Olimu woleki mbisha ɔngɛnɔngɛnɔ
1. Naa olimu wendana la ɛkɔnwɛlɔ ka lo nyuma wele lo kambema ɛlɔ kɛnɛ?
1 Ɔngɛnɔngɛnɔ w’efula wakalole l’etema wa wanɛ wakɛnyi woho wakakɔnɔ anto oma lo hemɔ yawɔ ya lo demba lo ntambe ka ntondo. (Luka 5:24-26) Lo nshi yaso nyɛ, tekɔ lo ngɛnangɛna dia nkamba olimu wendana la ɛkɔnwɛlɔ ka lo nyuma. (Eny. 22:1, 2, 17) Ande ɔngɛnɔngɛnɔ dia mbadia ɛkɔndɔ wɛnya woho watshikitanya Ɔtɛkɛta wa Jehowa ndo nyuma kande k’ekila nsɛnɔ y’anto lee! Koko kɛnɛ koleki mbisha ɔngɛnɔngɛnɔ ele, nkamba olimu ɔsɔ lo nɔmbɔla ombeki ɔmɔtshi wa Bible watahame.
2. Ɔngɛnɔngɛnɔ akɔna wakoka monga la so etena ketshaso onto ɔmɔtshi akambo wa mɛtɛ?
2 Ele lokombo la Nzambi? Lande na katshikande asui? Kakɔna kayosalɛ Diolelo dia Nzambi anto? Sho ngɛnangɛnaka aha tsho dia nkadimola lo ambola asɔ, koko ndo lo mɛna ɔngɛnɔngɛnɔ wonga l’ombeki wa Bible etena keyande akambo wa mɛtɛ. (Tuk. 15:23; Luka 24:32) Etena katahame ombeki, nde kokaka ntatɛ nkamba la lokombo laki Jehowa, ntshikitanya yoho yande ya ndɔta ndo ya nɔngɔsɔla divo, ntshika ditshelo dia wâle ndo ntatɛ nsambisha anto akina. Naka nde mpama polo ndo lo ndjakimɔ ndo lo batizama, kete nde ayokoma ɔnangɛso ndo wonyaso okambi. Wanya asɔ tshɛ toshaka ɔkɔkɔ wa monga l’ɔngɛnɔngɛnɔ.—1 Tes. 2:19, 20.
3. Naa wanya w’ohomba wakokaso ntakola dia ntatɛ mbeka l’onto ɔmɔtshi Bible?
3 Onde wɛ kokaka mbisha lonya? Naka wɛ nangaka mbisha lonya l’olimu ɔnɛ woleki mbisha ɔngɛnɔngɛnɔ, kete lɔmba Jehowa dia wɛ nkondja diɛsɛ dia nɔmbɔla ombeki ɔmɔtshi wa Bible, ko oma lâsɔ wɛ nsala akambo lo yoho yɔtɔnɛ l’alɔmbɛlɔ ayɛ. (1 Joa. 5:14) Sambisha l’ahole ndo l’etena kakoka anto tanema lawakawɔ. Mbala tshɛ kakondjayɛ diaaso di’ɔlɔlɔ, sɛngɔla onto dia mbeka la nde Bible. (Und. 11:6) Etena katanayɛ onto lɛnya nsaki ndo konɛyɛ lɔtɔngɔ l’akambo wa mɛtɛ, kalola dia tolitɛ ashi.—1 Kor. 3:6-9.
4. Lande na kahombaso nsɛngɔla anto dia mbeka la wɔ Bible la shamanya tshɛ?
4 Efula k’anto waheyama mbadia weke la ndjala ndo la mposa k’akambo w’ɔlɔlɔ. Waa na wayowakimanyiya dia nkotsha ehomba awɔ wa lo nyuma ɛsɔ lo mbeka la wɔ Bible na? (Mat. 5:3, 6) Nyɛsɔ toyakimɔ la lolango laso dia nkimanyiya dia nshidiya olimu w’esambishelo ndo wa mbetɛ anto ambeki la ntondo ka dinela nkoma l’ekomelo kadiɔ.—Is. 6:8.