Djembetelo ya mbetawɔ ka wolo!
1. Awui akɔna wa kɔlɔ efula wakatatshi Yeso?
1 Apɔstɔlɔ wakahokamɛka Yeso la yambalo tshɛ etena kakandatɛkɛtaka dikambo dia wôngelo ande ndo dia ekomelo ka dikongɛ di’akambo. Awui wa kɔlɔ efula wakahombe komɛ anto, mbuta ate ata, ndjala ya kasha, adidimu wa nkɛtɛ ndo hemɔ. Oma lâsɔ, Yeso akate dia ambeki ande wayohetshama, wayɔhɛnyahɛnyama ndo wayodiakema. Aprɔfɛta wa kashi wayotomba ndo wayonganyiya anto efula. Ngandji k’anto efula kayɔla.
2. Lande na kele woho wasambishama lokumu l’ɔlɔlɔ l’andja w’otondo ekɔ dui dia diambo?
2 Lo menda awui wakawatɛ Yeso asɔ, apɔstɔlɔ wakakoke mamba etena kakandayowatɛ dia lokumu l’ɔlɔlɔ la Diolelo diaki Nzambi layosambishama lo nkɛtɛ k’otondo. (Mat. 24:3-14) Ɛlɔ kɛnɛ, sho mɛnaka okotshamelo wa diambo efula wa prɔfɛsiya ka dimɛna kɛsɔ. Kânga mbasɛnaso lo tena dia pâ efula, Ɛmɛnyi wa Jehowa sambishaka lokumu l’ɔlɔlɔ l’ohetoheto tshɛ. Etena kele ngandji k’ase andja ɔnɛ kambɔla, ngandji kaso kekɔ lo mpɛtahɛta. Kânga mbahetshamaso oma le “wedja tshe,” sho sambishaka lo suke la wedja tshɛ.
3. Awui akɔna wakeketsha wɛnayɛ lo alapɔlɔ wa l’andja w’otondo?
3 Ekɔ mɛtɛ dui diakeketsha dia sɛdingola olimu wakasale Ɛmɛnyi wa Jehowa l’ɔnɔnyi w’olimu wetshi oko wɛnyamidiɔ lo alapɔlɔ wele lo lɛkɛ 3 polo 6! Lo ɔnɔngɔ wele ɔnɔnyi wa 16, taketsha wenya ndekana miliyara ɔtɔi l’olimu wa sambisha ndo wa mbetɛ anto ambeki. Ɔsɔ mɛtɛ ekɔ djembetelo ya mbetawɔ ka wolo! L’ɔnɔngɔ akɔ lofulo la ambatshi mboka lakadɛ pursa 5,8; lofulo la apandjudi lakadɛ pursa 3,1 ndo lofulo la ambeki wa Bible lakadɛ pursa 4,4. Lofulo l’anto wakalongola batismu lakadɛ pursa 20,1 lo mbɛdika la ɔnɔnyi wetshi. Ande ɔlɔ dia mɛna dia suke la anto miliyɔ esambele wekɔ lo kambɛ Jehowa la kɔlamelo tshɛ, mbuta ate lofulo lahatongaka ndoko lushi lee! Etena kasɛdingolayɛ alapɔlɔ, dui diakɔna dialeka kokeketsha?
4. Ekakatanu akɔna wakatondoya pami kɛmɔtshi etena kakandasalaka la wolo dia batizama?
4 Kânga mbele alapɔlɔ ɔsɔ mambiyaka, hatohombe mbohɛ dia anto wakɛnya mbetawɔ kawɔ mbakakambe olimu ɔsɔ. Tɔshi ɛnyɛlɔ kɛmɔtshi. Guillermo akole lo wodja wa Bolivie. Nde akotɔ lo 1935, ndo tatɛ lam’akinde l’ɛnɔnyi divwa, nde akonɛka kândji. Oma ko dikɛnda diande, nde akatɔmaka kândji dia kitshakitsha asui ande wakayaka oma lo woho wakandakambaka olimu wa wolo. L’ɔkɔngɔ diko, nde akayotatɛka nnɔ wanu efula ndo mfɔka. Etena kakandatatɛ mbeka kɛnɛ kɔlɔmba Jehowa, Guillermo akatshike nnɔ mfɔka ndo oma lâsɔ nde akitshakitsha ɔnwɛlɔ wa wanu. Okakatanu wakaleke wolo le nde aki wa tshika tshelo yaki lande ya tɔmaka kândji. Nde akalɔmbaka aha la mpekɔ ndo akatondoya okakatanu ɔsɔ. Nde akatshike mbekelo yande ya kɔlɔ ko nde akabatizama. Nde mbutaka ate: “Kakianɛ, laya pudipudi ndo lekɔ l’ɔngɛnɔngɛnɔ w’efula.”
5. Kakɔna kakombolaso?
5 Jehowa mɛtɛ ndjakiyanyaka dikambo di’anto. Nde nangaka di’anto tshɛ kadimola etema. (2 Pet. 3:9) Kɛsɔ mbakombolaso ndo sho. Etema aso watotshutshuya dia sho sala kɛnɛ tshɛ kakokaso sala dia kimanyiya anto wele l’etema w’ɛlɔlɔ dia vɔ mbeya ndo mboka Jehowa ngandji oko wasalaso.