Mukanda w’oma le Olui-walɔmbɔla

Asekaso Ɛmɛnyi wa Jehowa wa ngandji,

Tekɔ l’ɔngɛnɔngɛnɔ w’efula dia nyofundɛ nyu anangɛso l’akadiyɛso wa ngandji! Sho ndjaokaka oko wakayaoke ɔpɔstɔlɔ Joani lakate dia nde ‘mɛtɛ akalangaka’ asekande ambetawudi ndo aki l’ɔngɛnɔngɛnɔ lo woho ‘wakawakɛndakɛndaka l’akambo wa mɛtɛ.’ (2 Joa. 1, 4) Akambo wa mɛtɛ wekɔ mɛtɛ tshondo y’ɔtshɔkɔ le so! Akambo wa mɛtɛ wambototshungola oma lo Babilɔna ka Woke ndo oma lo wetshelo ndo mbekelo yatɔ yanyangiya Nzambi. Kitanyiya akambo wa mɛtɛ ambotokimanyiya dia sho mbokana ngandji, kɛtshi ndo monga la lɔsɛngɔ. Ndo akambo wa mɛtɛ wambotokimanyiya dia sho monga pudipudi la ntondo ka Nzambi ndo ambotosha elongamelo ka lɔsɛnɔ la pondjo.

Tekɔ nto l’ɔngɛnɔngɛnɔ w’efula l’ɔtɛ watɔlɔmbɔla ndo watokeketsha nyuma kaki Jehowa lushi la lushi! Tekɔ l’eshikikelo dia nyakɛnyi toho totshikitanyi tasala Jehowa dui sɔ lo Losanganya la distrikɛ letshi laki l’ɔtɛ a dui ɔnɛ: “Nyuma kaki Nzambi kekɔ lo tɔlɔmbɔla.” Oko watatetemala fula ekakatanu wa l’andja ɔnɛ, ekɔ ohomba dia sho ndjaɛkɛ le nyuma kaki Jehowa ka wolo efula dia tɔ tɔlɔmbɔla lo nshi ya wolo efula yatokongɛ la ntondo.

Tekɔ l’eshikikelo di’etema anyu wakanandema etena kakanyadia ɛkɔndɔ wasalanganya etema w’anangɛso l’akadiyɛso wakakikɛ ekakatanu wa wolo l’ɔtɛ wa mbetawɔ kawɔ wakatombe lo Annuaire ndo l’ekanda ekina. Ndo ekɔ dui dia diambo dia mbeya di’efula ka l’atei w’anto wa kɔlamelo asɔ waki anto w’oma la batizama kana waki watabatizama. Sho mbangɛnangɛnaka mɛtɛ l’ɔtɛ wa kɔlamelo yawɔ ndo woho wetawɔ lo wedi w’akambo wa losembwe! Lo mɛtɛ, ɛnyɛlɔ kawɔ ka dimɛna keketshaka yɛdikɔ yaso ya tetemala nama kɔlamelo yaso lo Diolelo oyadi ekakatanu wayohomana la so.—1 Tes. 1:6-8.

Anangɛso l’akadiyɛso wa ngandji le, sho mbeyaka dia nyekɔ lo pomana l’ekakatanu efula wendana l’ekondjelo ndo l’ekakatanu ekina wanyɔlɔmba dia ndɔ ta dia ta dia dimama dia ngandji dia nkumbo yanyu tshikala nge. Le amɔtshi wa l’atei anyu, ekɔ tshondo y’okakatanu dia sukɛ olimu w’esambishelo ka Diolelo ndo elimu ekina w’ohomba wa l’etshumanelo mbala la mbala ndo la kɔlamelo tshɛ. Diakɔ diele l’ɔkɔngɔ wa sho kɛtshanya l’ekimanyielo ka dɔmbɛlɔ, takasale etshikitanu ɛmɔtshi lo kɛnɛ kendana la nsanganya ya l’etshumanelo tatɛ Ngɔndɔ ka ntondo 1, 2009. Tekɔ l’eshikikelo dia nyayokamba la otshikitanu ɔsɔ dia nyomoleka kondja etena ka salaka wekelo w’onto ndamɛ ndo wa lo nkumbo.

Lo nsanganya ya weke yetshi, taki l’ɔngɛnɔngɛnɔ w’efula dia mɛna anto efula wakotsha kɛnɛ kalɔmbama dia batizama. Efula ka l’atei awɔ weke akɛnda. Sho nyandolaka nyu ambutshi lo woho wodianyu ananyu dia vɔ monga la lowando lo akambo wa mɛtɛ ndo woho wâkeketshanyu dia vɔ ndjakimɔ dia kambɛ Jehowa etena kekewɔ akɛnda. Akɛnda amɔtshi l’atei awɔ wekɔ lo pomana l’ekakatanu efula la kalasa, koko wakakotsha kɛnɛ kalɔmbama dia batizama ndo wekɔ la lowando lo wetshelo wakawalongola la ngelo.—Osam. 128:1-6.

Sho nangaka tɛkɛta nto dikambo dia lofulo la diambo l’ambeki wa Bible latatetemala pama ndo olimu wa wolo wakamba wa misiɔnɛrɛ ndo ambatshi mboka wa lânde wakakimanyiya efula l’ohamelo ɔsɔ. Sho tshɛ ase Olui-walɔmbɔla mandolaka efula olimu w’ohomba wakamba anangɛso l’akadiyɛso l’andja w’otondo lo mbutɛ anto wele l’etema w’ɛlɔlɔ ɔnɛ “Yaka!” lo mbelɛ anto tshɛ wele la mposa dia vɔ ndjɔsa “ashi a lumu wososa.” (Eny. 22:17) La wangasanu tshɛ, sho nongolaka anto 289 678 wakɛnya ndjakimɔ kawɔ lo batizama lo ashi l’ɔnɔnyi wetshi l’atei wa nkumbo kaso k’onto l’ɔnango ka l’andja w’otondo!

Ekɔ dimɛna dia sho tetemala mbohɔ ɛtɛkɛta waki ɔpɔstɔlɔ Joani lakafunde ɔnɛ: “Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.” (1 Joa. 2:17) Ndo tohɔke dia tekɔ lo nsɛna lo etena kamboleka monga suke la etena kayanga ‘mbeta’ andja ɔnɛ. Ekɔ dui dia lomba dia sho ndeka ndjasha lo sala lolango laki Nzambi ndo ‘tetemala sungukala.’ (Mat. 24:42) Hatonyangaki pondjo naka sho sala dui sɔ ndo tayokondja ɛtshɔkɔ w’oma lo ngandji ka lɔsɛngɔ kaki Jehowa.—Is. 63:7.

Sho nangaka nyoshikikɛ dia sho nyokanyiyaka, nɔmbaka dikambo dianyu ndo nyokaka ngandji k’efula. Tekɔ lo nɔmba Jehowa dia nde nyotshulwɛ lokema l’ɛtshɔkɔ.

Anangɛnyu,

Olui-walɔmbɔla w’Ɛmɛnyi wa Jehowa