‘Lomba lamboyindjama oma lo etsha alɔ’
1. Ngande wɔsa anto amɔtshi olimu aso?
1 Tena dimɔtshi, ampokami aso wahashihodia kɛnɛ kawatɛso kana wakawatɛ akambo wa kashi lo lokombo l’Ɛmɛnyi wa Jehowa mbeyaka ntona dia sho mbasambisha. Ondo tokanyi tawɔ takasɛngiyama la nsango ya kashi yewoyawɔ lo tita nsango. L’ahole amɔtshi, anto mbutaka dia tekɔ ase yaato y’ɔtɛmwɛlɔ ya wâle. Akokaso nsala naka wambototɛ ɛtɛkɛta wa diɔnyɔ wa ngasɔ?
2. Kakɔna kayotokimanyiya dia sho mbewɔ dia ndjakɔmɔla etena kahomanaso la diɔnyɔ?
2 Tɛnake akambo la sso di’ɔlɔlɔ: Lo ntambe ka ntondo, mbala efula anto koshihodiaka kɛnɛ kakataka Yeso ndo ekambi ekina waki Jehowa. (Etsha 28:22) Koko, vɔ kombetawɔ dia diɔnyɔ mbakonya dia mbɔsa olimu awɔ oko ɛngɔ ka sɔnyi. Yeso akate ate: ‘Lomba lamboyindjama oma lo etsha alɔ.’ (Mat. 11:18, 19) Nde akatetemala nsala lolango laki She l’ohetoheto ele l’eshikelo ɔnɛ wanɛ wayanga akambo wa mɛtɛ wayɔsa lokumu l’ɔlɔlɔ la nɛmɔ. Sho kokaka mbewɔ dia ndjakɔmɔla lo mbohɔ dia wakasalɛ Ɔna Nzambi woho akɔ wâmɛ.
3. Lande na kahahombe nkumu ya kɔlɔ yatawɔ lo lokombo laso ndo woho watɔlɔshawɔ tâmbiya?
3 Yeso akate dia andja ɔnɛ wayohetsha ambeki ande oko wakawôhetsha. (Joa. 15:18-20) Ɔnkɔnɛ, nkumu ya kɔlɔ yata anto lo lokombo laso ndo woho walɔshamaso ɛlɔ kɛnɛ hahombe tâmbiya. Lo mɛtɛ, sho pombaka nongamɛ di’akambo wa ngasɔ wayotokomɛ etena katataleke nyɔngɔmɛ lo nshi y’ekomelo ndo kataleke mfula nkɛlɛ kaki Satana. (Eny. 12:12) Sho kokaka ngɛnangɛna l’ɔtɛ watasusama etena kambotshikalɛ andja waki Satana.
4. Kakɔna kahombaso nsala naka anto wambotona dia sho mbasambisha lokumu l’ɔlɔlɔ?
4 Tokadimole l’ɔkɔmi: Etena katona anto dia sho mbasambisha, sho pombaka kadimolaka mbala tshɛ l’ɔkɔmi ndo la lotutsha. (Tuk. 15:1; Kol. 4:5, 6) Naka kokaka, sho mbeyaka mbutɛ ompokami aso di’ekɔ akambo efula wahombande mbeya lo kɛnɛ kendana l’Ɛmɛnyi wa Jehowa ko kana sho mbeyaka mbɔlɔmba dia nde tosha ɛkɔkɔ wetawɔnde kɛnɛ ketawɔnde. Woho wayotokadimola la lotutsha mbeyaka mbotshutshuya dia nde nyomɔsɛdingola nkumu yakandoke lo lokombo l’Ɛmɛnyi wa Jehowa ndo mbahokamɛ naka vɔ ndja dia ndjosambisha nto. Koko, naka ompokami aso ekɔ la nkɛlɛ efula, ayoleka dimɛna sho mbɔlɔmba kɛtshi. Tonge l’eshikikelo dia oyadi woho akɔna tshɛ watɔsa anto akina, Jehowa mbɔsaka olimu wokambɛso la nɛmɔ.—Is. 52:7.