Wekelo wa dibuku Bible etshatɔ mɛtɛ?
1 Otombelo wa dibuku Bible etshatɔ mɛtɛ? aki dikambo di’ɔngɛnɔngɛnɔ efula lo losanganya la distrikɛ laki l’ɔtɛ a dui ɔnɛ: “Okitanyiya le Nzambi.” Lam’ele tekɔ lo kamba la dibuku sɔ mbala la mbala l’olimu w’esambishelo, djekoleko etena kalɔmbɔlaso wekelo wa Bible, sho pombaka mbekesane dimɛna dimɛna la awui wele lo dibuku sɔ. Tayokoka mɛtɛ mbekesanɛ l’awui wele lɔkɔ nɛ dia tatɛ oma lo lomingu la Ngɔndɔ k’enanɛi 4, 2008 tayotatɛ mbeka dibuku Bible etshatɔ mɛtɛ? nto lo Wekelo wa dibuku wa lo etshumanelo.
2 Omendji wa wekelo wa dibuku ayokotolaka yambalo ya ampokami lo ambola wele l’etatelo ka tshapita tshɛ. Oma lâsɔ, nde ayokambaka la ambola wele l’ɛse ka dikatshi dia nɔmbɔla wekelo. Avɛsa wasukɛ tokanyi toleki ohomba wayadiemaka ndo kɛtshanyema, ndo kiombo yata ɔnɛ: “Kɛnɛ ketsha Bible” yele la koma ka tshapita tshɛ yayokimanyiyaka dia sala ovuswelo, nɛ dia yɔ yekɔ la ekadimwelo w’oma l’Afundelo wa ambola wele l’etatelo ka tshapita. Wɛ ayɔngɛnangɛna mbisha kɔmatɛrɛ nɛ dia dibuku nɛ nembetshiyaka akambo lo yoho ya hwe, ya wɔdu ndo ya dimɛna efula.
3 Okotsha wekɔ la awui w’ohomba wendana la ɛtɛ w’awui wa weho la weho. Tayokambaka l’akambo asɔ naka ambeki wa Bible wekɔ l’ohomba wa mbeya akambo efula lo ɔtɛ a dui ɔmɔtshi. Mbala mɔtshi tenyi di’okotsha diayɔkɛtshanyemaka lo Wekelo wa dibuku wa l’etshumanelo. Akambo wele l’ɔtɛ wa dui ɔmɔtshi wa lo okotsha wayadiemaka tshɛ oma le ombadi wa wekelo wa dibuku, ndo asawo w’etale wayokoka kahanyema lo tenyi tenyi. Ambola wa wekelo bu l’etenyi ka okotsha, koko omendji wa wekelo wa dibuku koka keketsha anto wele lo wekelo dia mbisha kɔmatɛrɛ lo mboka ambola watɔtɔmiya tokanyi toleki ohomba.
4 Wekelo wa dibuku Bible etshatɔ lo Wekelo wa dibuku wa l’etshumanelo wayotshɔka esadi esadi. Koko hatototshɔ la wekelo lowango lowango etena kekaso l’anto akina, djekoleko wanɛ wele kema kana wele tsho la yema y’ewo tshitshɛ ya awui wa lo Bible. (Etsha 26:28, 29) Lam’ayotekaka l’anto Bible lawakawɔ lo dibuku nɛ, ayonga ohomba kɛtshanyaka avɛsa dimɛna dimɛna, nembetshiyaka asango ndo awui akina. Ɔnkɔnɛ, yadjɛ oyango wa mbɔtɔka lo wekelo ndo mbishaka kɔmatɛrɛ lomingu tshɛ lo wekelo wa dibuku Bible etshatɔ mɛtɛ?