Tongake nshi tshɛ nsuke dia nsambisha
1. Ngande weyaso dia esambisha wa lo ntambe ka ntondo wakongaka nshi tshɛ suke dia nsambisha?
1 Esambisha waki l’ohetoheto lo ntambe ka ntondo wakasambishaka lokumu l’ɔlɔlɔ ‘aha la mpekɔ’ dihole tshɛ diakawatanaka anto. (Etsha 5:42) Ɔnkɔnɛ, hatokoke mfɔnya dia etena kakawatasambishaka lo luudu la luudu, vɔ wakalekanaka anto lo mboka aha la mbasambisha. Ndo vɔ wakakambaka la diaaso tshɛ diakawakondjaka dia nsambisha lo tshakitudi etena kakawatasombaka diangɔ lo lomingu l’ɔkɔngɔ wa vɔ nshidiya la nsambisha. L’ɛnyɛlɔ ka Yeso, vɔ wakongaka nshi tshɛ nsuke dia nsambisha.—Mako 6:31-34.
2. Kakɔna kalɔmbama dia nsɛna lo yoho yɔtɔnɛ la lokombo laso?
2 Tena tshɛ tongake nsuke dia nsambisha: Lokombo laso l’Ɛmɛnyi wa Jehowa, halembetshiya tsho kɛnɛ kasalaso; koko lɔ nembetshiyaka waa na weso. (Is. 43:10-12) Ɔnkɔnɛ tena tshɛ, tekɔ suke dia mamɛ elongamelo kaso oyadi sho kema l’esambishelo ka lo luudu la luudu. (1 Pet. 3:15) Onde wɛ takanyiyaki la ntondo akambo wakoka tokokonya dia wɛ nsambisha lo tshakitudi, ko oma lâsɔ wɛ nkanyiya dia kɛnɛ kakokayɛ tota? Onde wɛ totshɔka l’ekanda dia tosha anto wɛnya nsaki? (Tuk. 21:5) Onde wɛ sambishaka paka lo luudu la luudu kana wɛ tosambishaka anto lokumu l’ɔlɔlɔ ndo lo toho tokina naka kokaka?
3. Elɛwɔ esambishelo ka lo ‘sɛkɛ’ ndo lande na ketɔ ohomba?
3 Esambishelo ka lo ‘sɛkɛ’: Ɔsɔ ekɔ yoho y’esambishelo yasalema lo toshinga, lo waa parkingɛ, lo waa parkɛ, l’ahole w’amundji w’okanda ndo l’ahole akina. Ɔpɔstɔlɔ Paulo akate dia nde akasambishaka lo ‘sɛkɛ’ ndo lo luudu la luudu. (Etsha 20:20) Ekɔ mɛtɛ dia esambishelo ka lo luudu la luudu kayotetemala monga yoho ya ntondo ndo yoleki dimɛna ya nsambisha anto efula losango la Diolelo. Koko, esambisha wa lo ntambe ka ntondo, wakayashaka le anto, koko aha le mvudu. Vɔ wakakambaka la diaaso tshɛ diakawakondjaka dia nsambisha akambo wa mɛtɛ lo sɛkɛ, lo tshakitudi ndo lo luudu la luudu. Nyɛsɔ sho lawɔ toyasha le anto dia sho nkotsha olimu aso dimɛna dimɛna.—2 Tim. 4:5.