LƆSƐNƆ L’OKRISTO

Dui di’oyoyo diendana la losanganya la l’atei wa lomingu

Ntatɛ oma lo Ngɔndɔ ka ntondo 2018, losanganya la l’atei wa lomingu layongaka la nɔtɛ ya wekelo ndo media y’oma lo Bible ka l’Ɛtɛrnɛtɛ, mbuta ate Bible—Ekadimwelo k’andja w’oyoyo, Bible ka wekelo (nwtsty), oyadi kaanga Bible ka wekelo kɛsɔ bu l’ɔtɛkɛta anyu. Aha la taamu, kɛsɔ ayoleka mpamia ɔlɔngɔswɛlɔ anyu wa nsanganya. Ndo kɛnɛ koleki ohomba ele, kɛsɔ ayoleka nyosukanya la Jehowa Shɛso ka ngandji!

NƆTƐ YA WEKELO

Nɔtɛ ya wekelo yekɔ la awui wakimanyiya dia nshihodia akambo wendana la mbekelo, dihole ndo tɔtɛkɛta tɔmɔtshi ta lo avɛsa efula wa lo Bible.

Mateo 12:20

Oshinga wa tala wotadimala: Tala dia laa ngelo diakakambaka l’anto aki tala dia tshitshɛ diakawasalaka la diwomba ndo wakalodiaka esɔ k’ɔlivɛ lɔkɔ. Oshinga wa linɛnɛ wakakutolaka esɔ l’oyango wa loombe la dja tetemalaka la mpɛta. Etelo ka lo Grɛkɛ k’ɔnɛ “oshinga wa tala wotadimala” koka mendana la oshinga watondja edinga nɛ dia dikalanga diekekɔ, koko loombe la dja lambokitakita kana lekɔ lotadimala. Prɔfɛsiya ka lo Isaya 42:3 kakatatshi dikambo dia kɛtshi ka Yeso, dia nde hadimaki pondjo shase y’ekomelo y’elongamelo k’anto wele l’okitshakitsha ndo wanɛ wasowa.

Mateo 26:13

Lo mɛtɛ: Tshɛkɛta a·menʹ ya lo Grɛkɛ, ekɔ okadimwelo wa tshɛkɛta ʼa·menʹ, ya lo Hɛbɛru yalembetshiya “ayale ɔsɔku,” kana “lo mɛtɛ.” Mbala efula Yeso akakambaka la tshɛkɛta nyɛ la ntondo ka nde mbita dui dimɔtshi, daka kana prɔfɛsiya kɛmɔtshi, l’oyango wa ntɔtɔmiya dia dui diakɔ diekɔ mɛtɛ ndo kokaka mbɛkɛ otema. Vɔ mbutaka dia woho wakakambe Yeso la tshɛkɛta “lo mɛtɛ” kana aamɛɛ ekɔ yoho ya laande lo afundelo w’ekila. Etena katamayɔ mbala hiende sukana (a·menʹ a·menʹ), oko woho watanemadiɔ lo Evanjiliɔ wa Joani, etelo kaki Yeso kɛsɔ kadimɔmaka ɔnɛ “lo mɛtɛ.”—Jni 1:51.

MEDIA

Foto, esato ndo tovidɛo tele bu la ɛtɛkɛta ndo tovidɛo ta osangelo wa lo dibaya tɛnyaka awui wotshikitanyi watanema lo Bible.

Bɛtɛfangɛ, Dikona di’esongo w’Ɔlivɛ, ndo Jɛrusalɛma

Vidɛo ya mondo nyɛ mɛnyaka mboka kosukanyi la Jɛrusalɛma oma lo ɛstɛ, oma lo ngielongelo ya nshi nyɛ ya et-Tour yafɔnyama dia yɔ mbele Bɛtɛfangɛ katɛkɛtama lo Bible, polo ndo lo shɔdi mɔtshi ya lo Dikona di’esongo w’Ɔlivɛ. Bɛtaniya kaki lo ɛstɛ ka Bɛtɛfangɛ lo lɛkɛ la ɛstɛ k’omamu wa Dikona di’esongo w’Ɔlivɛ. Etena kakiwɔ la Jɛrusalɛma, Yeso ndo ambeki ande waki la mbekelo ka tolalaka la Bɛtaniya, nshi nyɛ aya osomba wa tshitshɛ wa el-ʽAzariyé (El ʽEïzariya), lokombo la lo arabe lalembetshiya “Dihole dia Lazaro.” Aha la taamu, Yeso akatshikalaka laa ngelo kaki Maata, Mariya ndo Lazaro. (Mat 21:17; Makɔ 11:11; Luka 21:37; Jni 11:1) Etena kakandayaka oma lakawɔ otsha la Jɛrusalɛma, ondo Yeso aketaka lo mboka kakɔ kaamɛ kɛnyishami lo vidɛo. Lo Ngɔndɔ ka Nisana 9, 33 T.D., etena kakahema Yeso lo ɔsɔngɔ wa mponda lo mbeta oma lo Dikona di’esongo w’Ɔlivɛ otsha la Jɛrusalɛma, ondo nde akadjɛ oma la Bɛtɛfangɛ, lo tayelaka mboka k’otsha la Jɛrusalɛma.

Mboka k’oma la Bɛtaniya polo la Bɛtɛfangɛ
Bɛtɛfangɛ
Dikona di’esongo w’Ɔlivɛ
Okidi wa Kidirɔna
Dikona dia tɛmpɛlɔ

Lɔsɛti lo weka wa lo etshindji

Ɔnɛ ekɔ foto kɛnya woho wanyɔngɔmɛ lɔsɛti la lowolo lele l’otale wa satimɛtrɛ 11, 5 lo demba di’onto. Lɔsɛti la ntondotondo lakasalema oma le anto lakashɔma lo 1968, etena kakawatatshimaka lo lɛkɛ la nɔrdɛ ka Jɛrusalɛma ndo lɔ lakikɔ lo nshi y’ase Rɔmɔ. Kɛsɔ kashikikɛ djembetelo y’emindo dia ɔnɛ wakakambaka la nsɛti dia ndjaka onto lo otamba. Lɔsɛti lɔnɛ koka mfɔna la nsɛti yakakambe la asɔlayi w’ase Rɔmɔ dia ndjaka Yeso l’otamba. Wakashola lɔsɛti lakɔ lo shɛtɛshɛtɛ mɔtshi ya mbolo, ndo lɔkɔ wakatane weka wamboma w’anto wakavu ndo emunyi awɔ wamboshilaka la mpɔnda. Kɛsɔ mɛnyaka dia wakakokaka nkundɛ onto lakadiakema lo otamba.—Mat 27:35.