Wolo wa ngande wele la mbetawɔ kayɛ l’alaka wa Jehowa?

Jashua la Sɔlɔmɔna wakashikikɛ dia ndooko dui ɔtɔi dia lo alaka waki Jehowa diaki kokotshama. (Jas 23:14; 1Ku 8:56) Kɛnɛ kakate ɛmɛnyi ɛsɔ ehende wakokaso mbɛkɛ etema tokimanyiyaka dia monga la mbetawɔ.​—2Kɔ 13:1; Tit 1:2.

Ngande wakakotsha Jehowa alaka ande lo nshi ya Jashua? Kaamɛ la nkumbo kayɛ, nyende vidɛo ya dramɛ yele l’ɔtɛ a dui ɔnɛ: ‘Ndooko dikambo diakandate diaki kokotshama.’ Oma laasɔ ko nyu nkadimola ambola wayela anɛ: 1) Ngande wakokayɛ mbokoya etsha wa mbetawɔ waki Rahaba? (Hɛb 11:31; Jak 2:24-26) 2) Ngande wɛnya ɛnyɛlɔ kaki Akana dia dionga di’ohindodi konyaka lo mpokoso? 3) Kaanga mbaki apami w’ase Ngibiyɔna andɔshi w’ata, lande na kakawakese Jashua ndo kakawadje sheke ya wɔladi vɔ la wodja w’Isariyɛlɛ? 4) Ngande wakakotshama ɔtɛkɛta waki Jehowa etena kakanɛɛ nkumi ya dikanga tshanu y’ase Amɔra wodja w’Isariyɛlɛ? (Jas 10:5-14) 5) Ngande wakakokimanyiya Jehowa etena kakayetsha Diolelo la losembwe laki Nzambi lo dihole dia ntondo lo lɔsɛnɔ layɛ?​—Mat 6:33.

Naka sho nkana yimba la kɛnɛ tshɛ kakasale Jehowa, kɛnɛ kasalande ndo lo kɛnɛ kayondosala, kete mbetawɔ kaso l’alaka ande kayonga wolo efula.​—Rɔm 8:31, 32.