Dionga dioleki ohomba le ombetsha w’oshika
1. Naa dionga dioleki ohomba le ombetsha w’oshika?
1 Kakɔna kakimanyiya onto dia monga ombetsha wa Bible w’oshika? Onde kalasa yakandɔtɔ? Akambo wambohomana la nde? Akoka wa lôtɔ wele la nde? Lo mɛtɛ, ekɔ dionga diakɔ diamɛ diele ekotshelo k’ɛlɛmbɛ, dieyama ambeki waki Yeso ndo dioleki woke l’atei a waonga waki Jehowa woleki weke. (Joa. 13:35; Ngal. 5:14; 1 Joa. 4:8) Dionga diakɔ sɔ ko ngandji. Embetsha w’eshika mbokanaka ngandji.
2. Lande na kele ekɔ ohomba sho mboka anto ngandji?
2 Nde mbokaka anto ngandji: Yeso Ombetsha a Woke akokaka anto ngandji ndo kɛsɔ akatshutshuya anto dia vɔ mbohokamɛ. (Luka 5:12, 13; Joa. 13:1; 15:13) Naka sho ndjakiyanya dikambo di’anto, kete tayosambisha lo diaaso tshɛ. Wekamu wele oko ɔlɔshamelo ndo wedjodi hawototɔkɔmɔla. Tayɛnya woho wayashaso l’otema ɔtɔi le anto wasambishaso ndo tayɔtɔnganyiya asawo aso l’ehomba awɔ. Hatototshungola tsho etena dia têka lawɔ Bible, koko tayotshungola ndo etena ka nɔngɔsɔlaka wekelo tshɛ la ntondo.
3. Ngande wayotokimanyiya ngandji k’okaso akambo wa mɛtɛ l’esambishelo?
3 Nde nangaka akambo wa mɛtɛ wa lo Bible: Yeso akalangaka nto akambo wa mɛtɛ wa lo Bible ndo akawaɔsaka oko eombelo k’oshinga wolo. (Mat. 13:52) Naka sho nanga akambo wa mɛtɛ, kete tayɔtɛkɛta akambo akɔ l’ohetoheto tshɛ ndo dui sɔ diayotshutshuya anto wasambishaso dia vɔ tohokamɛ. Ngandji ka ngasɔ kayotokimanyiya dia sho ndjasha l’akambo w’ohomba wasambishaso lo dihole dia sho nkiyana l’ɔtɛ w’elelo wele laso ndo hatotoka wɔma dia nsambisha.
4. Ngande wakokaso mbokana ngandji?
4 Nde mbokanaka ngandji: Ngande wakokaso mboka anto ngandji? Ele lo mbokoya ngandji kakɛnya Jehowa nde la Ɔnande ndo lo ndjakiyanya l’ɔtɛ wa eongelo ka kɔlɔ ka lo nyuma kele l’anto wa l’ɛtshi kaso ka nkɛtɛ. (Mako 6:34; 1 Joa. 4:10, 11) Ngandji kokaso akambo wa mɛtɛ wa lo Bible kayoleka mpama etena kayotosalaka wekelo w’onto ndamɛ wa mbala la mbala ndo kayotokanaka yimba. Ngandji ekɔ dionga dimɔtshi dia l’olowa wa nyuma. (Ngal. 5:22) Ɔnkɔnɛ, sho kokaka nsɛngasɛnga Jehowa dia nde tosha nyuma k’ekila ndo mbɔlɔmba dia nde tokimanyiya woho wa ngandji kaso mpama. (Luka 11:13; 1 Joa. 5:14) Oyadi kalasa yakatɔtɔ, ewo kele laso k’akambo wa mɛtɛ kana akoka aso wa lôtɔ, sho kokaka monga embetsha w’eshika wa Bible lo nkɛnɛmɔla ngandji.