Ngande wayotokadimola?
1. Lande na kahombaso mbokoya ɛnyɛlɔ ka Yeso etena katokawɔ ambola?
1 Edja ndo ɛlɔ kɛnɛ, anto efula mambaka lo kɛnɛ kendana la ekadimwelo w’eshika wakasha Yeso lo ambola wakokaka anto. Naka anto wambotoka ambola wotshikitanyi etena keso l’esambishelo, sho pombaka mbokoya yoho yakakadimolaka Yeso.—1 Pet. 2:21.
2. Kakɔna kakoka tokimanyiya dia sho mbisha ekadimwelo w’eshika lo ambola watokawɔ?
2 Tohokame ntondotondo: Yeso akakanaka yimba lo kɛnɛ kakatshutshuyaka ampokami ande dia mbôka ambola. Mbala mɔtshi dui sɔ nɔmbaka dia sho mboka ompokami aso ambola dia shihodia kɛnɛ kalangande mbuta. Mbeyaka monga ko onto latombola ate: “Lande na kahanyetawɔ Yeso”? ekɔ lo tombola lande na kahatasale fɛtɛ ka Nɔɛlɛ. Naka tayoshihodia dimbola di’ompokami aso dimɛna, kete tayokoka kana la nde yimba dimɛna.—Luka 10:25-37.
3. Dihomɔ diakɔna diele la so diakoka tokimanyiya dia sho mbisha ekadimwelo w’eshika w’oma l’Afundelo?
3 Tokambe l’Ɔtɛkɛta wa Nzambi dia kadimola: Mbala efula ndeka dimɛna mɛnya okadimwelo washa Bible lo dimbola diotokiwɔ. (2 Tim. 3:16, 17; Heb. 4:12) Dibuku Comment raisonner la biukubuku Awui wa lo Bible wa sawolaka l’anto ambokimanyiya apandjudi efula dia mbishaka ekadimwelo w’eshika. Oyadi ompokami aso hɔshi Bible oko dibuku dia mɛtɛ, sho mbeyaka mbɛnya kɛnɛ ketsha Afundelo l’ɔkɔmi tshɛ. Tokeketsha ompokami aso dia nde sɛdingola dimɛna dimɛna lomba l’oshika lele lo Bible. Naka sho mbokoya Yeso, kete ekadimwelo aso wayonga oko ‘elowa wa pɔmɛ wa paonyi lo asango wa fɛsa,’ mbuta ate wayonga ekadimwelo w’eshika, w’amɛna ndo wele la nɛmɔ.—Tuk. 25:11.
4. Lo tena diakɔna diele ndeka ɔlɔlɔ diaha sho pemba kadimola lo oseka dimbola tshɛ?
4 Onde sho pombaka kadimola lo oseka dimbola tshɛ? Naka hateye okadimwelo wa dimbola diotokiwɔ, kete tatokake sɔnyi dia mbuta ɔnɛ: “Haleye, koko dimi kokaka sala eyangelo lo dimbola diayɛ ko ndjokosha okadimwelo wayomotana.” Monga la okitshakitsha wa ngasɔ ndo ndjasha le ompokami aso, mbeyaka mbotshutshuya dia nde tɔlɔmba dia sho nyomoya ndjowenda. Naka tamboshihodia dia atunyi mbatoka dimbola dia mbidjana la so tâmu, kete tokoya Yeso lo mbâkadimola paka lo tshena pe. (Luka 20:1-8) Woho akɔ wâmɛ mbele, naka onto ɔmɔtshi lahɛnya nsaki k’oma k’ɛse otema lo akambo wa mɛtɛ ambohemba dia mbidjana la so tâmu, kete tohembole sawo la loshilambo tshɛ ndo tokambe la wenya aso dia nyanga anto w’etema ɛlɔlɔ.—Mat. 7:6.
5. Ɛnyɛlɔ kakɔna kakatotshikɛ Yeso lo kɛnɛ kendana l’okadimwelo wa ambola?
5 Yeso akeyaka dia aki ohomba ndjaɛkɛ le Jehowa dia kotsha ɔkɛndɛ ande wa ‘sambisha akambo wa mɛtɛ dimɛna dimɛna,’ ɔkɛndɛ wakendanaka ndo la kadimola ambola w’anto waki mɛtɛ l’ohomba w’ekadimwelo. (Joa. 18:37) Ande diɛsɛ diele la so dia mbokoya Yeso lo mbishaka ‘wanɛ wakoka ndjolongola lɔsɛnɔ la pondjo’ ekadimwelo lee!—Etsha 13:48.