɔmbɛ edimanyielo lo kɛnɛ kakandasale, ndo akawotɛ dia kakianɛ nde nangaka mpokamɛ kɛnɛ kakalangaka kadiyɛso mbotɛ. Tena efula okadimwelo wa la loshilambo mongaka la etombelo w’ɛlɔlɔ!—Tuk. 15:1; 25:15.
6. Lande na kele ekɔ ohomba sho kambaka la ɛtɛkɛta wɔsɔhanyemi la lɛhɔ l’esambishelo?
6 Tosale la wolo dia kambaka la ɛtɛkɛta wɔsɔhanyemi la lɛhɔ etena kasambishaso lokumu l’ɔlɔlɔ. Kânga naka ompokami aso halange tohokamɛ, nde mbeyaka ndjoleka monga suke dia mpokamɛ mbala kekina kayɔkɔkɔla Ɔmɛnyi wa Jehowa okina lo soko diande.